ប៊ូ ម៉េង - អ.វ.ត.ក.

សាវតារ

ប៊ូ ម៉េង បានផ្តល់សក្ខីកម្មក្នុងនាមជាដើមបណ្តឹងរដ្ឋប្បវេណី ក្នុងសំណុំរឿង ០០១ អំពីការជាប់ពាក់ព័ន្ធរបស់ កាំង ហ្កេកអ៊ាវ “ហៅ ឌុច” នៅមន្ទីរសន្តិសុខ ស-២១ (ហៅ គុកទួលស្លែង) និងរបៀបដែលគេធ្វើទារុណកម្មគាត់នៅទីនោះ¹។ ការសន្និដ្ឋានរបស់អង្គជំនុំជម្រះសាលាដំបូងក្នុងសំណុំរឿង ០០១ ដែលផ្អែកលើសក្ខីកម្មរបស់ ប៊ូ ម៉េង ក៏មានយោងនៅក្នុងសំណុំរឿង ០០២/០២ ផងដែរ²។

មុនពេល និងក្នុងអំឡុងការឃុំខ្លួន ប៊ូ ម៉េង នៅក្នុងមន្ទីរសន្តិសុខ ស-២១

មុនថ្ងៃទី១៧ ខែមេសា ឆ្នាំ១៩៧៥ ប៊ូ ម៉េង បានចូលព្រៃម៉ាគី ដើម្បីធ្វើការរំដោះប្រទេស³។ ក្រោយថ្ងៃទី១៧ ខែមេសា អង្គការបានបញ្ជាគាត់ឲ្យគូររូបឲ្យសិក្ខាកាមនៅសាលាបច្ចេកទេសឬស្សីកែវ⁴។ ពីរ ឬបីខែក្រោយមក នៅពេលដែលក្រុមកម្មាភិបាលមកពីភូមិភាគនិរតីកាន់កាប់សាលានេះ គេបានផ្ទេរគាត់ទៅសហករណ៍តាឡី ជាទីដែលអង្គការបង្ខំគាត់ឲ្យជីកប្រឡាយ ដាំបន្លែ និងធ្វើនង្គ័ល ឧបករណ៍ធ្វើពីឈើ និងរនាស់⁵។ ក្នុងឆ្នាំ១៩៧៧ រូបគាត់ និងប្រពន្ធដើមរបស់គាត់ត្រូវបាននាំមកកាន់មន្ទីរស-២១ ក្រោមលេសថា គាត់ត្រូវបង្រៀនកុមារនៅសាលាវិចិត្រសីល្បៈ⁶។ ប៊ូ ម៉េង និងប្រពន្ធដើមបរបស់គាត់បានមកដល់ ស-២១ គេដាក់ខ្នោះ និងបិទមុខរបស់គាត់ទាំងពីរនាក់⁷។ បន្ទាប់ពីថតរូបពួកគាត់ហើយ⁸ គេឃុំពួកគាត់នៅក្នុងអាគារដាច់ដោយឡែកពីគ្នា⁹។ ប៊ូ ម៉េង ត្រូវគេឃុំនៅក្នុងបន្ទប់ឃុំឃាំងរួម¹⁰ ជាមួយអ្នកជាប់ឃុំ ២០ ទៅ ៤០នាក់¹¹ ដែលនៅទីនោះអ្នកជាប់ឃុំទាំងអស់ត្រូវគេដាក់ខ្នោះជើងភ្ជាប់ទៅនឹងរបាដែកវែងមួយ¹²។ អ្នកជាប់ឃុំខ្មែរ និងបរទេសហូបបបររាវៗពីរពេលក្នុងមួយថ្ងៃ¹³។ ដោយសារតែឃ្លានពេក ប៊ូ ម៉េង ចង់ឲ្យជីងចក់ធ្លាក់ពីលើពិដាន ដើម្បីឲ្យគាត់អាចចាប់វាស៊ី¹⁴។ មិនមានពេទ្យព្យាបាលគ្រប់គ្រាន់ទេ។ គេឲ្យគាត់ងូតទឹកម្តងក្នុងមួយសប្តាហ៍ ដែលនៅពេលនោះអ្នកជាប់ឃុំត្រូវឆ្មាំគុកបាញ់ទឹកស្រោចពីខាងក្រៅ ខណៈឈរស្រាតក្នុងបន្ទប់ឃុំរបស់ខ្លួន¹⁵ ជាញឹកញាប់អ្នកជាប់ឃុំត្រូវបានគេសើចចំអករូបរាងកាយរបស់ពួកគេ¹⁶។ អ្នកជាប់ឃុំត្រូវហាលខោខ្លីរបស់ខ្លួននៅលើកំរាល¹⁷។ អ្នកជាប់ឃុំត្រូវបន្ទោបង់ និងបត់ជើងតូចដាក់ក្នុងកេសគ្រាប់ និងថូជ័រ¹⁸។ ប៊ូ ម៉េង ត្រូវគេនាំទៅកាន់បន្ទប់សួរចម្លើយពីរដងក្នុងមួយថ្ងៃទាំងជាប់ខ្នោះ និងបិទមុខ¹⁹ បន្ទាប់ពីគេដោះខ្នោះ និងស្រាយមុខគាត់ចេញ គេសួរចម្លើយគាត់ថាតើគាត់មានជាប់ពាក់ព័ន្ធជាមួយ សេអ៊ីអា និង កាហ្ស៊េបេ ឬទេ²⁰។ គាត់ដេកថ្កាប់មុខទៅដី ហើយគេវាយគាត់រហូតទាល់តែអ្នកសួរចម្លើយ យល់ថាគាត់ទទួលរងទារុណកម្មគ្រប់គ្រាន់²¹ យូរៗម្តងគេឆក់ខ្សែភ្លើងគាត់រហូតគាត់សន្លប់បាត់ស្មារតី²²។ នៅពេលសួរចម្លើយ ប៊ូ ម៉េង បានឃើញអ្នកទោសត្រូវបានគេចង និងសែងទាំងរស់ដូចសត្វជ្រូក និងបានឮឡានកំពុងរង់ចាំដឹកពួកគេនៅខាងក្រៅ²³។ គាត់មិនដែលឃើញពួកគេត្រឡប់មកវិញទេ²⁴។ ខណៈដែលគាត់កំពុងដេកនៅក្នុងអាគារ គ នៅជាន់ទីបី ក្នុងបន្ទប់ឃុំឃាំងរួម គាត់បានឮសំឡេងស្រែកចេញពី ស-២១²⁵។ នៅចុងឆ្នាំ១៩៧៧ ឬដើមឆ្នាំ១៩៧៨ គេបានដោះលែង ប៊ូ ម៉េង ពីបន្ទប់ឃុំឃាំង និងបានដោះខ្នោះគាត់ ប៉ុន្តែគាត់ត្រូវជាប់ឃុំក្នុង អាគារ ង ក្នុងបរិវេណ ស-២១ ដោយមានអ្នកយាមឃ្លាំមើល²⁶។ គាត់បានគូរូបនៅទីនោះ²⁷ហើយមានពេលម្តងនោះ ឌុច បានបញ្ជាគាត់ឲ្យកែរូបគំនូ ប៉ុល ពត²⁸។ ឌុច បានគំរាមគាត់ថា នឹងយកគាត់ធ្វើជី ប្រសិនបើគាត់គូរូប ប៉ុល ពត មិនបានស្អាតទេនោះ²⁹។ មានពេលមួយ ឌុច បានឲ្យគាត់ និង អៀម ចាន់ វ៉ៃគ្នាទៅវិញទៅមក³⁰។ ប៊ូ ម៉េង បានទទួលរបបអាហារគ្រប់គ្រាន់ក្រោយពេលគេដោះលែងគាត់ តែនៅតែស្ថិតក្នុងភាពភ័យខ្លាច³¹។ អង្គជំនុំជម្រះសាលដំបូងបានផ្អែកលើសក្ខីកម្មរបស់ ប៊ូ ម៉េង ក្នុងការសន្និដ្ឋានអំពីការធ្វើមនុស្សឃាត និងការសម្លាប់រង្គាល³² ការធ្វើឲ្យទៅជាទាសករ³³ ការដាក់ក្នុងមន្ទីរឃុំឃាំង³⁴ ការធ្វើទារុណកម្ម³⁵ និងអំពើអមនុស្សធម៌ផ្សេងៗទៀត³⁶ ដែលជាផ្នែកនៃឧក្រិដ្ឋកម្មប្រឆាំងមនុស្សជាតិប្រព្រឹត្តឡើងនៅក្នុងមន្ទីរសន្តិសុខ ស-២១³⁷។

វីដេអូ

សក្ខីកម្ម
កាលបរិច្ឆេទ	កំណត់ហេតុជាលាយលក្ខណ៍អក្សរនៃកិច្ចដំណើរការនីតិវិធីជំនុំជម្រះ	លេខប្រតិចារិក
ថ្ងៃទី០១ ខែកក្កដា ឆ្នាំ២០០៩	E1/41	E1/41.1

ឯកសារពាក់ព័ន្ធ
ចំណងជើងឯកសារជាភាសាខ្មែរ	ចំណងជើងឯកសារជាភាសាអង់គ្លេស	ចំណងជើងឯកសារជាភាសាបារាំង	លេខឯកសារ D	លេខឯកសារ E3
កំណត់ហេតុនៃការស្តាប់ចម្លើយសាក្សី ប៊ូ ម៉េង	Written Record of Interview of BOU Meng	Procès-verbal de l’entretien de BOU Meng	D2-1	E3/389