អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នៅថ្ងៃទី១៦ ខែសីហា ឆ្នាំ២០២៣ នេះ បានរៀបចំកម្មវិធីទស្សនកិច្ចសិក្សាជូនសិស្សានុសិស្សប្រមាណ ១៥០ នាក់ មកពីវិទ្យាល័យ ប៊ុន រ៉ានី ហ៊ុន សែន ព្រែកតាដួង ស្រុកទឹកឈូ ខេត្តកំពត ទៅទស្សនកិច្ចសិក្សាស្វែងយល់អំពីសោកនាដកម្មដែលកើតមានឡើងនៅសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង និងប្រវត្តិសាស្ដ្រនៅក្នុងវិមានឈ្នះ ឈ្នះ។ ទស្សនកិច្ចសិក្សានេះមានគោលបំណងឱ្យយុវជនទាំងអស់បានស្វែងយល់ឱ្យច្បាស់អំពីសោកនាដកម្មដែលកើតមានឡើងនៅក្នុងរបបឃោរឃៅខ្មែរក្រហម និងចូលរួមទប់ស្កាត់អំពើឃោរឃៅដូចក្នុងរបបខ្មែរក្រហម។
ក្នុងពេលចូលទស្សនកិច្ចសិក្សានៅក្នុងសារៈមន្ទីរទួលស្លែង សិស្សានុសិស្សត្រូវបានទទួលស្វាគមន៍ និងបទបង្ហាញពីមន្ដ្រីផ្នែកកិច្ចការសាធារណៈនៃសាលាក្ដីខ្មែរក្រហម អំពីដំណើរការជំនុំជម្រះក្ដី សមិទ្ធផលដែលទទួលបានពីការជំនុំជម្រះក្ដី និងដំណើរការងារសេសសល់ដែលអង្គជំនុំជម្រះកំពុងអនុវត្តនាពេលបច្ចុប្បន្ននេះ។ មន្ទាប់ពីបំពេញទស្សនកិច្ចនៅសារៈមន្ទីរទួលស្លែង សិស្សានុសិស្សបានបន្ដទៅទស្សនកិច្ចសិក្សានៅវិមានឈ្នះ ឈ្នះ បន្ដទៀត។
ក្រោយពេលបញ្ចប់ទស្សនកិច្ចសិក្សានៅក្នុងមួយថ្ងៃនេះ សិស្សានុសិស្សទាំងអស់ត្រូវបានរំពឹងទុកថា នឹងទទួលបានព័ត៌មាន និងចំណេះដឹងយ៉ាងច្រើនជុំវិញការងារជំនុំជម្រះក្ដីនៅក្នុងសាលាក្ដីខ្មែរក្រហម រឿងរ៉ាវទាក់ទងនឹងការធ្វើទារុណកម្មយ៉ាងព្រៃផ្សៃ និងការកាប់សម្លាប់ប្រជាពលរដ្ឋកម្ពុជានៅក្នុងរបបខ្មែរក្រហម និងការពលីរបស់រាជរដ្ឋាភិបាលកម្ពុជាក្នុងការរំដោះប្រទេសជាតិចេញពីរបបប្រល័យពូជសាសន៍នោះ។
សូមបញ្ជាក់ថា កម្មវិធីទស្សនកិច្ចសិក្សានេះ ត្រូវបានរៀបចំរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំងពីឆ្នាំ២០០៩ រហូតមកដល់ឆ្នាំ ២០២៣ នេះ មានសាធារណៈជនជាតិ និងអន្តរជាតិ ជាង ៦០ ម៉ឺននាក់ នាក់ហើយ ដែលបានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
