អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានរៀបចំកម្មវិធីនាំយកយុវជនប្រមាណ ២០០ នាក់ មកពីស្រុកបាភ្នំ ក្នុងខេត្តព្រៃវែង ទៅសិក្សាស្វែងយល់អំពីប្រវត្តិសាស្ដ្រកម្ពុជាប្រជាធិបតេយ្យនៅក្នុងសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលប្រល័យពូជសាសន៍ជើងឯក។ ការរៀបចំដំណើរទស្សនកិច្ចសិក្សានៅថ្ងៃទី ១៧ ខែ ឧសភា ឆ្នាំ ២០២៣ នេះ គឺដើម្បីជួយជម្រុញយុវជនឱ្យបានយល់ដឹងបន្ថែម និងចងចាំអំពីសោកនាដកម្មរបស់ប្រជាជនកម្ពុជានៅក្នុងរបបខ្មែរក្រហម និងការជំនុំជម្រះក្ដីលើឧក្រិដ្ឋកម្មក្នុងរបបឃោរឃៅនោះ។
ក្នុងដំណើរទស្សនកិច្ចសិក្សានៅថ្ងៃនេះ នៅក្នុងបរិវេណសារៈមន្ទីរទួលស្លែង យុវជនទាំងអស់ទទួលបានការស្វាគមន៍ និងបទបង្ហាញពីមន្ដ្រីផ្នែកកិច្ចការសាធារណៈនៃសាលាក្ដីខ្មែរក្រហម អំពីដំណើរការជំនុំជម្រះក្ដីលើអតីតមេដឹកនាំខ្មែរក្រហម និងសមិទ្ធិផលរបស់ អ.វ.ត.ក។ បន្ទាប់ពីបទបង្ហាញត្រូវបានបញ្ចប់ ក្រុមយុវជនបានទស្សនកិច្ចស្វែងយល់អំពីរឿងរ៉ាវប្រវត្តិសាស្ដ្រនៅក្នុងសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលប្រល័យពូជសាសន៍ជើងឯក។ តាមការរំពឹងទុក ក្រោយពេលបញ្ចប់ទស្សនកិច្ចសិក្សានៅក្នុងមួយថ្ងៃនេះ យុវជនទាំងអស់នឹងបានទទួលនូវព័ត៌មាន និងចំណេះដឹងយ៉ាងច្រើនជុំវិញដំណើរការជំនុំជម្រះក្តីលើអតីតមេដឹកនាំខ្មែរក្រហម ការធ្វើទារុណកម្មយ៉ាងព្រៃផ្សៃ និងការកាប់សម្លាប់ប្រជាពលរដ្ឋកម្ពុជាដោយពួកខ្មែរក្រហម និងការពលីរបស់ថ្នាក់ដឹកនាំកម្ពុជាក្នុងការរំដោះប្រទេសជាតិចេញពីរបបប្រល័យពូជសាសន៍នោះ។
លោក គន្ធ ពន្លក តំណាងក្រុមដឹកនាំយុវជនបានគូសបញ្ជាក់ថា ដំណើរទស្សនកិច្ចនេះពិតជាមានសារៈសំខាន់ណាស់សម្រាប់យុវជនជំនាន់ក្រោយ ដើម្បីឱ្យពួកគាត់បានចងចាំ និងយល់ដឹងកាន់តែច្បាស់នូវភាពសាហាវឃោរឃៅរបស់របបខ្មែរក្រហមដែលបានប្រព្រឹត្តិមកលើប្រជាជនកម្ពុជា។ លោកបន្ដថា យុវជនបានយល់ដឹងកាន់តែច្បាស់ តាមរយៈការស្ដាប់ និងទស្សនានូវទិដ្ឋភាពដែលត្រូវបានបន្សល់ទុកនៅក្នុងសារៈមន្ទីរទួលស្លែង និងវាលពិឃាតបឹងជើងឯក។
លោកបន្ថែមថា រូបលោកតំណាងឱ្យយុវជនដែលចូលរួមក្នុងដំណើរទស្សនកិច្ចសិក្សានៅក្នុងថ្ងៃនេះ សូមថ្លែងនូវការកោតសរសើរ និងដឹងគុណដល់គោលនយោបាយឈ្នះឈ្នះរបស់រាជរដ្ឋាភិបាលកម្ពុជា ដែលបានដឹកនាំប្រទេសនាំមកនូវសុខសន្ដិភាព និងស្ថេរភាពសង្គម។ ហើយលោកក៏សូមអរគុណដល់ អ.វ.ត.ក ដែលបានរៀបចំកម្មវិធីនេះឡើង ដើម្បីឲ្យពួកគាត់បានយល់ដឹង បានទស្សនាទីតាំងឧក្រិដ្ឋកម្មដែលបន្សល់ទុកពីរបបខ្មែរក្រហម និងបានមកឃើញការអភិវឌ្ឍន៍នៅក្នុងរាជធានីភ្នំពេញនាពេលបច្ចុប្បន្ននេះផងដែរ។
សូមបញ្ជាក់ថា អ.វ.ត.ក បានរៀបចំរៀងទស្សនកិច្ចសិក្សារៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំងពីតុលាការដំណើការដំបូង រហូតមកដល់ឆ្នាំ២០២៣ នេះ សាធារណជនជាតិ និងអន្តរជាតិជាងកន្លះលាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
