មជ្ឈមណ្ឌលធនធាន អ.វ.ត.ក.ចល័ត ឬរថយន្ដក្រុង អ.វ.ត.ក.ចល័ត បានផ្សព្វផ្សាយអំពីសមិទ្ធផលរបស់សាលាក្ដីខ្មែរក្រហមដល់សិស្ស និស្សិតប្រមាណ២២០នាក់ មកពីក្រុងព្រៃវែង ខេត្តព្រៃវែង នាថ្ងៃទី២៦ ខែមិថុនា ឆ្នាំ២០២៤ នៅក្នុងបរិវេណវិមានឈ្នះ ឈ្នះ។
សូមជម្រាបថា នៅថ្ងៃទី២៦ ខែមិថុនា នេះ សាលាក្ដីខ្មែរក្រហមបានរៀបចំកម្មវិធីទស្សនកិច្ចសិក្សាជូនសិស្ស និស្សិតប្រមាណ២២០នាក់ មកពីវិទ្យាស្ថានក្រុងអង្គរ វិទ្យាល័យចម្រើនវិជ្ជា និងវិទ្យាល័យ ហ៊ុន សែន កំពង់លាវ ក្នុងក្រុងព្រៃវែង ខេត្តព្រៃវែង ដើម្បីទៅសិក្សាស្វែងយល់អំពីប្រវត្តិសាស្ដ្រនៅក្នុងវិមានឈ្នះ ឈ្នះ សារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលប្រល័យពូជសាសន៍ជើងឯក។
នៅក្នុងដំណើរទស្សនកិច្ចសិក្សានោះ ដំបូងយុវជនទាំងអស់បានស្ដាប់បទបង្ហាញយ៉ាងក្បោះក្បាយពីមគ្គុទេសក៍ជំនាញរបស់វិមានឈ្នះ ឈ្នះ តាមរយៈរឿងរ៉ាវដែលត្រូវបានចងក្រងឡើងនៅក្នុងវិមាន អំពីប្រវត្តិនៃការតស៊ូរបស់ឥស្សរជនកម្ពុជាក្នុងការពលី តស៊ូរំដោះប្រទេសជាតិពីរបបប្រល័យពូជសាសន៍ ប៉ុល ពត ការបង្រួបបង្រួមជាតិ និងការនាំយកសន្ដិភាពសម្រាប់ប្រទេសកម្ពុជារហូតមកដល់សព្វថ្ងៃនេះ។
បន្ទាប់មក យុវជនទាំងអស់បានចូលទស្សនាមជ្ឈមណ្ឌលធនធាន អ.វ.ត.ក.ចល័ត ដើម្បីស្វែងយល់អំពីសមិទ្ធផលរបស់សាលាក្ដីខ្មែរក្រហមតាមរយៈការស្ដាប់បទបង្ហាញអំពីដំណើរការជំនុំជម្រះក្ដី និងវិធីសាស្ដ្រចូលទៅអាន ស្រាវជ្រាវឯកសារ និងទស្សនាវីដេអូរឯកសារនៅក្នុងបណ្ណសាររបស់ អ.វ.ត.ក.។ បន្ទាប់ពីបញ្ចប់កម្មវិធីស្វែងយល់ពីវិមានឈ្នះ ឈ្នះ និងកេរដំណែលរបស់សាលាក្ដីខ្មែរក្រហម សិស្ស និស្សិតទាំងនោះត្រូវបាននាំយកទៅទស្សនកិច្ចសិក្សាបន្ដនៅក្នុងសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលប្រល័យពូជសាសន៍ជើងឯក ដើម្បីស្វែងយល់អំពីស្លាកស្នាម និងសោកនាដកម្មរបស់ប្រជាជនកម្ពុជាដែលទទួលរងគ្រោះនៅក្នុងរបបខ្មែរក្រហម។
ព្រះតេជគុណ គង់ សុភី សមណនិស្សិតឆ្នាំទី៣ នៃវិទ្យាស្ថានក្រុងអង្គរ មានសង្ឃដីកាថា ទស្សនកិច្ចសិក្សានេះពិតជាមានសារៈសំខាន់ណាស់សម្រាប់យុវជនជំនាន់ក្រោយ ក្នុងការស្វែងយល់អំពីប្រវត្តិសាស្ដ្រកម្ពុជា។ ព្រះតេជគុណមានសង្ឃដីកាបន្ដថា ក្នុងដំណើរទស្សនកិច្ចសិក្សារយៈពេលមួយថ្ងៃនេះ យុវជនអាចទទួលបានចំណេះដឹងយ៉ាងច្រើនទាក់ទងនឹងប្រវត្តិសាស្ដ្រកម្ពុជា ដែលវានឹងជួយឱ្យពួកគេយល់ច្បាស់អំពីតម្លៃនៃសន្ដិភាព និងចូលរួមទប់ស្កាត់ការកកើតឡើងវិញនូវអំពើប្រល័យពូជសាសន៍ដូចរបបខ្មែរក្រហម។
សូមបញ្ជាក់ថា មជ្ឈមណ្ឌលធនធាន អ.វ.ត.ក. ចល័ត ឬរថយន្ដក្រុង អ.វ.ត.ក. ចល័ត គឺជាផ្នែកមួយនៃការពង្រីកវិសាលភាពរបស់មជ្ឈមណ្ឌលធនធានរបស់សាលាក្ដីខ្មែរក្រហម។ រថយន្ដក្រុង អ.វ.ត.ក. ចល័តនេះ នឹងធ្វើដំណើរផ្សព្វផ្សាយព័ត៌មានអំពីសមិទ្ធផល និងកេរដំណែលនៃការជំនុំជម្រះក្ដីនៅក្នុងសាលាក្ដីខ្មែរក្រហមទៅកាន់ដើមបណ្តឹងរដ្ឋប្បវេណី សិស្ស និស្សិត យុវជន និងប្រជាជនទូទៅដែលរស់តាមបណ្ដាខេត្តក្រុងនានានៃប្រទេសកម្ពុជា ដើម្បីជួយជម្រុញដល់ការចងចាំ ការចូលរួមទប់ស្កាត់ការវិលត្រឡប់មកវិញនូវអំពើឃោរឃៅដូចក្នុងរបបខ្មែរក្រហ និងយល់ដឹងពីតម្លៃនៃសន្ដិភាពដែលកម្ពុជាកំពុងទទួលបាន៕
