លោក អុន លាងអាន តំណាងយុវជនស្រុកបាធាយ បានថ្លែងថា ទស្សនកិច្ចសិក្សាដែលរៀបចំដោយអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានផ្ដល់ឱ្យយុវជនជំនាន់ក្រោយយល់ច្បាស់អំពីប្រវត្ដិសាស្ដ្រដ៏ជូរចត់ និងប្រវត្ដិសាស្ដ្រនៃការកសាងសន្ដិភាពរបស់កម្ពុជា។
ការថ្លែងនេះធ្វើឡើងនៅខណៈពេល លោក អុន លាងអាន បានដឹកនាំយុវជនប្រមាណ ១៥០ នាក់មកពីវិទ្យាល័យសម្ដេចតេជោ ហ៊ុន សែន សណ្ដែក និងវិទ្យាល័យ ហោ ណាំហុង ព្រៃញា ក្នុងស្រុកបាធាយ ខេត្តកំពង់ចាម នាថ្ងៃទី ១៩ ខែ មេសា ឆ្នាំ ២០២៣ ដើម្បីចូលរួមក្នុងកម្មវិធីទស្សនកិច្ចសិក្សារបស់សាលាក្ដីខ្មែរក្រហម។
ក្នុងកម្មវិធីទស្សនកិច្ចសិក្សានេះ យុវជននឹងទទួលបានការធ្វើបទបង្ហាញពីមន្ដ្រីផ្នែកកិច្ចការសាធារណៈនៃ អ.វ.ត.ក អំពីសារៈសំខាន់ និងកេរដំណែលនៃការជំនុំជម្រះក្ដីលើឧក្រិដ្ឋកម្មកើតឡើងនៅក្នុងរបបខ្មែរក្រហម ទស្សនកិច្ចសិក្សានៅវិមាន ឈ្នះ ឈ្នះ មជ្ឈមណ្ឌលប្រល័យពូជសាសន៍ជើងឯក និងសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង។ គោលបំណងនៃទស្សនកិច្ចសិក្សានេះ គឺដើម្បីឱ្យយុវជនបានចងចាំអំពីសោកនាដកម្មនៅក្នុងរបបខ្មែរក្រហម យល់ដឹងអំពីសមិទ្ធិផលសម្រេចបានដោយ អ.វ.ត.ក និងការរំដោះប្រទេសជាតិពីរបបប្រល័យពូជសាសន៍។
លោក អុន លាងអាន បញ្ជាក់ថា «ដំណើរទស្សនកិច្ចសិក្សានេះគឺមានសារៈសំខាន់ខ្លាំងណាស់ ពិសេសចំពោះប្អូនៗដែលជាយុវជនជំនាន់ក្រោយ ពួកគាត់ជាសិស្សទី១២ ហើយនឹងត្រៀមប្រលងនៅពេលខាងមុខនេះ បន្ទាប់ទៅគាត់ទៅមហាវិទ្យាល័យគឺ គាត់បានទទួលចំណេះដឹងប្រវត្តិសាស្ដ្ររបស់ប្រទេសកម្ពុជា ទាំងប្រវត្តិសាស្ដ្រជូរចត់ និងប្រវត្ដិសាស្ដ្រដែលនាំឱ្យយើងមានសន្ដិភាពដល់សព្វថ្ងៃនេះ។»
តំណាងយុវជនរូបនេះបន្ថែមថា ការទស្សនកិច្ចសិក្សានៅវិមានឈ្នះ ឈ្នះ យុវជនអាចក្រេបជញ្ជក់ចំណេះដឹងអំពីដំណើរស្វែងរកសន្ដិភាពក៏ដូចជាការបង្រួបបង្រួមជាតិ ហើយនឹងការតស៊ូដើម្បីផ្ដួលរំលំរបបខ្មែរក្រហមដោយរាជរដ្ឋាភិបាលកម្ពុជា។ ចំណែកការទស្សនកិច្ចនៅមជ្ឈមណ្ឌលប្រល័យពូជសាសន៍ជើងឯក និងសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង លោកថា យុវជនដែលកើតមិនទាន់របបកម្ពុជាប្រជាធិបតេយ្យ បានយល់ដឹង និងចងចាំអំពីភាពឃោរឃៅនៃរបបវាលពិឃាតរបស់ខ្មែរក្រហម។
លោក លាងអាន ក៏បានថ្លែងកោតសរសើរ និងអរគុណដល់សាលាក្ដីខ្មែរក្រហមដែលបានរៀបចំកម្មវិធីទស្សនកិច្ចសិក្សានេះឡើង ដើម្បីឱ្យយុវជនបានស្វែងយល់ច្បាស់អំពីប្រវត្តិសាស្ដ្ររបស់កម្ពុជា។ តំណាងយុវជនរូបនេះក៏បានថ្លែងអំណរគុណដល់ប្រមុខរាជរដ្ឋាភិបាលផងដែរ ដែលលោកបានដឹកនាំប្រទេសកម្ពុជាឱ្យទទួលបានសុខសន្ដិភាព និងបានរីកចម្រើនគ្រប់វិស័យរហូតមកដល់សព្វថ្ងៃនេះ។
សូមបញ្ជាក់ថា ដំណើរទស្សនកិច្ចសិក្សានេះ ត្រូវបានរៀបចំរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំងពីតុលាការដំណើការដំបូង រហូតមកដល់ឆ្នាំ២០២៣ នេះ សាធារណជនជាតិ និងអន្តរជាតិជាងកន្លះលាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕