នៅវិទ្យាល័យព្រះស៊ីសុវត្ថិដែលស្ថិតនៅតាមបណ្តោយមហាវិថីព្រះនរោត្តម តាមទម្លាប់ សិស្សមកជួបជុំគ្នានៅទីលានគោរពទង់ជាតិមុខទីចាត់ការសាលា នៅវេលាម៉ោង៧ព្រឹកដើម្បីគោរពទង់ជាតិ មុនពេលចូលថ្នាក់រៀន។ ប៉ុន្តែព្រឹកនេះ (ថ្ងៃទី២១ ខែមីនា) សិស្សប្រមាណជិត ៥.០០០នាក់ ចាប់ពី ថ្នាក់ទី៧ដល់ទី១២ ពុំបានចូលថ្នាក់រៀនបន្ទាប់ពីគោរពទង់ជាតិទេ។ ពួកគេនៅបន្តឈរនិងអង្គុយនៅ ទីលានគោរពទង់ជាតិ ដើម្បីស្តាប់បទឧទ្ទេសនាមរបស់មន្ត្រីមកពីអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក ឬប្រជាជនស្គាល់ជាទូទៅថាជា សាលាក្តីខ្មែរក្រហម)។
លោក រាជ សម្បត្តិ និងលោក ឡាស អូលសិន មន្រ្តីផ្នែកកិច្ចការសាធារណៈនៃសាលាក្តីខ្មែរក្រហម ផ្តល់បទឧទ្ទេសនាមដល់សិស្សវិទ្យាល័យស៊ីសុវត្ថិនៅព្រឹកនេះ អំពីប្រវត្តិសាស្ត្រនៃរបបខ្មែរក្រហម អំពីសាលាក្តីខ្មែរក្រហម និងអំពីសារសំខាន់នៃការចូលរួមរបស់អង្គការសហប្រជាជាតិក្នុងដំណើរការនេះ។
គួររំឭកថា អតីតមេដឹកនាំខ្មែរក្រហមពីរនាក់ក្នុងចំណោមមេខ្មែរក្រហមទាំងបួននាក់ដែលជាប់ចោទ ក្នុងសំណុំរឿងក្តី ០០២ គឺ អៀង សារី និងភរិយារបស់គាត់ អៀង ធិរិទ្ធ ធ្លាប់បានសិក្សានៅវិទ្យាល័យ ស៊ីសុវត្ថិ មុនពេលដែលអ្នកទាំងពីរទៅរៀននៅប្រទេសបារាំង។ មិនតែប៉ុណ្ណោះ ក្រោយពេលវិលត្រឡប់ មកពីសិក្សានៅប្រទេសបារាំងវិញ អ្នកទាំងពីរបានបង្រៀននៅសាលានេះ គឺ អៀង សារី បានបង្រៀន មុខវិជ្ជាប្រវត្តិសាស្រ្ត ហើយ អៀង ធិរិទ្ធ បានបង្រៀនមុខវិជ្ជាភាសាអង់គ្លេស។
មិនចាញ់សិស្សថ្នាក់ធំៗប៉ុន្មានទេ សិស្សថ្នាក់ទី៩ម្នាក់សួរថា “តើការកាត់ក្តីមេដឹកនាំខ្មែរក្រហមនឹង បញ្ចប់នៅពេលណា? តើត្រូវការរយៈពេលប៉ុន្មានសម្រាប់តុលាការនេះ?”
ការឆ្លើយសំណួរយករង្វាន់អាវយឺត និងការចែកកូនសៀវភៅ “សេចក្តីណែនាំអំពីអង្គជំនុំជម្រះ វិសាមញ្ញក្នុងតុលាការកម្ពុជា”បានបង្កើតបរិយាកាសដល់សិស្ស។
ប្អូនស្រី សេង តារាគន្ធា អាយុ១៧ឆ្នាំ រៀនថ្នាក់ទី១២ M2 បានឲ្យដឹងបន្ទាប់ពីកម្មវិធីបានបញ្ចប់ថា “ការដែលមន្ត្រីនៅតុលាការខ្មែរក្រហមមកនិយាយនៅពេលនេះពិតជាសំខាន់ណាស់ ជាពិសេសចំពោះ សិស្សថ្នាក់ទី ១២ ដូចជាពួកខ្ញុំ ព្រោះជាឆ្នាំប្រឡង។ ពួកខ្ញុំកើតក្រោយរបបខ្មែរក្រហម និងមិនសូវ មានការយល់ដឹងប៉ុន្មានទេទាក់ទិននឹងប្រធានបទនេះ។ វាជាការសំខាន់ណាស់ដែលយុវជនជំនាន់ ក្រោយដូចជាខ្ញុំត្រូវតែយល់ដឹងអំពីប្រវត្តិសាស្រ្តនៃរបបនេះ ដើម្បីកុំឲ្យយកតម្រាប់តាមមេដឹកនាំ ខ្មែរក្រហមទាំងនោះដែលកាប់សម្លាប់ប្រជាជន។” ប្អូនស្រី គន្ធា ដែលមានបំណងក្លាយជាមេធាវីនា ពេលអនាគត បានបន្ថែមថាប្អូនចង់មកមើលការកាត់ក្តីដោយផ្ទាល់។ “ខ្ញុំមានបំណងទៅមើលកន្លែង កាត់ក្តី និងចង់មើលការកាត់ក្តីដោយផ្ទាល់ភ្នែក ដើម្បីយល់ច្បាស់អំពីវិធីកាត់ក្តីនៅក្នុងតុលាការ ខ្មែរក្រហម។”
ដូចជាមិត្តរួមថ្នាក់របស់ប្អូនដែរ ប្អូនស្រី ហេង ស៊ូឌី បានបញ្ចេញយោបល់ថា “ការដែលគាត់ចុះមក និយាយប្រាប់ដោយផ្ទាល់បែបនេះគឺសំខាន់ណាស់ ព្រោះតាមស្ថានភាពពិត យុវវ័យសម័យឥឡូវមិនសូវ ចូលចិត្តអានឯកសារទេ។ ខ្ញុំធ្លាប់មើលការកាត់ក្តីតាមទូរទស្សន៍ខ្លះៗដែរ ប៉ុន្តែពុំសូវជាយល់ប៉ុន្មានទេ ពេលគាត់ចុះមកផ្ទាល់ដូច្នេះធ្វើឲ្យខ្ញុំយល់បានប្រហែល៨០ភាគរយ។ បន្ទាប់ពីបានស្តាប់គាត់នៅ ពេលនេះ ធ្វើឲ្យខ្ញុំចង់ទៅមើលការកាត់ទោសដោយផ្ទាល់ដែរ។ ម្យ៉ាងទៀត ឯកសារដែលគាត់យកមក ចែកជូននៅពេលនេះមានប្រយោជន៍ឲ្យខ្ញុំដឹងពីព័ត៌មានពិស្តារមួយចំនួនទៀតសម្រាប់យកទៅប្រឡង ឆមាសនិងប្រឡងថ្នាក់ជាតិ ដែលខ្ញុំដឹងថានឹងមានសំណួរអំពីប្រវត្តិសាស្ត្រនៃរបបខ្មែរក្រហម។”
ដោយឡែក ប្អូនប្រុស ញ៉ែម រិទ្ធី អាយុ១៧ឆ្នាំ រៀននៅថ្នាក់ទី១១ បានបញ្ចេញឲ្យដឹងថា បន្ទាប់ពី បទឧទ្ទេសនាមនេះ ប្អូនអាចយល់បានថា ធ្វើជាអ្នកដឹកនាំគួរធ្វើអ្វីនិងមិនគួរធ្វើអ្វី។ “ខ្ញុំធ្លាប់អានឯកសារខ្លះៗ និងបានមើលទូរទស្សន៍ខ្លះៗដែរ ប៉ុន្តែពុំសូវជាយល់ប៉ុន្មានទេ។ អ្វីដែលខ្ញុំបានស្តាប់ព្រឹកមិញនេះ គឺជាព័ត៌មានបន្ថែមឲ្យពួកខ្ញុំយល់បានច្បាស់ជាងមុន។ ប្រសិនបើពុំមានគាត់ចុះមកនិយាយប្រាប់ដោយ ផ្ទាល់បែបនេះទេ ពួកខ្ញុំពុំមានព័ត៌មានបន្ថែមទេ។ ខ្ញុំយល់ថា ក្មេងជំនាន់ក្រោយដូចពួកខ្ញុំត្រូវតែដឹងអំពី រឿងនេះ ព្រោះរឿងនេះបានកើតឡើងលើឪពុកម្តាយរបស់ពួកខ្ញុំ ហើយពួកខ្ញុំគួរតែដឹងថាតើពេលដែល មេដឹកនាំប្រព្រឹត្តខុស ពួកគេនឹងត្រូវកាត់ទោសរបៀបណា។”
លោក រាជ សម្បត្តិ ប្រធានផ្នែកកិច្ចការសាធារណៈនៃ អ.វ.ត.ក បានសម្តែងក្តីពេញចិត្តនឹងរីករាយ ចំពោះសកម្មភាពព្រឹកនេះ។ លោកមានប្រសាសន៍ថា “រាល់ពេលដែលខ្ញុំបានជួបកូនសិស្សក្នុងកម្មវីធី បែបនេះ ខ្ញុំសប្បាយចិត្តណាស់។ សិស្សទាំងនេះកើតក្រោយរបបខ្មែរក្រហម ដូច្នេះការអប់រំពួកគេឲ្យ យល់អំពីរបបខ្មែរក្រហមនិងអំពីតុលាការខ្មែរក្រហម គឺមានសារសំខាន់ ដើម្បីកុំឲ្យពួកគេប្រព្រឹត្តដូចជា មេដឹកនាំខ្មែរក្រហម។ យុវសិស្សទាំងនេះប្រៀបបានដូចជាក្រដាសសស្អាត បើយើងអប់រំពួកគេបានល្អ ពួកគេនឹងក្លាយជាមនុស្សល្អទៅថ្ងៃក្រោយ។ ប៉ុន្តែបើយើងអប់រំពួកគេមិនបានល្អ ពួកគេនឹងដើរផ្លូវខុស។ ដោយឡែកសម្រាប់វិទ្យាល័យព្រះស៊ីសុវត្ថិ ខ្ញុំធ្លាប់រៀននៅទីនេះក្នុង អំឡុងទសវត្សរ៍ឆ្នាំ១៩៨០ និងមាន អនុស្សាវរីយ៍ជាច្រើននៅទីនេះ។ ខ្ញុំសប្បាយចិត្តដែលបានវិលត្រឡប់មកទីនេះម្តងទៀតនិងផ្តល់មេរៀន អំពីតុលាការខ្មែរក្រហមដល់សិស្សជំនាន់ក្រោយ។ ខ្ញុំសង្ឃឹមថា សិស្សទាំងនេះនឹងក្លាយជាមនុស្សល្អនៅថ្ងៃអនាគត”៕