មុខងារស្នូល

សហព្រះរាជអាជ្ញាអនុវត្តឆន្ទានុសិទ្ធិរបស់ខ្លួនក្នុងការស៊ើបអង្កេតបឋម និងចូលរួមក្នុងការស៊ើប​អង្កេតរបស់តុលាការនៅ អ.វ.ត.ក.។

ក្នុងអំឡុងពេលនៃការស៊ើបអង្កេតបឋម សហព្រះរាជអាជ្ញាពិនិត្យមើលពាក្យបណ្តឹង និងអនុវត្តការ​ស៊ើប​អង្កេតដំបូងដើម្បីកំណត់ថា តើភស្តុតាងបង្ហាញពីឧក្រិដ្ឋកម្មនៅក្នុងសមត្ថកិច្ចរបស់ អ.វ.ត.ក. បានប្រព្រឹត្តឬយ៉ាងណា និងកំណត់អត្តសញ្ញាណជនសង្ស័យ និងបុគ្គលដែលអាចធ្វើជាសាក្សី។

ប្រសិនបើសហព្រះរាជអាជ្ញាមួយរូប ឬទាំងពីរជឿថា ឧក្រិដ្ឋកម្មត្រូវបានប្រព្រឹត្ត ពួកគេស្នើសុំបើកការស៊ើប​អង្កេត​តាមផ្លូវតុលាការលើការចោទប្រកាន់ទាំងនេះ ដោយបញ្ជូនដីកាសន្និដ្ឋានបញ្ជូនរឿងអោយស៊ើបសួរ​ ទៅសហ​ចៅក្រម​ស៊ើប​អង្កេត។ ដីកាសន្និដ្ឋានបញ្ជូនរឿងអោយស៊ើបសួរអាចដាក់ឈ្មោះបុគ្គលម្នាក់ ឬច្រើននាក់ ដែលសហព្រះរាជអាជ្ញា​ជឿ​ថា យោងទៅតាមភស្តុតាង គឺជាមេដឹកនាំជាន់ខ្ពស់នៃរបបខ្មែរក្រហម និង/ឬអ្នកទទួលខុស​ត្រូវខ្ពស់​បំផុត​ចំពោះ​ឧក្រិដ្ឋកម្មដែលបានប្រព្រឹត្ត។ សហព្រះរាជអាជ្ញាក៏អាចដាក់ដីកាបញ្ជូន រឿងអោយស៊ើបសួរបន្ថែម​ សុំ​ឱ្យ
សហចៅក្រម​ស៊ើបអង្កេតស៊ើបសួរអង្គហេតុថ្មី ។

នៅពេលដែលអង្គជំនុំជម្រះសាលាដំបូងទទួលដីកាបញ្ជូនរឿងទៅជំនុំជម្រះ សហព្រះរាជអាជ្ញាចូល​រួមក្នុងដំណើរការជំនុំជម្រះកាត់ក្តី និងដំណាក់កាលសាទុក្ខរបស់តុលាការ។ សហព្រះរាជអាជ្ញាមានបន្ទុក​​បង្ហាញភស្តុតាងចំពោះ ការចោទប្រកាន់ឲ្យលើសពីវិមតិសង្ស័យ។ សហព្រះរាជអាជ្ញាសាកសួរសាក្សី ដើមបណ្តឹងរដ្ឋប្បវេណី អ្នក​ជំនាញ និងជនជាប់ចោទក្នុងអំឡុងពេលសវនាការ។

បន្ទាប់ពីមានសាលក្រមរបស់អង្គជំនុំជម្រះសាលាដំបូង សហព្រះរាជអាជ្ញាអាចប្តឹង​ឧទ្ធរណ៍ទៅអង្គ​ជំនុំ​ជម្រះ​​តុលាការ​កំពូល ឬឆ្លើយតបទៅនឹងបណ្តឹងឧទ្ធរណ៍របស់មេធាវី ការពារក្តី ឬដើមបណ្តឹង​រដ្ឋប្បវេណី។ ពួកគេក៏អាចសាកសួរសាក្សីថ្មី ដើមបណ្តឹងរដ្ឋប្បវេណី ឬអ្នកជំនាញ ដែលត្រូវបានកោះហៅ​ដោយ​អង្គជំនុំជម្រះតុលាការកំពូល ហើយចូលរួមក្នុងសវនាការសាធារណៈ។

នៅពេលដែលអង្គជំនុំជម្រះបានបញ្ចប់ការផ្តន្ទាទោសឲ្យជាប់ពន្ធនាគារ សហ​ព្រះរាជ​​អាជ្ញាត្រូវទទួល​ខុសត្រូវចំពោះការអនុវត្តទោសដោយសហការជាមួយអាជ្ញាធរកម្ពុជា។ ទណ្ឌិត​នៃ អ.វ.ត.ក. ត្រូវផ្ទេរពី​​​មន្ទីរឃុំឃាំង​របស់ អ.វ.ត.ក. ដើម្បីទទួលទោស​​នៅ​ក្នុង​ពន្ធនាគារជាតិ ដែលផ្តល់លក្ខខណ្ឌនៃការឃុំឃាំងស្របតាមស្តង់ដារអន្តរជាតិ​សម្រាប់ការមើលថែអ្នកទោស។