មតិយុវជន៖ ទស្សនកិច្ចសិក្សាទៅកាន់ទីតាំងឧក្រិដ្ឋកម្មខ្មែរក្រហម ជួយឱ្យយល់ច្បាស់ពីអំពើប្រល័យពូជសាសន៍នៅកម្ពុជា

ECCC

យ៉េង រក្សា ជាយុវតី​រៀនថ្នាក់ទី១១ ម្នាក់​មកពីខេត្តព្រៃវែងបាន​លើកឡើងថា​ កញ្ញាមានការរីករាយ​ណាស់​ ដែល​បាន​ធ្វើដំណើរ​មក​ទស្សនកិច្ចសិក្សានៅទីតាំង​ប្រវត្តិសាស្ដ្រ​កម្ពុជាដែលបានបន្សល់ទុក​ពី​​របប​​ប្រល័យពូជសាសន៍។ យុវតីរូបនេះបញ្ជាក់ថា ​«ដំណើរទស្សនកិច្ចនេះបានផ្ដល់​ឱ្យពួក​ខ្ញុំ ​បាន​​យល់​ច្បាស់​អំពី​របប​ប្រល័យពូជសាសន៍ និង​ការ​កាត់​ទោស​មេដឹក​នាំខ្មែរក្រហម ហើយបើកាល​ណា​យើង​ដឹង​​ប្រវ​ត្តិ​សា​ស្ដ្រពិត យើងអាចរួមកម្លាំង​គ្នាដើម្បី​ទប់​ស្កាត់ការពារ​កុំឱ្យអំពើ​ប្រល័យ​ពូជ​សាស​​ន៍​នឹងកើត​ឡើង​ម្ដង​​​ទៀត»

យុវតី យ៉េង រក្សា ជាសិស្សម្នាក់ក្នុងចំណោម​សិស្សានុសិស្សប្រមាណ ២០០ នាក់​ផ្សេងទៀត មក​ពី​វិទ្យា​​ល័យ ហ៊ុន សែន ព្រែកសណ្ដែក ក្នុងស្រុកស៊ីធរកណ្ដាល ខេត្តព្រៃវែង ដែលបាន​ចូលរួម​ក្នុង​ដំ​ណើរ​​ទស្សន​កិច្ច​សិក្សា​រៀបចំដោយអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នៅថ្ងៃទី ៥ ខែ មេសា ឆ្នាំ២០២៣។

លោក ចន គឹមហ៊ុយ ជាសិស្សថ្នាក់ទី១២ នៃវិទ្យាល័យព្រែកសណ្ដែកក៏បានលើកឡើងស្រដៀងគ្នានឹង​យុវ​តី​ខាង​លើដែរ ដោយ គឹម​ហ៊ុយ បញ្ជាក់ថា «បើតាមខ្ញុំស្ដាប់ការ​បកស្រាយពីលោកគ្រូអ្នកគ្រូ ខ្ញុំគិត​ថា​​ពេល​ខ្ញុំអត់ទាន់បានមក (ទស្សនកិច្ច) ខ្ញុំអត់ទាន់ដឹងច្បាស់ទេ ពេលខ្ញុំបានមក ខ្ញុំបានដឹងច្បាស់ពី​សម័យ​​កាល ប៉ុល ពត ហើយខ្ញុំបានទៅទី​តាំងគុកទួលស្លែង ហើយ​ខ្ញុំបានដឹងថាមានអ្នកស្លាប់ប៉ុន្មាន​នាក់ ហើយ​ស្លាប់ដោយរបៀបណា នេះជាអ្វីដែលខ្ញុំចង់ដឹងតាំងពីក្មេង។»

ដំណើរទស្សនកិច្ចសិក្សានៅក្នុងថ្ងៃនេះ សិស្សានុសិស្សទាំងអស់​ត្រូវបាន​នាំយក​ទៅទស្សនកិច្ចសិក្សា​នៅ​វិមានឈ្នះឈ្នះ មជ្ឈ​មណ្ឌល​ប្រល័យពូជសាសន៍បឹងជើងឯក សារៈ​មន្ទីរ​ឧក្រិដ្ឋកម្មប្រល័យ​ពូជ​សាសន៍​ទួលស្លែង និងមានបទង្ហាញពីមន្ដ្រីផ្នែកិច្ចការសាធារណៈនៃ អ.វ.ត.ក ផងដែរ។ គោល​បំណង​ទស្សន​កិច្ចនេះ គឺដើម្បីជួយ​ឱ្យសិស្សានុសិស្ស​បាន​​យល់​ដឹង​ និងចង​ចាំ​អំពីសោកនាដកម្ម​នៅក្នុងរបប​ខ្មែរក្រហម ការ​រំដោះជាតិពីរបបប្រល័យពូជសាសន៍ និងការជំនុំ​ជម្រះ​​ក្ដីលើឧក្រិដ្ឋកម្មនៃ​របបឃោរ​ឃៅ​នោះ។

នៅពេលបានដឹងរឿងរ៉ាវប្រវត្តិសាស្ដ្រដ៏ជូរចត់របស់​កម្ពុជានោះ​ យុវជនទាំងនោះបាន​​​ថ្លែងនូវការ​​កោត​សរ​សើរ និង​ដឹង​គុណ​ដល់​គោល​នយោ​បាយ​ឈ្នះ​ឈ្នះ​របស់​រាជ​រដ្ឋា​ភិបាល​ ​ដែល​បាន​រំដោះប្រទេស​កម្ពុជាពីរបបប្រល័យពូជសាសន៍នោះ​ ហើយថែមទាំង​នាំ​មក​នូវ​សុខ​សន្ដិភាព និងស្ថេរ​ភាព​សង្គម​ទៀត​ផង​​។ ពួកគេក៏បានថ្លែងអំណរអរ​​គុណដល់ អ.វ.ត.ក ដែល​បាន​រៀបចំ​កម្មវិធីនេះឡើង ដើម្បី​ឲ្យ​ពួក​គាត់​​បាន​យល់​ដឹង បាន​ទស្សនា​ទីតាំង​​ឧក្រិដ្ឋកម្ម និង​បាន​មក​ឃើញ​ការ​អភិវឌ្ឍ​ន៍​នៅ​ក្នុង​រាជ​ធានីភ្នំ​ពេញ​​​​នាពេលបច្ចុប្បន្ននេះផងដែរ។

សូមបញ្ជាក់​ថា អ.វ.ត.ក បានរៀបចំរៀងទស្សនកិច្ចសិក្សារៀង​រាល់សប្ដាហ៍ ជូនសិស្សានុសិស្ស និស្សិត យុវជន និង​ពលរដ្ឋទូទៅ ដើម្បីជួយជម្រុញដល់​ការចងចាំ និងការចូលរួម​ទប់​ស្កាត់ការវិល​ត្រ​ឡប់​មក​វិញ​នូវ​អំពើឃោរឃៅ​ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។​ ចាប់តាំងពីតុលាការ​ដំ​ណើ​ការ​ដំបូង រហូតមកដល់ឆ្នាំ​២០២៣ នេះ សាធារណ​ជនជាតិ និង​អន្តរ​ជាតិ​​ជាងកន្លះ​លាន​នាក់​ហើយ​ បាន​ចូលរួមក្នុងដំណើរទស្សនកិច្ចសិក្សា ក្រោមការសម្រប​សម្រួល និង​រៀបចំ​ដោយផ្នែកកិច្ចការ​សា​ធា​រណៈ​នៃសាលាក្តីខ្មែរក្រហម៕

 

ECCC

ECCC

ECCC

ECCC

ECCC

ECCC

eccc

ECCC