អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) នៅថ្ងៃទី៥ ខែកក្កដា ឆ្នាំ២០២៣ នេះ បានរៀបចំទស្សនកិច្ចសិក្សាជូនសិស្សានុសិស្សប្រមាណ ២២០ នាក់ មកពីវិទ្យាល័យសម្ដេចតេជោ ហ៊ុន សែន សួង ក្នុងក្រុងសួង ខេត្តត្បូងឃ្មុំ ទៅទស្សនកិច្ចសិក្សាស្វែងយល់អំពីប្រវត្តិសាស្ដ្រវិមានឈ្នះ ឈ្នះ សារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលប្រល័យពូជសាសន៍ជើងឯក។ គោលបំណងនៃកម្មវិធីនេះ គឺដើម្បីឱ្យសិស្សានុសិស្សទាំងអស់បានចងចាំ និងស្វែងយល់ឱ្យកាន់តែច្បាស់អំពី សោកនាដកម្មដែលកើតមានឡើងនៅក្នុងរបបឃោរឃៅខ្មែរក្រហម និងចូលរួមទប់ស្កាត់ការវិលត្រឡប់មកវិញនូវអំពើឃោរឃៅដូចក្នុងរបបខ្មែរក្រហមផងដែរ។
ក្នុងដំណើរទស្សនកិច្ចសិក្សានៅថ្ងៃនេះ សិស្សានុសិស្សទាំងអស់ទទួលបានការស្វាគមន៍ និងពន្យល់យ៉ាងក្បោះក្បាយពីមគ្គុទ្ទេសន៍អំពីអត្ថន័យ និងសារៈសំខាន់នៃវិមានឈ្នះ ឈ្នះ អំពីសោកនាដកម្ម ដែលបានកើតឡើងនៅក្នុងសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលប្រល័យពូជសាសន៍ជើងឯក។ សិស្សានុសិស្សទាំងអស់ក៏ទទួលបានការធ្វើបទបង្ហាញរបស់មន្ដ្រីមកពីសាលាក្ដីខ្មែរក្រហមផងដែរ ពីដំណើរការជំនុំជម្រះក្ដី និងសមិទ្ធផលដែលទទួលបានពីការជំនុំជម្រះក្ដីលើអតីតមេដឹកនាំជាន់ខ្ពស់នៃរបបខ្មែរក្រហម។
លោកគ្រូអ្នកគ្រូដែលបានដឹកនាំសិស្សានុសិស្សមកចូលរួមក្នុងទស្សនកិច្ចសិក្សានេះ បានថ្លែងនូវការកោតសរសើរ និងដឹងគុណដល់គោលនយោបាយ ឈ្នះ ឈ្នះ របស់រាជរដ្ឋាភិបាលកម្ពុជា ដែលបានដឹកនាំប្រទេសនាំមកនូវសុខសន្ដិភាព ស្ថេរភាពសង្គម និងរីកចម្រើនគ្រប់វិស័យ។ លោកគ្រូអ្នកគ្រូក៏សូមអរគុណដល់ អ.វ.ត.ក. ផងដែរ ដែលបានរៀបចំកម្មវិធីនេះឡើង ដើម្បីឲ្យយុវជនបានយល់ដឹង បានទស្សនាទីតាំងឧក្រិដ្ឋកម្មដែលបន្សល់ទុកពីរបបខ្មែរក្រហម និងបានមកឃើញការអភិវឌ្ឍន៍នៅក្នុងរាជធានីភ្នំពេញនាពេលបច្ចុប្បន្ននេះ។
សូមបញ្ជាក់ថា អ.វ.ត.ក. បានរៀបចំទស្សនកិច្ចសិក្សារៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំងពីឆ្នាំ ២០០៩ រហូតមកដល់ឆ្នាំ២០២៣ នេះ សាធារណជនជាតិ និងអន្តរជាតិជាងកន្លះលាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
