អង្គជំនុំជម្រះសាលាដំបូង បើកការជំនុំជម្រះលើមេដឹកនាំជាន់ខ្ពស់នៃរបបកម្ពុជាប្រជាធិបតេយ្យ និងបុគ្គលដែលទទួលខុសត្រូវខ្ពស់បំផុតចំពោះឧក្រិដ្ឋកម្ម និងការរំលោភបំពានធ្ងន់ធ្ងរទៅលើច្បាប់កម្ពុជាក្នុងអំឡុងពេលចាប់ពីថ្ងៃទី១៧ ខែមេសា ឆ្នាំ១៩៧៥ ដល់ថ្ងៃទី៦ ខែមករា ឆ្នាំ១៩៧៩⁵។ អង្គជំនុំជម្រះសាលាដំបូង សម្រេចថា ជនជាប់ចោទត្រូវមានទោស ឬគ្មានទោស ដោយផ្អែកលើភស្តុតាង និងសក្ខីកម្មរបស់សាក្សី និងភាគីដើមបណ្តឹងរដ្ឋប្បវេណី ដែលបានបង្ហាញក្នុងអំឡុងពេលសវនាការ។ ក្នុងការអនុវត្តដែនសមត្ថកិច្ចសាលាដំបូងរបស់ខ្លួន អង្គជំនុំជម្រះសាលាដំបូងប្រើប្រាស់នូវមុខងារផ្សេងៗរបស់សាលាដំបូង ដែលមាននៅក្នុងប្រព័ន្ធតុលាការតាមច្បាប់កម្ពុជា។ អង្គជំនុំជម្រះសាលាដំបូង មានចៅក្រមកម្ពុជាបីរូប (រួមទាំងប្រធាន) និងចៅក្រមបរទេសពីររូប។ សេចក្ដីសម្រេចថាឱ្យជនជាប់ចោទណាម្នាក់ត្រូវមានទោស ត្រូវមានសំឡេងឆ្នោតគាំទ្រភាគច្រើនពីចៅក្រមយ៉ាងតិចបួនរូប⁶។