ចៅក្រម Motoo Noguchi មកពីប្រទេសជប៉ុន ដែលជាចៅក្រមនៃអង្គជំនុំជម្រះតុលាការកំពូលនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានបញ្ជូនពាក្យសុំលាលែងពីការងាររបស់លោក ទៅលោកអគ្គលេខាធិការអង្គការសហប្រជាជាតិ នៅថ្ងៃទី១៦ ខែឧសភា ឆ្នាំ២០១២។ ពាក្យសុំលាលែងរបស់លោកនឹងចូលជាធរមានក្នុងអំឡុងពេល៦០ថ្ងៃ គឺនៅថ្ងៃទី១៥ ខែកក្កដា ឆ្នាំ២០១២។ លោកនឹងវិលត្រឡប់ទៅបម្រើការងារនៅក្រសួងយុត្តិធម៌ជប៉ុនវិញ។
ចៅក្រម Motoo Noguchi បានបម្រើការងារនៅ អ.វ.ត.ក តាំងពីការបង្កើតតុលាការនេះដំបូងនៅឆ្នាំ២០០៦។ នៅក្នុងនីតិវិធីសវនាការលើបណ្តឹងសាទុក្ខក្នុងសំណុំរឿង ០០១ លោកគឺជាចៅក្រមធ្វើរបាយការណ៍ ដែលរៀបចំសេចក្តីព្រាងអំពីបុព្វហេតុនៃបណ្តឹងសាទុក្ខនៅក្នុងសាលដីកា។ លោកក៏បានដើរតួយ៉ាងសំខាន់នៅក្នុងកិច្ចប្រជុំពេញអង្គ នៅក្នុងគណៈកម្មការរដ្ឋបាលតុលាការ និងនៅក្នុងគណៈកម្មការនីតិវិធីនិងវិធានផ្ទៃក្នុង។
ចៅក្រម Noguchi បានផ្ញើសារមួយជូនប្រជាជនកម្ពុជា ដែលមានខ្លឹមសារជាអាទិ៍ថា៖
“នេះគឺជាមហាកិត្តិយសសម្រាប់រូបខ្ញុំដែលបានចូលរួមចំណែកបំពេញតួនាទីនៅក្នុងបេសកកម្មដ៏លំបាកលំបិនរបស់ អ.វ.ត.ក ក្នុងការនាំយកយុត្តិធម៌មកជូនប្រជាជនកម្ពុជា។ ខ្ញុំជឿជាក់ថា ប្រជាជនកម្ពុជានឹងបន្តកិច្ចខិតខំប្រឹងប្រែងក្នុងការជម្នះអតីតកាលដ៏ជូរចត់ដែលបានបំផ្លិចបំផ្លាញប្រទេសជាតិ ដូចដែលប្រជាជនជប៉ុនបានឆ្លងកាត់កាលពីកន្លះសតវត្សរ៍កន្លងទៅ។ ខ្ញុំក៏សង្ឃឹមថា ប្រជាជនកម្ពុជានឹងបន្តនិយាយរឿងរ៉ាវទាំងនេះប្រាប់កូនចៅជំនាន់ក្រោយៗ បង្កើតឲ្យមានការពិភាក្សានៅក្នុងសង្គម និងបញ្ចូលប្រធានបទនេះទៅក្នុងវិស័យអប់រំដល់សិស្សានុសិស្ស។ ខ្ញុំសូមជូនពរឲ្យប្រទេសកម្ពុជានិងប្រជាជនកម្ពុជាមានសេចក្តីសុខនិងចម្រុងចម្រើន។”