យុវជននឹងបានចងចាំប្រវត្តិសាស្ដ្រពិតរបស់ប្រទេសកម្ពុជា តាមរយៈការចូលរួមទស្សនកិច្ចសិក្សារៀបចំឡើងដោយសាលាក្ដីខ្មែរក្រហម បើទោះបីជាពួកគេកើតមិនទាន់របបប្រល័យពូជសាសន៍ក៏ដោយ។ នេះជាការលើកឡើងរបស់ លោកគ្រូ អ្នកគ្រូដែលដឹកនាំសិស្សានុសិស្សមកទស្សនកិច្ចសិក្សារៀបចំដោយ អ.វ.ត.ក នៅថ្ងៃទី ៦ ខែ មេសា ឆ្នាំ ២០២៣។
អង្គជំនុំជម្រះវិសាមញ្ញក្នុងតុលាការកម្ពុជា នៅថ្ងៃទី ៦ ខែ មេសា នេះ បានរៀបចំដំណើរទស្សនកិច្ចសិក្សាជូនសិស្សានុសិស្សចំនួន ១៣០ នាក់ មកពីវិទ្យាល័យ សម្ដេចតេជោ ហ៊ុន សែន ស្ទឹងត្រង់ ក្នុង ខេត្តកំពង់ចាម។ សិស្សានុសិស្សទាំងអស់ត្រូវបាននាំយកទៅទស្សនកិច្ចសិក្សានៅវិមានឈ្នះឈ្នះ មជ្ឈមណ្ឌលប្រល័យពូជសាសន៍បឹងជើងឯក សារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមានបទង្ហាញពីមន្ដ្រីផ្នែកិច្ចការសាធារណៈនៃ អ.វ.ត.ក ផងដែរ។ គោលបំណងទស្សនកិច្ចនេះ គឺដើម្បីជួយឱ្យសិស្សានុសិស្សបានយល់ដឹង និងចងចាំអំពីសោកនាដកម្មនៅក្នុងរបបខ្មែរក្រហម ការរំដោះជាតិពី របបប្រល័យពូជសាសន៍ និងការជំនុំជម្រះក្ដីលើឧក្រិដ្ឋកម្មនៃរបបឃោរឃៅនោះ។
អ្នកគ្រូ សួន ច័ន្ទថេន បានលើកឡើងថា អ្នកគ្រូមានក្ដីរំភើប និងរីករាយយ៉ាងខ្លាំង ដែល អ.វ.ត.ក បាននាំយកសិស្សរបស់គាត់មកទស្សនកិច្ចសិក្សានៅថ្ងៃនេះ។ អ្នកគ្រូបញ្ជាក់ថាថា «វាជាការស្រាវជ្រាវមួយជាប្រវត្តិសាស្ដ្រសម្រាប់ឱ្យសិស្សចងចាំ ទោះជាសិស្សកើតអត់ទាន់មែន ប៉ុន្ដែទាំងអស់នោះសុទ្ធតែឯកសារប្រវត្ដិសាស្ដ្រដែលយើងអត់អាចលុបបានទេ។ ចឹងយើងមានការរៀបចំឱ្យសិស្សស្គាល់នឹង វាជាការល្អមែនទែន ព្រោះជាការចងចាំមួយច្បាស់លាស់មិនអាចលុបបំបាត់បាន។ បើរៀននៅសាលា សិស្សគាត់អានឯកសារទៅតាមការស្រមើរស្រមៃ ប៉ុន្ដែយើងមកដល់ទៅនេះយើងឃើញច្បាស់ៗតែម្ដង វាមានការចងចាំល្អជាងតាម(ការអានសៀវភៅ)។»
លោកគ្រូ តាន គឹមលាង ក៏បានលើកឡើងស្រដៀងគ្នានេះដែរ ដោយលោកគ្រូបញ្ជាក់ថា «ដំណើរទស្សនកិច្ចនេះធ្វើឱ្យសិស្សបានយល់ដឹងច្រើន ដោយទីមួយពួកគាត់អាចបានមកឃើញទីតាំងពិតបន្សល់ពីសម័យ ប៉ុល ពត ទីពីរបានយល់ដឹងពីការធ្វើទារុណកម្មដោយពួកខ្មែរក្រហម ដែលមានភាពជាក់ស្ដែង ដែលពួកគាត់អានតាមសៀវភៅ ហើយបានមកឃើញកន្លែងជាក់ស្ដែងចឹងទៅ ពេលទៅវិញពួកគាត់អាចចង់ចាំបានច្រើន និងបានយូរ។»
លោកគ្រូអ្នកគ្រូ បានថ្លែងនូវការកោតសរសើរ និងដឹងគុណដល់គោលនយោបាយឈ្នះឈ្នះរបស់រាជរដ្ឋាភិបាល ដែលបានរំដោះប្រទេសកម្ពុជាពីរបបប្រល័យពូជសាសន៍នោះ ហើយថែមទាំងនាំមកនូវសុខសន្ដិភាព និងស្ថេរភាពសង្គមទៀតផង។ លោកគ្រូអ្នកគ្រូក៏បានថ្លែងអំណរអរគុណដល់ អ.វ.ត.ក ដែលបានរៀបចំកម្មវិធីនេះឡើង ដើម្បីឲ្យពួកគាត់បានយល់ដឹង បានទស្សនាទីតាំងឧក្រិដ្ឋកម្ម និងបានមកឃើញការអភិវឌ្ឍន៍នៅក្នុងរាជធានីភ្នំពេញនាពេលបច្ចុប្បន្ននេះផងដែរ។ ព្រមជាមួយគ្នានេះផងដែរ លោកគ្រូអ្នកគ្រូបានស្នើឱ្យសាលាក្ដីខ្មែរក្រហមបន្ដរៀបចំទស្សនកិច្ច សិក្សានេះជូនយុវជនជំនាន់ក្រោយឱ្យបានច្រើន ដើម្បីឱ្យយុវជនទាំងនោះបានចងចាំអំពីប្រវត្តិសាស្ដ្រដ៏ឃោរឃៅនេះ។
សូមបញ្ជាក់ថា អ.វ.ត.ក បានរៀបចំរៀងទស្សនកិច្ចសិក្សារៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំងពីតុលាការដំណើការដំបូង រហូតមកដល់ឆ្នាំ២០២៣ នេះ សាធារណជនជាតិ និងអន្តរជាតិជាងកន្លះលាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕