យុវតី ផន សុខណា ជាសិស្សថ្នាក់ទី១២ នៃវិទ្យាល័យព្រះបាទសុរាម្រឹត ក្នុងខេត្តកំពង់ឆ្នាំង បានលើកឡើងថា កញ្ញាមានអារម្មណ៍ខ្លោចផ្សារជាពន់ពេកនៅពេលបានរំឮករឿងរ៉ាវដែលខ្មែរក្រហមបានប្រព្រឹត្តមកលើប្រជាពលរដ្ឋកម្ពុជាក្នុងរបបកម្ពុជាប្រជាធិបតេយ្យនោះ។
សុខណា បញ្ជាក់ថា “តាមរយៈការសិក្សាស្រាវជ្រាវ និងការនិយាយប្រាប់ពីម៉ាក់ និងយាយ ខ្មែរក្រហមឃោរឃៅខ្លាំងណាស់ ហើយខ្ញុំពិតជាអាណិតប្រជាជនដែលបានរងគ្រោះដោយរបបខ្មែរក្រហម។”
សុខណា បន្ថែមថា ក្នុងនាមជាយុវជនជំនាន់ក្រោយដែលកើតមិនទាន់របបប្រល័យពូជសាសន៍នោះ កញ្ញាមិនចង់ឃើញរបបសាហាវយង់ខ្នងនេះកើតឡើងជាថ្មីនៅលើទឹកដីនៃប្រទេសកម្ពុជាទៀតនោះទេ។ ដូច្នេះសម្រាប់យោបល់ សុខណា ការទប់ស្កាត់នៃរបបឃោរឃៅនោះ យុវជនទាំងអស់ត្រូវចងចាំង និងរៀនសូត្រប្រវត្ដិសាស្ដ្រកម្ពុជាឱ្យបានច្បាស់លាស់ “ចំពោះខ្ញុំ ខ្ញុំគិតថាប្រជាជនយើងត្រូវតែមានការរៀនសូត្រប្រវត្តិសាស្ដ្រ ហើយចងចាំនូវការឈឺចាប់មួយនឹងទុក។”
យុវតីម្នាក់ទៀតឈ្មោះ ពិសិដ្ឋ មូនីកា ជាសិស្សរួមថ្នាក់នឹង សុខណា ដែរ ក៏យល់ឃើញថា របបខ្មែរក្រហមពិតជាសាហាវព្រៃផ្សៃ។ មូនីកា ថា “ចាស លោកគ្រូ របបខ្មែរក្រហមឃោរឃៅខ្លាំងតែម្ដង ដោយសារតែគាត់ធ្វើបាបទៅលើប្រជាជនខ្មែរស្លូតត្រង់។”
មូនីកា បន្ថែមថា ដើម្បីទប់ស្កាត់ពីការកើតឡើងនៃរបបសាហាវព្រៃផ្សៃដូចរបបខ្មែរក្រហមនេះ យុវជនជំនាន់ក្រោយ “ត្រូវខិតខំរៀនសូត្រប្រវត្តិសាស្ដ្រ និងគ្រប់គ្រងអារម្មណ៍ខ្លួនឯង ហើយនឹងចងចាំពីអតីតកាលដ៏ជូរចត់របស់បងប្អូនខ្មែរយើង។”
សូមបញ្ជាក់ថា ការលើកឡើងជាទស្សនៈផ្ទាល់ខ្លួនរបស់យុវតីខាងលើនេះ ត្រូវបានធ្វើឡើងនៅខណៈពេលពួកគេមកបំពេញទស្សនកិច្ចសិក្សានៅសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែងកាលពីព្រឹកថ្ងៃទី១៩ ខែកក្កដា ឆ្នាំ២០២៣។ នៅក្នុងថ្ងៃនេះ សិស្សានុសិស្សប្រមាណ ២២០ នាក់ មកពីវិទ្យាល័យព្រះបាទសុរាម្រឹត ក្នុងក្រុងកំពង់ឆ្នាំង ខេត្តកំពង់ឆ្នាំង បានមកទស្សនកិច្ចសិក្សាស្វែងយល់អំពីប្រវត្តិសាស្ដ្រនៅក្នុងសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង និងវិមាន ឈ្នះ ឈ្នះ ក្រោមការរៀបចំដោយអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) ឬសាលាក្ដីខ្មែរក្រហម។ ក្នុងអំឡុងពេលទស្សនកិច្ចនេះ សិស្សានុសិស្សទាំងអស់ក៏ទទួលបានការធ្វើបទបង្ហាញរបស់មន្ដ្រីមកពីសាលាក្ដីខ្មែរក្រហមផងដែរ ពីដំណើរការជំនុំជម្រះក្ដី និងសមិទ្ធផលដែលទទួលបានពីការជំនុំជម្រះក្ដីលើអតីតមេដឹកនាំជាន់ខ្ពស់នៃរបបខ្មែរក្រហម។
គោលបំណងនៃកម្មវិធីនេះ គឺដើម្បីឱ្យសិស្សានុសិស្សទាំងអស់បានចងចាំ និងស្វែងយល់ឱ្យកាន់តែច្បាស់អំពី សោកនាដកម្មដែលកើតមានឡើងនៅក្នុងរបបឃោរឃៅខ្មែរក្រហម និងចូលរួមទប់ស្កាត់ការវិលត្រឡប់មកវិញនូវអំពើឃោរឃៅដូចក្នុងរបបខ្មែរក្រហមផងដែរ។
គួររំឮកថា កម្មវិធីទស្សនកិច្ចសិក្សានេះត្រូវបានរៀបចំរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ។ ចាប់តាំងពីឆ្នាំ ២០០៩ រហូតមកដល់ឆ្នាំ២០២៣ នេះ សាធារណជនជាតិ និងអន្តរជាតិជាងកន្លះលាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
