យុវតី ហាន សុខរាសី ជាសិស្សរៀនថ្នាក់ទី១១ នៃវិទ្យាល័យពាមជាំង ក្នុងស្រុកអូរាំងឪ បានលើកឡើងថា កញ្ញាបានដឹងរឿងរ៉ាវបន្ដិចបន្ដួចប៉ុននោះទាក់ទងនឹងរបបខ្មែរក្រហម។ ទោះបីជាបែបនេះក្ដី សុខរាសី បញ្ជាក់ថា ក្នុងរបបនោះប្រជាជនខ្មែរទូទាំងប្រទេសរស់នៅក្នុងភាពវេទនា និងទុក្ខសោកយ៉ាងខ្លាំង។
សុខរាសី បញ្ជាក់ថា “យាយគាត់ថាកាលហ្នឹងខ្មែររស់នៅវេទនា អត់ឃ្លានអីចឹងទៅ គេធ្វើបាបរហូត...ហើយបានដឹងរឿងទាំងអស់ហ្នឹង ខ្ញុំមានអារម្មណ៍សោកស្ដាយចំពោះរឿងហ្នឹង អត់គួរ កើតមានរឿងអញ្ចឹងលើប្រជាពលរដ្ឋខ្មែរនោះទេ។”
យុវតីម្នាក់ទៀតរៀនថ្នាក់ទី១១ ក្នុងវិទ្យាល័យពាមជាំងដែរ ឈ្មោះ លាប លីឈីង ក៏បានលើកឡើងស្រដៀងគ្នាដែរថា កញ្ញាបានដឹងរឿងរ៉ាវរបស់ប្រជាពលរដ្ឋក្នុងសម័យខ្មែរក្រហមតាមរយៈជីដូនជីតា និងលោកគ្រូអ្នកគ្រូបង្រៀន។ លីឈីង លើកឡើងថា នៅក្នុងសម័យនោះ ខ្មែរក្រហមបានផ្ដល់អាហារបរិភោគមិនគ្រប់គ្រាន់ បង្ខំឱ្យធ្វើការងារទាំងឈឺ ធ្វើទារុណកម្ម សម្លាប់ ហើយ សូម្បីតែជីតារបស់នាងក៏ត្រូវបាន ខ្មែរក្រហមយកគាត់ទៅសម្លាប់ ប៉ុន្ដែគាត់បានរត់គេចខ្លួនពីការសម្លាប់នោះបានវិញ។
ដើម្បីចូលរួមទប់ស្កាត់របបឃោរឃៅកុំឱ្យកើតឡើងនៅក្នុងប្រទេសកម្ពុជាម្ដងទៀត សម្រាប់ លីឈីង យល់ថា យុវជនទាំងអស់ត្រូវចេះសាមគ្គីគ្នា ស្រឡាញ់គ្នាទៅវិញទៅមក ខិតខំរៀនសូត្រ និងមិនត្រូវយកគំរូដឹកនាំតាមរបៀបខ្មែរក្រហមនោះទេ។
សម្រាប់ សុខរាសី វិញយល់ថា យុវជនជំនាន់ក្រោយត្រូវសិក្សាពីប្រវត្ដិសាស្ដ្រកម្ពុជា ជាពិសេសប្រវត្តិសាស្ដ្រទាក់ទងនឹងរបបប្រល័យពូជសាសន៍នោះឱ្យបានច្បាស់លាស់ ដោយមិនត្រូវបំភ្លេចភាពទុក្ខសោកវេទនា និងភាពអន្ដរាយរបស់ប្រទេសជាតិដោយសាររបបខ្មែរក្រហមនោះឡើយ ។
សូមបញ្ជាក់ថា អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នៅថ្ងៃទី១២ ខែកក្កដា ឆ្នាំ២០២៣ នេះ បាននាំយកសិស្សានុសិស្សប្រមាណ២៤០ នាក់ មកពីវិទ្យាល័យពាមជាំង ស្រុកអូរាំងឪ ខេត្តត្បូងឃ្មុំ ទៅទស្សនកិច្ចសិក្សានៅវិមាន ឈ្នះ ឈ្នះ សារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលប្រល័យពូជសាសន៍ជើងឯក។
ក្នុងដំណើរទស្សនកិច្ចសិក្សារៀបចំដោយ អ.វ.ត.ក នៅថ្ងៃនេះ សិស្សទាំងអស់ក៏ទទួលបានការបទបង្ហាញអំពីសមិទ្ធផលនៃការជំនុំជម្រះក្ដីលើអតីតមេដឹកនាំជាន់ខ្ពស់នៃរបបខ្មែរក្រហមផងដែរ។
អ.វ.ត.ក. បានរៀបចំកម្មវិធីទស្សនកិច្ចសិក្សានេះ ជារៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំងពីឆ្នាំ ២០០៩ រហូតមកដល់ឆ្នាំ២០២៣ នេះ សាធារណជនជាតិ និងអន្តរជាតិជាងកន្លះលាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
