ចៅក្រម Michael Bohlander បានដាក់ពាក្យសុំលាឈប់ពីមុខតំណែងជាសហចៅក្រមស៊ើបអង្កេតអន្តរជាតិ។ ការស៊ើបអង្កេតនៅសេសសល់ចុងក្រោយក្នុងសំណុំរឿង ០០៤ ត្រូវបានបញ្ចប់ត្រឹមថ្ងៃនេះ។
គាត់បានបំពេញការងារជាសហចៅក្រមស៊ើបអង្កេតបម្រុងអន្តរជាតិពីថ្ងៃទី១០ ខែមិថុនា ឆ្នាំ២០១៥ ដល់ថ្ងៃទី៣១ ខែកក្កដា ឆ្នាំ២០១៥ នៅពេលគាត់ចូលកាន់ការងារបន្តពីចៅក្រម Mark B. Harmon ក្នុងនាមជាសហចៅក្រមស៊ើបអង្កេតអន្តរជាតិទី ៥ ចាប់តាំងពីការបង្កើត អ.វ.ត.ក មក។
គាត់ទទួលស្គាល់ថា នេះជាកិត្តិយស និងជាបុព្វសិទ្ធិមួយដែលបានបំពេញការងារជាសហចៅក្រមស៊ើបអង្កេតអន្តរជាតិ និងបានធ្វើការរួមគ្នាជាមួយសហចៅក្រមស៊ើបអង្កេតជាតិ ឯ.ឧ យូ ប៊ុនឡេង និងក្រុមការងាររបស់គាត់។ ជាពិសេស គាត់សូមថ្លែងអំណរគុណដល់សមាជិកក្រុមការងារទាំងអស់របស់គាត់ រួមមាន បុគ្គលិក មន្រ្តីកិច្ចសន្យា និងបុគ្គលិកកម្មសិក្សា ចំពោះការងារដ៏មានតម្លៃ ការគាំទ្រ និងភាពស្មោះត្រង់របស់ពួកគេ ហួសពីភារកិច្ចដែលត្រូវបំពេញ ក្នុងរយៈពេលប៉ុន្មានឆ្នាំមកនេះ ទោះបីស្ថិតក្នុងស្ថានភាពលំបាកលំបិនយ៉ាងណាក្តី។
ចៅក្រម Bohlander នឹងវិលត្រឡប់ទៅប្រទេសអង់គ្លេសវិញ ដើម្បីបំពេញការងារជាប្រធានផ្នែកនីតិប្រៀបធៀប និងនីតិព្រហ្មទណ្ឌអន្តរជាតិនៅមហាវិទ្យាល័យនីតិសាស្រ្ត Durham ដែលគាត់បានសុំច្បាប់សម្រាកចាប់តាំងពីថ្ងៃទី១១ ខែកញ្ញា ឆ្នាំ២០១៥ មក។ គាត់ក៏នឹងទទួលយកការងារជាសមាជិកនៃក្រុមចៅក្រមបម្រុងនៅក្នុងអង្គជំនុំជម្រះពិសេសសម្រាប់ Kosovo នៅទីក្រុងឡាអេ ដែលគាត់បានទទួលការតែងតាំងក្នុងខែកុម្ភៈ ឆ្នាំ២០១៧។