“សាលាក្តីខ្មែរក្រហមតែឯងមិនអាចជំរុញឲ្យមានការផ្សះផ្សាដែលត្រូវការចាំបាច់សម្រាប់ព្យាបាលរបួសពីអតីតកាលឡើយ។ ដូច្នេះ ខ្ញុំព្រះករុណាសង្ឃឹមថា ព្រះថេរានុថេរៈគ្រប់ព្រះអង្គដែលជាព្រះសង្ឃ ដែលជាទីគោរពរបស់ប្រជាជនកម្ពុជា នឹងជួយបំពេញបន្ថែមទៅលើដំណើរការរបស់តុលាការដោយការជួយឲ្យមានការផ្សះផ្សារវាងជនរងគ្រោះនិងជនដៃដល់”។ នេះជាប្រសាសន៍របស់លោក ឃ្នុត រ៉ូសិនហក អនុប្រធានការិយាល័យរដ្ឋបាលនៃ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នៅក្នុងបទសុន្ទរកថាថ្លែងទៅកាន់ព្រះសង្ឃចំនួនជាង ៤០០អង្គ នៅឯពុទ្ធិកសាកលវិទ្យាល័យព្រះសីហនុរាជ នៅថ្ងៃទី៩ ខែសីហា ឆ្នាំ២០១១។
ឯកឧត្តម ក្រាញ់ តូនី ប្រធានរដ្ឋបាលស្តីទីនៃ អ.វ.ត.ក បានជម្រាបជូនអង្គប្រជុំអំពីការវិវឌ្ឍថ្មីៗនៃសាលាក្តីខ្មែរក្រហម និងការវិវឌ្ឍនៃការបង្កើតតុលាការដើម្បីដោះស្រាយឧក្រិដ្ឋកម្មព្រហ្មទណ្ឌអន្តរជាតិចាប់តាំងពីក្រោយសង្គ្រាមលោកលើកទី២រហូតដល់ពេលបង្កើត អ.វ.ត.ក។ ដោយឡែក ឯកឧត្តម មិន ឃិន រដ្ឋមន្ត្រីក្រសួងធម្មការនិងសាសនា បានអបអរសាទ អ.វ.ត.ក ចំពោះសមិទ្ធិផលដែលសម្រេចបានរយៈពេលកន្លងមក និងចែករំលែកបទពិសោធន៍និងការចងចាំអំពីរបបខ្មែរក្រហម។
អង្គប្រជុំក៏បានស្តាប់អំពីបទចោទប្រកាន់ពាក់ព័ន្ធនឹងការរើសអើងដោយមូលហេតុសាសនា នៅក្នុងសំណុំរឿង ០០២ នៅ អ.វ.ត.ក។ ដីកាដំណោះស្រាយនៃសំណុំរឿង ០០២ បានលើកឡើងអំពីការប្រព្រឹត្តរបស់របបកម្ពុជាប្រជាធិបតេយ្យ មកលើអ្នកប្រតិបត្តិព្រះពុទ្ធសាសនា។
យោងតាមដីកាដំណោះស្រាយ អ្នកប្រតិបត្តិព្រះពុទ្ធសាសនាបានក្លាយជាមុខសញ្ញានៃការកម្ទេចរបស់របបកម្ពុជាប្រជាធិបតេយ្យ។ បក្សកុម្មុយនីស្តកម្ពុជាត្រូវបានយល់ឃើញថាបានអនុវត្តគោលការណ៍រើសអើងចំពោះព្រះពុទ្ធសាសនានិងការគោរពប្រតិបត្តិសាសនានេះ។ មានការជឿជាក់ថា ព្រះសង្ឃជាច្រើនអង្គត្រូវធ្វើគត់ក្នុងអំឡុងពេលជម្លៀសប្រជាជនចេញពីទីក្រុងនិងទីប្រជុំជននៅខែមេសាឆ្នាំ១៩៧៥។ វត្តអារាមនិងទីកន្លែងសក្ការៈបូជាជាច្រើនត្រូវបានបំផ្លិចបំផ្លាញ ឬប្រើប្រាស់សម្រាប់គោលបំណងផ្សេងទៀត ដូចជា ប្រែក្លាយជាមន្ទីរសន្តិសុខ ជាទ្រុងជ្រូក ជារោងបាយរួម ជាមន្ទីរពេទ្យ ឬជាឃ្លាំងដាក់ឥវ៉ាន់។ រូបសំណាកព្រះពុទ្ធរូបត្រូវបានវាយកម្ទេច ហើយសូម្បីតែការអុជទៀនធូបក៏ត្រូវបានហាមប្រាម។ ព្រះសង្ឃនិងដូនជីតាជីស្ទើរតែគ្រប់រូបត្រូវបានបង្ខំឲ្យលាចាកសិក្ខាបទ។ព្រះសង្ឃមួយចំនួនត្រូវគំរាមកំហែងដល់ព្រះជន្មបើរឹងទទឹងមិនព្រមសឹកតាមបញ្ជា។ បន្ទាប់ពីលាចាកសិក្ខាបទ ព្រះសង្ឃត្រូវបានបង្ខំឲ្យធ្វើស្រែនិងការងារហួសកម្លាំងដទៃទៀត។
នៅក្នុងដីកាដំណោះស្រាយនៃសំណុំរឿង ០០២ សហចៅក្រមស៊ើបអង្កេតបានចាត់ឧក្រិដ្ឋកម្មប្រភេទនេះជាការរើសអើងដោយមូលហេតុសាសនា ដែលជាផ្នែកមួយនៃឧក្រិដ្ឋកម្មប្រឆាំងនឹងមនុស្សជាតិ។ ជនរងគ្រោះនៃការរើសអើងដោយមូលហេតុសាសនា ចំនួន២៣៥នាក់ ត្រូវបានទទួលស្គាល់ជាដើមបណ្តឹងរដ្ឋប្បវេណីនៃសំណុំរឿង ០០២។
ព្រះសង្ឃដែលបានចូលរួមនៅក្នុងកិច្ចប្រជុំផ្សព្វផ្សាយ បានប្រើប្រាស់ឧិកាសនេះសួរសំណួរជាច្រើនជុំវិញទិដ្ឋភាពផ្សេងៗគ្នានៃ អ.វ.ត.ក មានដូចជា តួនាទីរបស់ព្រះសង្ឃក្នុងដំណើរការរបស់សាលាក្តីខ្មែរក្រហម ហេតុអ្វីអតីតមេដឹកនាំខ្មែរក្រហមដែលធ្លាប់បួសជាសង្ឃក្នុងព្រះពុទ្ធសាសនាដែរប៉ុន្តែបែរជាធ្វើគត់ព្រះសង្ឃ តើមានបុគ្គលប៉ុន្មាននាក់គួរតែត្រូវកាត់ទោស និងសំណួរផ្សេងៗជាច្រើនទៀត។ ដោយយល់ឃើញថា វេទិកាសំណួរនិងចម្លើយគួរតែមានរយៈពេល មួយម៉ោង អ.វ.ត.ក នឹងរៀបចំអង្គប្រជុំមួយទៀតជាមួយនឹងពុទ្ធិកសាកលវិទ្យាល័យព្រះសីហនុរាជ នៅពេលឆាប់ៗខាងមុខ៕
