លោក Fergal GAYNOR
នៅថ្ងៃទី១៥ ខែកក្កដា ឆ្នាំ២០២២ លោក ហ្វេហ្គល ហ្គេន័រ (ប្រទេសអៀកឡង់) បានទទួលភារកិច្ចជាសហព្រះរាជអាជ្ញាអន្តរជាតិបម្រុង បន្ទាប់ពីលោកស្រី ប្រិនដា ហូលលីស (សហរដ្ឋអាមេរិច) បានដាក់ពាក្យលាលែងពីតំណែង។
លោក Gaynor បានបំពេញការងារជាមេធាវីជំនុំជម្រះ (Trial Attorney) ក្នុងការិយាល័យរដ្ឋអាជ្ញានៅតុលាការព្រហ្មទណ្ឌអន្តរជាតិសម្រាប់ប្រទេសរវ៉ាន់ដា (ICTR) និងតុលាការព្រហ្មទណ្ឌអន្តរជាតិសម្រាប់អតីតប្រទេសយូហ្គោស្លាវី (ICTY) ពីឆ្នាំ២០០៥ ដល់ឆ្នាំ២០១៣ មុនពេលបំពេញការងារជាជំនួយការជាន់ខ្ពស់សហព្រះរាជអាជ្ញានៅ អ.វ.ត.ក ពីឆ្នាំ២០១៥ ដល់ឆ្នាំ២០១៦។ គាត់ធ្លាប់បំពេញការងារជាមេធាវីនាំមុខតំណាងជនរងគ្រោះនៅតុលាការព្រហ្មទណ្ឌអន្តរជាតិ (ICC) ក្នុងសំណុំរឿងប្រឆាំងនឹងប្រធានាធិបតីកេនយ៉ា Uhuru Kenyatta ចាប់ពីឆ្នាំ២០១២ មក និងជាតំណាងជនរងគ្រោះមួយក្រុមនៅក្នុងស្ថានភាពនៅប្រទេសអាហ្វហ្កានីស្ថាន ចាប់ពីឆ្នាំ២០១៩ មក ដែលបច្ចុប្បន្នកំពុងស្ថិតក្នុងការស៊ើបអង្កេតនៅតុលាការ ICC។
លោក Gaynor ទទួលបានសញ្ញាបត្របរិញ្ញាបត្រនីតិសាស្រ្តពីមហាវិទ្យាល័យ Trinity College Dublin និងសញ្ញាបត្រអនុបណ្ឌិតទស្សនវិជ្ជាពីសាកលវិទ្យាល័យ Cambridge។ គាត់ជាសមាជិកគណៈមេធាវីអៀរឡង់ និងជាសមាជិកគណៈកម្មាធិការនិពន្ធនាយកនៃព្រឹត្តប័ត្រ Journal of International Criminal Justice។
- សញ្ជាតិ : ជនជាតិអៀរឡង់
- ការិយាល័យ : ការិយាល័យសហព្រះរាជអាជ្ញា,
- តំណែង : សហព្រះរាជអាជ្ញាអន្តរជាតិបម្រុង