ផ្នែកគ្រប់គ្រងតុលាការ
ផ្នែកគ្រប់គ្រងតុលាការសម្របសម្រួល និងផ្តល់សេវាដល់ការិយាល័យតុលាការ និងអង្គជំនុំជម្រះទាំងអស់។ ផ្នែកគ្រប់គ្រងតុលាការធានាថា ប្រព័ន្ធតុលាការទទួលបានការគាំទ្រផ្នែកសម្ភារៈ បច្ចេកទេស និងរដ្ឋបាលដែលត្រូវការក្នុងដំណើរការក្ដីដោយរលូន។
ផ្នែកគ្រប់គ្រងតុលាការមានច្រើនអង្គភាព ៖
មន្ត្រីគ្រប់គ្រងសំណុំរឿង និងមន្ត្រីតុលាការ
មន្ត្រីគ្រប់គ្រងសំណុំរឿង និងមន្ត្រីតុលាការបង្កើតជា “ការិយាល័យជួរមុខ” នៃផ្នែកនេះ ដោយផ្តល់ការគាំទ្រផ្នែកសម្ភារៈ បច្ចេកទេស និងរដ្ឋបាលដល់ការិយាល័យតុលាការ និងភាគី។ មន្រ្តីគ្រប់គ្រងសំណុំរឿងមានតួនាទីទទួលឯកសារ និងគ្រប់គ្រងសំណុំរឿងដោយមានការសម្របសម្រួលជាមួយក្រឡាបញ្ជី។ មន្ត្រីតុលាការដើរតួជាចំណុចកណ្ដាលរវាងភាគី អង្គជំនុំជម្រះ និងអ្នកចូលរួមផ្សេងទៀតក្នុងដំណើរការនីតិវិធី ដោយធានាថា ការរៀបចំជាក់ស្តែងទាំងអស់ត្រៀមជាស្រេចសម្រាប់ឲ្យដំណើរការសវនាការប្រព្រឹត្តទៅដោយរលូន ។
អង្គភាពសោតទស្សន៍
អង្គភាពសោតទស្សន៍ ធានាថា កិច្ចដំណើរការនីតិវិធី និងការសម្ភាសត្រូវបានកត់ត្រាតាមប្រព័ន្ធឌីជីថលដែលដាក់ចូលទៅក្នុងសំណុំរឿងនីមួយៗ។
អង្គភាពទំនាក់ទំនងមន្ទីរឃុំឃាំង
អង្គភាពទំនាក់ទំនងមន្ទីរឃុំឃាំង ទទួលខុសត្រូវក្នុងការសម្របសម្រួល និងទំនាក់ទំនងជាមួយប្រធានមន្ទីរឃុំឃាំង ក៏ដូចជាអង្គភាពជាតិ និងអន្តរជាតិដែលមានសមត្ថកិច្ច។ អង្គភាពនេះ ធានាថាសិទ្ធិរបស់ជនជាប់ឃុំត្រូវបានគោរពគ្រប់ពេលវេលា ស្របតាមវិធានផ្ទៃក្នុង វិធានស្តីពីការឃុំខ្លួន និងស្តង់ដារអន្តរជាតិ។ អង្គភាពនេះ ក៏ធានាផងដែរថា បញ្ហាទាក់ទងនឹងសុខុមាលភាព សុខភាព និងលក្ខខណ្ឌនៃការឃុំខ្លួនជនជាប់ឃុំត្រូវបានរាយការណ៍ភ្លាមៗទៅកាន់អង្គជំនុំជម្រះវិសាមញ្ញ ហើយមានវិធានការសមស្រប ត្រូវបានអនុវត្តដែរ។
អង្គភាពបកប្រែភាសា
អង្គភាពបកប្រែភាសា មានអ្នកបកប្រែជាជនជាតិខ្មែរ និងបរទេស ដែលធ្វើការជាមួយគ្នាដើម្បីបង្កើតការបកប្រែទៅជាភាសាផ្លូវការទាំងបីរបស់អង្គជំនុំជម្រះវិសាមញ្ញ ៖ ខ្មែរ អង់គ្លេស និងបារាំង។ អ្នកបកប្រែភាសាផ្ទាល់មាត់ផ្តល់ការបកប្រែក្នុងពេលដំណាលគ្នានៃដំណើរការតុលាការ និងការប្រជុំនានា។
អង្គភាពបណ្ណសារ
អង្គភាពបណ្ណសារ ទទួលខុសត្រូវចំពោះដំណើរការ រៀបចំបញ្ជី គ្រប់គ្រង និងរក្សាបណ្ណសាររបស់តុលាការ ដែលរួមមាន គ្រប់សេចក្តីសម្រេច ឯកសារ និងវត្ថុតាងទាំងអស់ នៅចំពោះមុខអង្គជំនុំជម្រះវិសាមញ្ញ។ ដោយសម្របសម្រួលជាមួយ ក្រឡាបញ្ជី និងតាមការណែនាំដោយអង្គជំនុំជម្រះនិងការិយាល័យតុលាការ អង្គភាពបណ្ណសារផ្តល់សិទ្ធិចូលប្រើប្រាស់ដល់អ្នកដែលមានការអនុញ្ញាតចូលប្រើ ។ អង្គភាពនេះ ក៏គ្រប់គ្រងបណ្ណាល័យរបស់ អ.វ.ត.ក. ដែលផ្តល់ឯកសារច្បាប់ និងឯកសារស្រាវជ្រាវ រួមទាំងសៀវភៅ ព្រឹត្តិបត្រ និងមូលដ្ឋានទិន្នន័យច្បាប់ តាមប្រព័ន្ធអ៉ីនធឺណិតឱ្យស្ថាប័នតុលាការ មេធាវី និងអ្នកពាក់ព័ន្ធផ្សេងទៀត។
អង្គភាពប្រតិចារឹក
អង្គភាពប្រតិចារឹកទទួលខុសត្រូវក្នុងការផលិតប្រតិចារឹកតាមពាក្យសំដី (កំណត់ត្រាជាលាយលក្ខណ៍អក្សរ) នៃដំណើរការតុលាការទាំងអស់ ជាភាសាផ្លូវការទាំងបី របស់អង្គជំនុំជម្រះវិសាមញ្ញ។
អង្គភាពគាំពារសាក្សី និងអ្នកជំនាញ
អង្គភាពគាំពារសាក្សី និងអ្នកជំនាញ ផ្តល់ដល់អ្នកដែលចូលរួមក្នុងដំណើរការនីតិវិធីតុលាការនូវសេវាកម្ម ដើម្បីធានាបាននូវបរិយាកាសដែលមានសុវត្ថិភាព និងការគាំទ្រ។ ចុចទីនេះដើម្បីអានបន្ថែមអំពីអង្គភាពគាំពារសាក្សី និងអ្នកជំនាញ។