នៅរសៀលថ្ងៃសុក្រ ទី៥ ខែកក្កដា ឆ្នាំ២០២៤ លោក Jean Pierre Lacroix អគ្គលេខាធិការរងអង្គការសហប្រជាជាតិ ទទួលបន្ទុកផ្នែករក្សាសន្តិភាព បានអញ្ជើញមកបំពេញទស្សនកិច្ចនៅមជ្ឈមណ្ឌលធនធាន អ.វ.ត.ក. ដើម្បីស្វែងយល់អំពីសមិទ្ធផលនៃការជុំនុំជម្រះក្ដីរបស់សាលាក្ដីខ្មែរក្រហម ដែលជាផ្នែកចុងក្រោយនៃការស្វែងរកសន្ដិភាពនៅកម្ពុជា។ ដំណើរទស្សនកិច្ចនេះទទួលបានការស្វាគមន៍យ៉ាងកក់ក្ដៅពីឯកឧត្តម ក្រាញ់ តូនី រដ្ឋលេខាទីស្ដីការគណៈរដ្ឋមន្ដ្រី និងជាប្រធានរដ្ឋបាលស្តីទី អ.វ.ត.ក. លោក ឃ្នុត រ៉ូហ្សិនហ៊ក អនុប្រធានរដ្ឋបាល និងឯកឧត្តម ថោង សុជាតិ មន្ដ្រីគ្រប់គ្រងជាន់ខ្ពស់នៃ អ.វ.ត.ក.។
ឯកឧត្តម ក្រាញ់ តូនី ប្រធានរដ្ឋបាលស្ដីទី អ.វ.ត.ក. បានជម្រាបលោក Jean Pierre Lacroix អំពីសមិទ្ធផលពីការជំនុំជម្រះក្ដីលើអតីតមេដឹកនាំជាន់ខ្ពស់ និងអ្នកទទួលខុសត្រូវលើឧក្រិដ្ខកម្មក្នុងរបបខ្មែរក្រហម ការអនុវត្តមុខងារសេសសល់របស់ អ.វ.ត.ក. ដែលរួមមាន ដំណើរការធ្វើចំណាត់ថ្នាក់ឯកសារឡើងវិញ ការរៀបចំគ្រប់គ្រងបណ្ណសារ ការបង្ហាញអំពីមជ្ឈមណ្ឌលធនធាន និងសកម្មភាពផ្សព្វផ្សាយយ៉ាងផុសផលរបស់ អ.វ.ត.ក. ដល់យុវជនជំនាន់ក្រោយ និងសាធារណៈជននៅក្នុងប្រទេសកម្ពុជា។
លោក Jean Pierre Lacroix អគ្គលេខាធិការរងអង្គការសហប្រជាជាតិ បានស្ងើចសរសើរចំពោះសមិទ្ធផល និងការងាររបស់ អ.វ.ត.ក. ដែលកំពុងសម្រេចបាន។ លោកបានលើកឡើងថា ដំណើរការកាត់សេចក្តីរបស់ អ.វ.ត.ក. បានបន្សល់ទុកនូវកេរដំណែលដ៏សំខាន់ និងមានគុណតម្លៃខ្ពស់ក្នុងការថែរក្សាសន្តិភាព ការបង្រួបបង្រួមជាតិ និងយុត្តិធម៌ទាំងក្នុងកម្រិតជាតិ និងអន្តរជាតិ។ បើតាមការបញ្ជាក់ពីអគ្គលេខាធិការរងអង្គការសហប្រជាជាតិរូបនេះ លទ្ធផលនៃ អ.វ.ត.ក. ក៏បានឆ្លុះបញ្ចាំងឱ្យឃើញជាក់ស្តែងនូវសមិទ្ធផលនៃគោលនយោបាយឈ្នះ ឈ្នះ របស់រាជរដ្ឋាភិបាល ដែលរក្សាបាននូវសុខសន្តិភាពជូនប្រជាពលរដ្ឋនៅទូទាំងប្រទេស ការផ្សះផ្សាជាតិនៅតាមមូលដ្ឋាន ការផ្តល់យុត្តិធម៌ដល់ជនរងគ្រោះនៃរបបខ្មែរក្រហម ការចងចាំ និងការទប់ស្កាត់ការវិលត្រលប់មកវិញនៃរបបប្រល័យពូជសាសន៍។
លោក Jean Pierre Lacroix ក៏បានវាយតម្លៃខ្ពស់ចំពោះការរៀបចំមជ្ឈមណ្ឌលធនធាន អ.វ.ត.ក.ផងដែរ ដែលលោកបញ្ជាក់ថា មជ្ឈមណ្ឌលធនធាននេះនឹងដើរតួនាទីសំខាន់ក្នុងការបម្រើការងារផ្សព្វផ្សាយ និងស្រាវជ្រាវពីសមិទ្ធផល អ.វ.ត.ក. ការចែករំលែកបទពិសោធន៍ផ្នែកតុលាការក្នុងការស្វែងរកយុត្តិធម៌ដល់ជនរងគ្រោះនៃរបបខ្មែរក្រហម ការអប់រំ និងការចងចាំងអំពីការជំនុំជម្រះក្ដី ការផ្សះផ្សារជាតិ និងការកសាងសន្ដិភាពរបស់កម្ពុជា។ អគ្គលេខារងអង្គការសហប្រជាជាតិរូបនេះបានបញ្ជាក់ថា ការបង្រួមបង្រួមជាតិ ការកសាងសន្ដិភាព និងការផ្តល់យុត្តិធម៌ នឹងត្រូវបន្តតាមរយៈការខិតខំទាំងអស់គ្នា ក្នុងការអប់រំនិងការផ្សព្វផ្សាយ ដើម្បីបង្ការនូវការត្រលប់មកវិញនូវរបបប្រល័យពូជសាសន៍៕
