សាលាដំបូង

តុលាការរដ្ឋប្បវេណីនៃសាលាដំបូងមានសមត្ថកិច្ចលើសំណុំរឿងក្ដីរដ្ឋប្បវេណី និងសំណុំរឿងក្ដីផ្សេងៗដែលតាម ច្បាប់មិនចាត់ទុកថាស្ថិតនៅក្រោមដែនសមត្ថកិច្ចនៃតុលាការជំនាញផ្សេងទៀត⁶។ ករណីនេះរួមមានសំណុំរឿងដែលទាក់ទងនឹងវិវាទការងារ និងពាណិជ្ជកម្ម។

តុលាការព្រហ្មទណ្ឌនៃសាលាដំបូង មានសមត្ថកិច្ចលើរាល់សំណុំរឿងក្ដីព្រហ្មទណ្ឌទាំងអស់ដែលស្ថិតក្នុងដែនសមត្ថកិច្ចរបស់ខ្លួន លុះត្រាតែមានចែងដោយច្បាប់⁷។ តុលាការព្រហ្មទណ្ឌនៃសាលាដំបូងរួមមានផ្នែកស៊ើបសួរ ដែលដឹកនាំការងារស៊ើបសួរ⁸។ ចៅក្រមស៊ើបសួរដែលជាអ្នកធ្វើការស៊ើបសួរលើសំណុំរឿងក្ដីព្រហ្មទណ្ឌទាំងឡាយ ចាត់តាំងដោយប្រធានសាលាដំបូង។

តុលាការពាណិជ្ជកម្មនៃសាលាដំបូង មានសមត្ថកិច្ចជំនុំជម្រះលើសំណុំរឿងក្ដីពាណិជ្ជកម្មទាំងអស់រួមមានរឿងក្ដីក្ស័យធនក្នុងពាណិជ្ជកម្មជាដើម⁹។ គិតត្រឹមឆ្នាំ២០២២ តុលាការពាណិជ្ជកម្មនៃសាលាដំបូង មិនទាន់បានបង្កើតឡើងនៅឡើយ។

តុលាការការងារនៃសាលាដំបូង មានសមត្ថកិច្ចជំនុំជម្រះលើសំណុំរឿងក្ដីវិវាទការងារដោយអនុលោមតាមបទប្បញ្ញត្តិស្ដីពីនីតិវិធីការងារ¹⁰។ គិតត្រឹមឆ្នាំ២០២២ តុលាការការងារនៃសាលាដំបូង មិនទាន់បានបង្កើតឡើងនៅឡើយ។

តុលាការយោធា ស្ថិតនៅរាជធានីភ្នំពេញ មានសមត្ថកិច្ចជំនុំជម្រះលើបទអាជ្ញារបស់មន្ត្រីយោធា ឧទាហរណ៍ បទឧក្រិដ្ឋចំពោះបុគ្គល និងទ្រព្យសម្បត្តិ¹¹។ តុលាការយោធា ជាស្ថាប័នឯករាជ្យស្ថិតក្រោមចំណុះរបស់ក្រសួងការពារជាតិ¹²។ សមាសភាពតុលាការយោធារួមមាន ប្រធានមួយរូប អនុប្រធានមួយរូប និងចៅក្រមមួយរូប។ រាល់ដីកាសម្រេចរបស់តុលាការយោធា អាចប្ដឹងឧទ្ធរណ៍ទៅកាន់សាលាឧទ្ធរណ៍បាន។