សាលាឧទ្ធរណ៍

សភារដ្ឋប្បវេណីនៃសាលាឧទ្ធរណ៍មានសមត្ថកិច្ចជំនុំជម្រះលើបណ្ដឹងឧទ្ធរណ៍ចំពោះសាលក្រមរដ្ឋប្បវេណី ឬបណ្ដឹងជំទាស់ចំពោះដីកាសម្រេចពីតុលាការរដ្ឋប្បវេណីនៃសាលាដំបូង និងរឿងក្ដីដទៃទៀតដែលស្ថិតក្នុងដែនសមត្ថកិច្ចរបស់ខ្លួន⁶។ ចៅក្រមបីរូប ដែលមួយរូបជាប្រធាន នឹងប្រជុំពិភាក្សានៅចំពោះមុខសភារដ្ឋប្បវេណី⁷។

សភាព្រហ្មទណ្ឌនៃសាលាឧទ្ធរណ៍ មានសមត្ថកិច្ចជំនុំជម្រះលើបណ្ដឹងឧទ្ធរណ៍ចំពោះសាលក្រមព្រហ្មទណ្ឌ ពីតុលាការព្រហ្មទណ្ឌនៃសាលាដំបូង និងរឿងក្ដីផ្សេងទៀតដែលស្ថិតក្នុងដែនសមត្ថកិច្ចរបស់ខ្លួនយោងតាមក្រមនីតិវិធីព្រហ្មទណ្ឌ⁸។ សភានេះមានសមាសភាពចៅក្រមបីរូប⁹។

សភាស៊ើបសួរនៃសាលាឧទ្ធរណ៍មានសមត្ថកិច្ចជំនុំជម្រះលើបណ្ដឹងឧទ្ធរណ៍ចំពោះកិច្ចស៊ើបសួរ ឬដីកាសម្រេចនានារបស់ចៅក្រមស៊ើបសួរ និងរឿងក្ដីផ្សេងទៀតដែលស្ថិតក្នុងដែនសមត្ថកិច្ចរបស់ខ្លួន¹⁰។ ចៅក្រមបីរូប ដែលមួយរូបជាប្រធាន ប្រជុំពិភាក្សានៅចំពោះមុខសភាស៊ើបសួរ¹¹។

សភាពាណិជ្ជកម្មនៃសាលាឧទ្ធរណ៍មានសមត្ថកិច្ចជំនុំជម្រះលើបណ្ដឹងឧទ្ធរណ៍ចំពោះសាលក្រមពាណិជ្ជកម្ម ឬដីកាសម្រេចនានារបស់តុលាការពាណិជ្ជកម្មនៃសាលាដំបូង¹²។ នៅពេលបង្កើតសភានេះឡើង សំណុំរឿងក្ដីផ្សេងៗចំពោះសភាពាណិជ្ជកម្ម នឹងត្រូវប្រគល់ឱ្យចៅក្រមបីរូបដែលមួយរូបជាប្រធាន អមដោយទីប្រឹក្សាពីររូបទៀតទៀតជាពាណិជ្ជករ ឬអ្នកជំនាញផ្នែកច្បាប់ស្ដីពីពាណិជ្ជកម្ម ដើម្បីធ្វើការជំនុំជម្រះ¹³។

សភាការងារនៃសាលាឧទ្ធរណ៍មានសមត្ថកិច្ចជំនុំជម្រះលើបណ្ដឹងឧទ្ធរណ៍ចំពោះសាលក្រម ឬបណ្ដឹងជំទាស់ដីកាសម្រេចនានារឿងក្ដីវិវាទការងាររបស់តុលាការការងារនៃសាលាដំបូង¹⁴។នៅពេលបង្កើតសភានេះឡើង សំណុំរឿងក្ដីផ្សេងៗចំពោះសភាការងារ នឹងត្រូវប្រគល់ឱ្យចៅក្រមបីរូប (មួយរូបជាប្រធាន) អមដោយទីប្រឹក្សាពីររូបទៀត ដោយមួយរូបជានិយោជក និងមួយរូបទៀតជានិយោជិត ដើម្បីធ្វើការជំនុំជម្រះ។