អង្គជំនុំជម្រះតុលាការកំពូលនៃអង្គវិសាមញ្ញក្នុងតុលាការកម្ពុជា បានបង្គាប់នូវរបបនៃការត្រួតពិនិត្យតាមផ្លូវតុលាការលើជនជាប់ចោទ អៀង ធីរិទ្ធ ដោយរួមបញ្ចូលទាំងការត្រួតពិនិត្យផ្នែកវេជ្ជសាស្ត្រជារៀងរាល់ប្រាំមួយខែម្តង និងការត្រួតពិនិត្យប្រចាំខែដោយនគរបាលយុត្តិធម៌ ដោយស្របទៅតាមសេចក្តីសម្រេចរបស់ខ្លួន ដែលបានចេញនៅថ្ងៃទី១៤ ខែធ្នូនេះ។
អង្គជំនុំជម្រះតុលាការកំពូលបានសម្រេចទទួលយកបណ្តឹងសាទុក្ខភ្លាមៗរបស់សហព្រះរាជអាជ្ញាដោយផ្នែក ហើយបានបដិសេធសេចកី្តសម្រេចរបស់អង្គជំនុំជម្រះសាលាដំបូងចុះថ្ងៃទី១៣ ខែកញ្ញា ត្រង់ចំណុចដែលថា ក្នុងអំឡុងពេលផ្អាកកិច្ចដំណើរការនីតិវិធីដោយគ្មានកំណត់ពេលលើជនជាប់ចោទ អៀង ធីរិទ្ធ អង្គជំនុំជម្រះសាលាដំបូងមិនអាចអនុវត្តយុត្តាធិការលើជនជាប់ចោទបាន ហើយនិងខ្វះនូវមូលដ្ឋានផ្លូវច្បាប់ក្នុងការសម្រេចដាក់លក្ខខណ្ឌដោយបង្ខំលើការដោះលែងជនជាប់ចោទ។
នៅក្នុងពេលបច្ចុប្បន្ននេះ ជនជាប់ចោទ អៀង ធីរិទ្ធ មានកាតព្វកិច្ចជូនដំណឹងដល់ អ.វ.ត.ក នូវការផ្លាស់ប្តូរអាសយដ្ឋានស្នាក់នៅបច្ចុប្បន្នរបស់ខ្លួន មិនត្រូវចាកចេញពីព្រះរាជាណាចក្រកម្ពុជា ត្រូវទទួលការពិនិត្យព្យាបាលផ្នែកវេជ្ជសាស្ត្រជារៀងរាល់ប្រាំមួយខែម្តងដោយអ្នកជំនាញផ្នែកវេជ្ជសាស្រ្ត ដែលត្រូវបានចាត់តាំងដោយអង្គជំនុំជម្រះសាលាដំបូង។ អង្គជំនុំជម្រះតុលាការកំពូលបានបង្គាប់ផងដែរថា នគរបាលយុត្តិធម៌ត្រូវធ្វើការត្រួតពិនិត្យជាប្រចាំខែ ដើម្បីបញ្ជាក់ថា ជនជាប់ចោទ អៀង ធីរិទ្ធ ត្រូវបន្តស្នាក់នៅអាសយដ្ឋានដដែលនេះ និងរាយការណ៍អំពីការគម្រាមកំហែងណាមួយចំពោះសុវត្ថិភាពរបស់ជនជាប់ចោទ។ អង្គជំនុំជម្រះតុលាការកំពូលបានសម្រេចបដិសេធផ្នែកផ្សេងៗទៀតនៃបណ្តឹងសាទុក្ខ និងបានសម្រេចប្រគល់លិខិតឆ្លងដែននិងអត្តសញ្ញាណប័ណ្ណទៅឱ្យជនជាប់ចោទវិញ។
ជនជាប់ចោទ អៀង ធីរិទ្ធ ដែលជាអតីតរដ្ឋមន្ត្រីក្រសួងសង្គមកិច្ចនៃរបបកម្ពុជាប្រជាធិបតេយ្យ ត្រូវបានរងការចោទប្រកាន់នៅខែកញ្ញា ឆ្នាំ២០១០ ពីបទឧក្រិដ្ឋកម្មប្រឆាំងមនុស្សជាតិ បទរំលោភដ៏ធ្ងន់ធ្ងរលើអនុសញ្ញាទីក្រុងហ្សឺណែវឆ្នាំ១៩៤៩ និងបទប្រល័យពូជសាសន៍។ ជនជាប់ចោទត្រូវបានរកឃើញថា ពុំមានសម្បទាគ្រប់គ្រាន់ក្នុងការចូលរួមសវនាការ ដោយសារមានជំងឺវង្វេងវង្វាន់ កាលពីខែវិច្ឆិកា ឆ្នាំ ២០១១ ហើយកិច្ចដំណើរការនីតិវិធីជំនុំជម្រះលើរូបគាត់ត្រូវបានផ្អាកចាប់ពីពេលនោះមក។ នៅខែកញ្ញាក្នុងឆ្នាំនេះ អង្គជំនុំជម្រះសាលាដំបូងបានតម្កល់សាជាថ្មីនូវការយល់ឃើញរបស់ខ្លួនពីដំបូងថាជនជាប់ចោទពុំមានសម្បទាចូលរួមសវនាការឡើយ ហើយបានបង្គាប់ដោះលែងដោយឥតលក្ខខណ្ឌ។ សហព្រះរាជអាជ្ញាបានប្តឹងសាទុក្ខទៅលើសេចក្តីសម្រេចនេះ ដោយបានលើកឡើងថា ជាការចាំបាច់ដែលតម្រូវឱ្យមានការអនុវត្តនូវវិធានការមួយចំនួន ដើម្បីធានានូវសុចរិតភាពនៃកិច្ចដំណើរការនីតិវិធី សុវត្ថិភាពរបស់ជនជាប់ចោទ និងសណ្តាប់ធ្នាប់សាធារណៈ។ ដោយរង់ចាំសេចក្តីសម្រេចលើបណ្តឹងសាទុក្ខ នៅថ្ងៃទី១៦ ខែកញ្ញា ប្រធានអង្គជំនុំជម្រះតុលាការកំពូលបានបង្គាប់ឱ្យដោះលែងជនជាប់ចោទ ដោយតម្រូវឱ្យគោរពនូវលក្ខខណ្ឌមួយចំនួន។ ចាប់តាំងពីពេលនោះមក ជនជាប់ចោទស្ថិតក្រោមអ្នកអាណាព្យាបាលដែលជាកូនស្រីរបស់ខ្លួន គឺ លោកស្រី អៀង វិជីដា។