សាក្សីអាចបដិសេធមិនឆ្លើយសំណួរណាមួយដែលនាំឱ្យដាក់ពិរុទ្ធ (ជាប់ទោស) លើខ្លួនឯង។ សិទ្ធិមិនធ្វើសក្ខីកម្មប្រឆាំងនឹងខ្លួនឯង (ការផ្ដល់ចម្លើយដែលនាំឱ្យខ្លួនជាប់ទោស) ត្រូវអនុវត្តនៅគ្រប់ដំណាក់កាលទាំងអស់នៃដំណើការនីតិវិធី និងក្រោមវិធានផ្ទៃក្នុង ២៨(៩) ហើយ អ.វ.ត.ក. ផ្ដល់មេធាវីមួយរូបទៅឱ្យគាំពារសាក្សី។ អង្គភាពគាំពារសាក្សី និងអ្នកជំនាញ រក្សាបញ្ជីឈ្មោះមេធាវីជាតិប្រចាំការដែលសមស្របតាមលក្ខខណ្ឌតម្រូវដើម្បីធ្វើជាតំណាងផ្ដល់ប្រឹក្សាដល់សាក្សីតាមសំណើសុំ។

ដើម្បីកាត់បន្ថយបន្ទុកចំណាយលើសាក្សីដែលត្រូវបានអញ្ជើញមកកាន់ អ.វ.ត.ក. អង្គភាពគាំពារសាក្សី និងអ្នកជំនាញ បានផ្ដល់ជូននូវប្រាក់ឧបត្ថម្ភថ្លៃអាហារ និងប្រាក់ថ្លៃខាតបង់ការងារ។ សិទ្ធិនេះ គឺផ្អែកលើប្រាក់ចំណូលគិតជាមធ្យម (ផលិតផលក្នុងស្រុកសរុប) របស់បុគ្គលម្នាក់ និងត្រូវបានកំណត់ជាសំណងទូទាត់ដ៏សមរម្យមួយចំពោះប្រាក់ឈ្នួលដែលបង់ខាត ការបាត់ចំណូលសេដ្ឋកិច្ច និងចំណាយផ្សេងៗទៀតនៅកន្លែងដែលសាក្សីរស់នៅសម្រាប់អំឡុងពេលដែលពួកគេមិននៅដោយសារត្រូវអញ្ជើញមកកាន់ អ.វ.ត.ក.។

សាក្សីដែលត្រូវបានស្នើសុំឱ្យធ្វើដំណើរពីបរទេសមកដើម្បីផ្ដល់ចម្លើយ ឬសក្ខីកម្មនៅចំពោះមុខអង្គជំនុំជម្រះវិសាមញ្ញ មានសិទ្ធិទទួលបានប្រាក់ឧបត្ថម្ភបេសកកម្មប្រចាំថ្ងៃ ដើម្បីរ៉ាប់រងលើការចំណាយរបស់បុគ្គលនោះរួមទាំងការស្នាក់នៅ អាហារហូបចុក និងបន្ទុកចំណាយចាំបាច់ផ្សេងទៀត។