• លោក ឌឹម សុវណ្ណារុំ ដែលបានបម្រើការជាអ្នកនាំពាក្យសាលាក្តីខ្មែរក្រហម ត្រូវបានតែងតាំងជាមន្ត្រីទទួលបន្ទុកផ្នែកកិច្ចការសាធារណៈ។
• នៅក្នុងកិច្ចខិតខំប្រឹងប្រែងដើម្បីពង្រឹងបន្ថែមផ្នែកព័ត៌មានសាធារណៈ ប្រព័ន្ធផ្សព្វផ្សាយនិងផ្នែកផ្សព្វផ្សាយរបស់ អ.វ.ត.ក លោក ហ៊ុយ វណ្ណៈ ត្រូវបានតែងតាំងឲ្យកាន់តំណែងជាមន្ត្រីកិច្ចការសាធារណៈ។ មុនពេលបំពេញការងារនៅ អ.វ.ត.ក លោក វណ្ណៈ គឺជានិពន្ធនាយកព័ត៌មាននៃបណ្តាញស្ថានីយ៍ទូរទស្សន៍កម្ពុជា (ស៊ីធីអិន) ហើយមុននេះទៀត លោកគឺជាអ្នកយកព័ត៌មានឲ្យវិទ្យុអាស៊ីសេរី។ ដោយធ្លាប់បម្រើការជាអ្នកស្រាវជ្រាវនិងនិពន្ធសៀវភៅនៅមជ្ឈមណ្ឌលឯកសារកម្ពុជា លោក ហ៊ុយ វណ្ណៈ មានការយល់ដឹងជ្រៅជ្រះអំពីប្រវត្តិសាស្រ្តនៃរបបកម្ពុជាប្រជាធិបតេយ្យ។ លោក វណ្ណៈ មានសញ្ញាប័ត្រអនុបណ្ឌិតលើមុខវិជ្ជាទំនាក់ទំនងសាកលពីសាកលវិទ្យាល័យ រ៉ាត់ហ្កឺត នៅរដ្ឋញូវចឺស៊ី សហរដ្ឋអាមេរិក។
• អ.វ.ត.ក ក៏បានតែងតាំងលោក នេត្រ ភក្រ្តា ជាមន្ត្រីនាំពាក្យនៃ អ.វ.ត.ក។ ពីមុន លោក ភក្រ្តា គឺជានាយកគ្រប់គ្រងការីនិពន្ធនៃសារព័ត៌មានភ្នំពេញប៉ុស្តិ៍ ភាសាខ្មែរ។ លោក ភក្រ្តា មានបទពិសោធន៍រយៈពេល៩ឆ្នាំក្នុងវិស័យសារព័ត៌មាននៅសារព័ត៌មានភ្នំពេញប៉ុស្តិ៍ វិទ្យុបារាំងអន្តរជាតិ ទូរទស្សន៍ជាតិកម្ពុជា ទូរទស្សន៍ស៊ីធីអិន សារព័ត៌មានមេគង្គថែមស៍ និងសារព័ត៌មានសំណេរថ្មី។ លោក ភក្រ្តា មានសញ្ញាប័ត្របរិញ្ញាប័ត្រលើមុខវិជ្ជាសារព័ត៌មាននិងវិធីសាស្ត្របង្រៀនភាសាបារាំងពីវិទ្យាស្ថានភាសាបរទេសនៃសាកលវិទ្យាល័យភូមិន្ទភ្នំពេញ។