អគ្គលេខាធិការរងទទួលបន្ទុកផ្នែកច្បាប់ និងអគ្គហិរញ្ញិក អ.ស.ប ទស្សនកិច្ច អ.វ.ត.ក

ថ្លែងទៅកាន់បុគ្គលិកជាតិ និងអន្តរជាតិនៅសាលាក្តីខ្មែរក្រហមកាលពីថ្ងៃទី២៨ ខែមករា ឆ្នាំ ២០១៤ អគ្គលេខាធិការរងអង្គការសហប្រជាជាតិទទួលបន្ទុកផ្នែកច្បាប់ លោក មីហ្គែល ដឺ ស៊ែប៉ា សៅរែស បានធានាអះអាងថាអង្គការសហប្រជាជាតិបានប្តេជ្ញាចិត្តក្នុងការគាំទ្រអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ក.ត) ប្រឆាំងនឹងនិរទណ្ឌ ភាពនៃឧក្រិដ្ឋកម្មរបស់អតីតរបបខ្មែរក្រហម។

លោកអគ្គលេខាធិការរង អ.ស.ប Miguel de Serpa Soares (ទី២ រាប់ពីស្តាំ) និងលោកស្រី Maria Eugenia Casar ឧបការីរបស់អគ្គលេខាធិការ អ.ស.ប និងជាអគ្គហិរញ្ញិក អ.ស.ប (ទី៣ រាប់ពីខាងស្តាំ) នៅក្នុងឱកាសនៃកិច្ចប្រជុំរួមមួយនៅ សាលាក្តីខ្មែរក្រហមកាលពីថ្ងៃទី២៨ ខែមករា ឆ្នាំ ២០១៤។

លោកអគ្គលេខាធិការរង អ.ស.ប បានដឹកនាំគណៈប្រតិភូជាន់ខ្ពស់មួយដែលមានសមាជិកចំនួន ៦ រូបមកបំពេញទស្សនកិច្ចនៅអង្គជំនុំជម្រះវិសាមញ្ញក្នុងតុលាការ កម្ពុជា  ដើម្បីពិភាក្សាជាមួយដៃគូ ផ្សេងទៀតលើបញ្ហាហិរញ្ញវត្ថុរបស់តុលាការ ហើយបានជួបប្រជុំរួមមួយជាមួយមន្ត្រី បុគ្គលិកជាតិ និងអន្តរជាតិដើម្បីកិច្ចសន្ទនាជាសាធារណៈ មួយ។ លោក សៅរែស បានថ្លែងក្នុងពិធីបើកកិច្ចប្រជុំរួមនោះថា៖ «អ.វ.ត.ក មានបេសកកម្មសំខាន់បំផុតមួយគឺផ្តល់យុត្តិធម៌ ដល់ប្រជាជនកម្ពុជា។ វាជាក្តីសោមនស្ស រីករាយ របស់ខ្ញុំដែលបានជួបអ្នកទាំងអស់គ្នាថ្ងៃនេះដើម្បីថ្លែងទទួលស្គាល់ពីការផ្តល់វិភាគទានរបស់អ្នកទាំងអស់គ្នាក្នុងដំណើរការតុលាការតាំងពីដើមដំបូងមក»។

លោកស្រី Maria Eugenia Casar ឧបការីរបស់អគ្គលេខាធិការ និងជាអគ្គហិរញ្ញិក អ.ស.បក៏បានមានប្រសាសន៍ទៅកាន់អង្គប្រជុំផងដែរដោយបានពន្យល់ពីស្ថានភាពហិរញ្ញ
វត្ថុបច្ចុប្បន្ន និងដំណាក់កាលបន្តបន្ទាប់ទៀតដែលត្រូវអនុវត្តដោយអគ្គលេខាធិការ អ.ស.ប ក្នុងការធានាថា អ.វ.ត.ក នឹងអាចបន្តកិច្ចការដ៏មានសារៈសំខាន់របស់ខ្លួនបាន
ដោយមិនមាន ការជាប់គាំងណាមួយដោយសារតែវិបត្តិខ្វះថវិកាឡើយ។ លោកស្រីបានពិពណ៌នាថា នៅ ក្នុងសន្និសីទកៀងគរជំនួយសម្រាប់គម្រោងថវិកាឆ្នាំ
២០១៤-២០១៥ ដែលបានប្រព្រឹត្តទៅកាលពីខែវិច្ឆិកា កន្លងទៅនៅទីក្រុងញូវយ៉ក ទទួលបាននូវការសន្យាផ្តល់ជំនួយហិរញ្ញវត្ថុមានកម្រិតពីក្រុមប្រទេសម្ចាស់ជំនួយ ហើយអគ្គលេខាធិការ អ.ស.ប បានស្នើសុំទៅគណៈ កម្មាធិការទី៥ នៃមហាសន្និបាត អនុម័តលើការផ្តល់ឧបត្ថម្ភធនដល់ អ.វ.ត.ក ដែលថវិកានេះបានមកពីការផ្តល់
វិភាគទៀងទាត់ដល់ អ.ស.ប ដើម្បីចៀសវាងការរអាក់រអួលដល់ដំណើរការនីតិវិធីតុលាការ។ លោកស្រី Casar បានថ្លែងថា ជាមួយការគាំទ្ររបស់រាជរដ្ឋា
ភិបាលកម្ពុជា លោកស្រីសង្ឃឹមថា ការផ្តល់ឧបត្ថម្ភធននេះនឹងត្រូវអនុម័តដោយមហាសន្និបាត នៅក្នុងកិច្ចប្រជុំរបស់គណៈកម្មាធិការទី៥ដែលគ្រោងប្រព្រឹត្តទៅនៅ
ក្នុងអំឡុងខែមីនា។

លោកស្រីក៏បានជម្រាបដល់អង្គប្រជុំផងដែរថា បន្ទាប់ពីបានជួបពិភាក្សាអំពីស្ថានភាពហិរញ្ញវត្ថុរបស់ អ.វ.ត.ក ជាមួយឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី និងជារដ្ឋមន្ត្រីទីស្តីការគណៈរដ្ឋមន្ត្រី រាជរដ្ឋាភិបាលកម្ពុជានឹងផ្តល់ថវិកាចំនួន ១,១លាន ដុល្លារអាមេរិកសម្រាប់បើកប្រាក់បៀវត្សរ៍ដល់មន្ត្រីបុគ្គលិកជាតិសម្រាប់ត្រីមាសទី១ នៃ ឆ្នាំ ២០១៤ នេះ ខណៈដែលអ្នកជំនាញការពិសេសរបស់អគ្គលេខាធិការ អ.ស.ប ទទួលបន្ទុក សាលាក្តីខ្មែរក្រហម នឹងខិតខំប្រឹងប្រែងជាអតិបរមា ដោយធ្វើការងារ
ជាមួយតំណាងរាជរដ្ឋាភិបាលកម្ពុជាដើម្បីកៀងគរជំនួយហិរញ្ញវត្ថុសម្រាប់បង្គ្រប់ថវិកាភាគីជាតិនៃ អ.វ.ត.ក នៅក្នុងឆ្នាំ ២០១៤នេះ។

ក្នុងរយៈពេលមួយម៉ោងនៃកិច្ចប្រជុំរួមដែលមានការចូលរួមពីសំណាក់មន្ត្រីបុគ្គលិកជាតិ និងអន្តរជាតិទាំងអស់ បុគ្គលិកមួយចំនួនបានលើកឡើងពីក្តីព្រួយបារម្ភ និងបានចោទជាសំណួរមួយចំនួនជុំវិញបញ្ហាថវិកា សន្តិសុខការងារ និងសុខុមាលភាពបុគ្គលិក។

គណៈប្រតិភូនេះគឺត្រូវបានបញ្ជូន មកដោយលោកអគ្គលេខាធិការ អ.ស.ប បន្ទាប់ពីមានជំនួបជាន់ខ្ពស់មួយជាមួយសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជា
ណាចក្រ កម្ពុជានៅក្នុងកិច្ចប្រជុំកំពូលអាស៊ានកាលពីឆ្នាំមុននៅប្រទេសប៊្រុយណេ។ នៅក្នុងដំណើរ ទស្សនកិច្ចរយៈពេលបីថ្ងៃនេះគណៈប្រតិភូបានជួបជាមួយមន្ត្រី
រាជរដ្ឋាភិបាលកម្ពុជា តំណាងក្រុមប្រទេសម្ចាស់ជំនួយ និងមន្ត្រីតុលាការ និងបន្ថែមពីលើនេះបានជួបជាមួយ មន្ត្រីបុគ្គលិកនៅក្នុងកិច្ចប្រជុំរួមមួយ។

អ.វ.ត.ក បានបង្កើតឡើងនៅឆ្នាំ ២០០៦ ដើម្បីជំនុំជម្រះក្តីលើជនពីរជំពូកគឺមេដឹកនាំជាន់ខ្ពស់ និងអ្នកទទួលខុសត្រូវខ្ពស់ក្នុងឧក្រិដ្ឋកម្មធ្ងន់ធ្ងរប្រព្រឹត្តទៅនៅក្នុងរបប ប៉ុល ពត នៅ កម្ពុជា។ រហូតមកទល់ពេលនេះ ជនជាប់ចោទមួយរូបត្រូវបានរកឃើញថាមានពិរុទ្ធភាព  ពីររូបផ្សេងទៀតកំពុងត្រូវបានជំនុំជម្រះហើយសំណុំរឿងពីរផ្សេងទៀតកំពុង
ស្ថិតនៅក្នុង ការស៊ើបអង្កេត។ អ.ស.ប បានបញ្ជូនចៅក្រមអន្តរជាតិ និងបុគ្គលិកជាង ១០០ នាក់មក បម្រើការងារនៅតុលាការចម្រុះនេះតាមរយៈជំនួយរបស់ អ.ស.ប សម្រាប់ការជំនុំជម្រះក្តី ខ្មែរក្រហម។