ឡិប នាង - អ.វ.ត.ក.

អ្នកស្រី ឡិប នាង ជាជនជាតិចាម ផ្តល់សក្ខីកម្មនៅចំពោះមុខអង្គជំនុំជម្រះសាលាដំបូងក្នុងនាមជាដើមបណ្តឹងរដ្ឋប្បវេណីនៅក្នុងសំណុំរឿង ០០២/០២ អំពីបទពិសោធន៍ការងារដែលគាត់ធ្លាប់ឆ្លងកាត់នៅការដ្ឋាននៅស្រុកតាំកក់ ខេត្តតាកែវ ដោយទីនោះគេឱ្យគាត់ជីកប្រឡាយ និងបង្ខំឱ្យហូបសាច់ជ្រូក²។

គាត់ប្រាប់អង្គជំនុំជម្រះសាលាដំបូង ថា គាត់ត្រូវគេបំបែកចេញពីឪពុកម្តាយ និងបញ្ជូនទៅរស់នៅក្នុងភូមិត្នោតចាងជាមួយបងប្អូន៥នាក់ ក្រោយថ្ងៃទី១៧ ខែមេសា ឆ្នាំ១៩៧៥³។ គាត់និយាយថា សមាជិកក្រុមរបស់គាត់មានគ្នា ១០ នាក់ ត្រូវគេបង្ខំឱ្យជីកដី ១០ ម៉ែត្រគូបក្នុងមួយថ្ងៃ ហើយប្រសិនបើមិនអាចសម្រេចបានតាមផែនការនេះទេ គេបង្ខំឱ្យធ្វើការរហូតដល់យប់ ដើម្បីបញ្ចប់ផែនការនេះ⁴។

អ្នកស្រី ឡិប នាង រស់នៅខេត្តកំពតមុនឆ្នាំ១៩៧៥⁵។ គេប្រាប់គាត់ថា បងរបស់គាត់ឈ្មោះ ឡិប ឡេះ និង ឡិប មើ បាត់ខ្លួនបន្ទាប់ពីគេយកទៅពេទ្យ ដោយសារគ្រុនក្តៅ និងរាកមួល⁶។

គាត់បន្ថែមទៀតថា ប្អូនគាត់ពីរនាក់ឈ្មោះ ឡិប ឡេះ និង ឡិប វី ត្រូវគេយកទៅតាមរទេះសេះ នៅពេលដែលគាត់កំពុងជីកប្រលាយ ហើយ ក៏បាត់ខ្លួនទាំងពីរនាក់។ គាត់និយាយថា គាត់លែងបានឃើញម្តាយរបស់គាត់ឈ្មោះ គង់ ណះ រហូតដល់ថ្ងៃដែលគាត់ផ្តល់សក្ខីកម្មនេះ⁷។

អ្នកស្រី ឡិប នាង លើកឡើងថា “នឹកឃើញនៅតែនឹកឃើញ នៅឈឺចាប់ បាត់ម៉ែ បាត់ឪ បាត់ប្អូន បាត់បង ឈឺចាប់ រហូតឱ្យតែនឹកឃើញឈឺចាប់ៗ”⁸។

អ្នកស្រី ឡិប នាង ក៏រៀបរាប់អំពីករណីដែលកម្មាភិបាលខ្មែរក្រហមមានអាវុធកាន់ ហើយបង្ខំគាត់ ឱ្យហូបសាច់ជ្រូក⁹។

គាត់បញ្ជាក់ថា “គាត់[មេកង] ដឹងៗថា ខ្ញុំអត់ហូបសាច់ជ្រូក។ ដល់គាត់[បង្ខំឱ្យខ្ញុំ]ខំ[ហូប] ឱ្យឈ្លបមកយាមឱ្យខ្ញុំខំ ឱ្យខ្ញុំហូបដាក់ជាមួយបបរឱ្យខ្ញុំហូបសាច់ជ្រូក។ ហើយបងប្អូន [បាត់] អស់ហើយ ខ្ញុំអត់ហ៊ានប្រកែកទេ ខ្ញុំខំហូប ខំលេប។ ខ្លាចទៅបាត់ដូចបង ដូចប្អូន។ [...] ខ្ញុំ ពូជសាសន៍ខ្ញុំគេអត់ហូបអាហ្នឹង ដល់ទៅបង្ខំឱ្យខ្ញុំហូប [...]។ មិនឱ្យខ្ញុំហូប នៅយាម អ‍៊ីចឹង ស្ពាយកាំភ្លើងនៅក្រោយខ្នងខ្ញុំ។ នៅយាមឱ្យខ្ញុំហូបដល់បាន មិនហូប។ អត់ដើរចេញទេ សម្លុតដល់ខ្ញុំឱ្យខ្ញុំហូប។ [...] ដល់បីបួនថ្ងៃអត់ម្ហូបអ‍៊ីចឹង កាប់[ជ្រូក]ហើយ ស្លម្ជូរប្រលឹតអ‍៊ីចឹងទៅ ត្រួយដំឡុងអ‍៊ីចឹងទៅ ជួនកាលបបរបញ្ចូលជាមួយអ‍៊ីចឹងទៅ អត់ម្ហូប កាប់ឱ្យហូប អ‍៊ីចឹងទៅ”¹⁰។

អង្គជំនុំជម្រះសាលាដំបូង រកឃើញថា បក្សកុម្មុយនីស្តកម្ពុជា បានដាក់ការរឹតបន្តឹងលើការប្រតិបត្តិសាសនា និងវប្បធម៌របស់ជនជាតិចាម នៅតាមកន្លែងផ្សេងៗនៅក្នុងប្រទេសកម្ពុជា នៅពេញមួយសម័យកម្ពុជាប្រជាធិបតេយ្យ។ ការរឹតបន្តឹងនេះ រួមមាន ការបង្ខំឱ្យជនជាតិចាម ហូបសាច់ជ្រូកជាដើម¹¹។

វីដេអូ

សក្ខីកម្ម
កាលបរិច្ឆេទ	កំណត់ហេតុជាលាយលក្ខណ៍អក្សរនៃកិច្ចដំណើរការនីតិវិធីជំនុំជម្រះ	លេខប្រតិចារិក
ថ្ងៃទី០២ ខែមេសា ឆ្នាំ២០១៥	E1/288	E1/288.1

ឯកសារពាក់ព័ន្ធ
ចំណងជើងឯកសារជាភាសាខ្មែរ	ចំណងជើងឯកសារជាភាសាអង់គ្លេស	ចំណងជើងឯកសារជាភាសាបារាំង	លេខឯកសារ D	លេខឯកសារ E3
ពាក្យសុំតាំងខ្លួនជាដើមបណ្តឹងរដ្ឋប្បវេណីរបស់ ឡិប នាង 09-VU-03866	Civil party application of LOEP Neang 09-VU-03866	Constitution de partie civile de LOEP Neang 09-VU-03866	D22/3517	E3/5880