បន្ទាប់ពីទទួលបាននូវការចាត់តាំងពីឯកឧត្តម បាន គីមូន អគ្គលេខាធិការអង្គការសហប្រជាជាតិ និងទទួលការយល់ព្រមពីឧត្តមក្រុមប្រឹក្សានៃអង្គចៅក្រម ព្រះករុណា សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ទ្រង់បានតែងតាំងលោកស្រី ក្លូឌៀ ហ្វិន (ជនជាតិអូទ្រីស) ជាចៅក្រមអន្តរជាតិថ្មីនៃអង្គជំនុំជម្រះ សាលាដំបូងនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក)។ ការតែងតាំងនេះមានសុពលភាពចាប់ពីថ្ងៃទី១ ខែកញ្ញា ឆ្នាំ ២០១៤ នេះតទៅ។ លោកស្រីចៅក្រម ក្លូឌៀ ហ្វិន បានបម្រើការងារជាចៅក្រមអន្តរជាតិបម្រុងនៅអង្គជំនុំជម្រះសាលាដំបូងចាប់តាំងពីឆ្នាំ ២០០៦ មកម្ល៉េះ ហើយលោកស្រីជំនួសលោកស្រីចៅក្រម ស៊ីលវៀ ខាត់រ៉ាយត៍ (ជនជាតិនូវែលហ្សេឡង់) ដែលការលាលែងពីតំណែងរបស់លោកស្រីចូលជាធរមាន នៅថ្ងៃទី១ ខែកញ្ញា ឆ្នាំ២០៤ នេះ។
លោកស្រីចៅក្រម ក្លោឌៀ ហ្វិន បានទទួលសញ្ញាប័ត្របណ្ឌិតច្បាប់ពីសាកលវិទ្យាល័យក្រុងវីយែន។ នៅឆ្នាំ១៩៨៤លោកស្រីបានទទួលការតែងតាំងជាចៅក្រមនៅក្នុងប្រព័ន្ធយុត្តិធម៌ផ្នែកព្រហ្មទណ្ឌប្រចាំប្រទេស និងបានកាន់តំណែងនេះអស់រយៈពេលជាង២០ឆ្នាំដោយធ្វើការនៅផ្នែកស៊ើបអង្កេត នៅអង្គជំនុំជម្រះសាលាដំបូង និងនៅសាលាឧទ្ធរណ៍។ នៅឆ្នាំ២០០៤ លោកស្រី ត្រូវបានតែងតាំងជាចៅក្រមអន្តរជាតិ សម្រាប់បេសកកម្មរដ្ឋបាលបណ្តោះអាសន្នរបស់អង្គការសហប្រជាជាតិនៅកូសូវ៉ូ ទាក់ទិននឹង
ឧក្រិដ្ឋកម្មដែលមានរចនាសម្ព័ន្ធចាត់តាំង ឧក្រិដ្ឋកម្មដែលមានចរិតលក្ខណៈជាតិពន្ធុ និងឧក្រិដ្ឋកម្មសង្រ្គាម។ បន្ទាប់មកលោកស្រីធ្វើការងារជាប្រធានផ្នែកនីតីរដ្ឋ
នៅក្នុងបេសកកម្ម EUPOLCOPPS នៅប៉ាឡេស្ទីន ដែលផ្តល់ការគាំទ្រដល់ផ្នែកនគរបាល និងផ្នែកយុត្តិធម៌ព្រហ្មទណ្ឌប៉ាឡេស្ទីន (ឆ្នាំ២០០៦-២០០៨)។