អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) ឬសាលាក្ដីខ្មែរក្រហម នៅថ្ងៃពុធ ទី២០ ខែកញ្ញា ឆ្នាំ ២០២៣ បានដឹកនាំសិស្ស និស្សិត សរុប២០០នាក់ ដែលកំពុងសិក្សាក្នុងវិទ្យាល័យចំរើនវិជ្ជាវិទ្យាល័យ ហ៊ុន សែន កំពង់លាវ និងវិទ្យាស្ថានក្រុងអង្គរ ក្នុងក្រុងព្រៃវែង ខេត្តព្រៃវែង ទៅសិក្សាស្វែងយល់អំពី វិមាន ឈ្នះ-ឈ្នះ មជ្ឈមណ្ឌលប្រល័យពូជសាសន៍ជើងឯក និងសារៈមន្ទីរឧក្រិដ្ឋកម្មប្រល័យពូជសាន៍ទួលស្លែង។ ក្នុងដំណើរទស្សនកិច្ចសិក្សានេះ មន្ដ្រីផ្នែកកិច្ចការ សាធារ ណៈនៃ អ.វ.ត.ក. ក៏បានទទួលស្វាគមន៍ និងធ្វើបទបង្ហាញអំពីសមិទ្ធផល នៃការជំនុំជម្រះក្ដី និងបច្ចុប្បន្នភាពកិច្ចការរបស់ អ.វ.ត.ក. ជូនយុវជនទាំងអស់ផងដែរ។
លោក ទេស សាបាន នាយករដ្ឋបាលសាលាក្រុងព្រៃវែង និងជាតំណាងក្រុមដឹកនាំសិស្ស និស្សិតទាំងអស់ បានថ្លែងកោតសរសើរ និងអរគុណដល់សាលាក្ដីខ្មែរក្រហមដែលបានរៀបចំកម្មវិធីទស្សនកិច្ចសិក្សានេះឡើង ដោយលោកថា កម្មវិធីទស្សនកិច្ចសិក្សានេះ បានជួយឱ្យយុវជនបានស្វែងយល់ អំពីប្រវត្តិសាស្ដ្រពិតប្រាកដនៃរបបឃោរឃៅខ្មែរក្រហម និងយល់ច្បាស់ពីតម្លៃនៃសន្ដិភាព។ លោក សាបាន ក៏បានថ្លែងអំណរគុណដល់ក្រុមការងារវិមាន ឈ្នះ-ឈ្នះ ដែលបានរៀបចំមគ្គុទ្ទេសន៍ ពន្យល់យ៉ាងក្បោះក្បាយដល់យុវជនទាំងអស់ឱ្យបានយល់ដឹង ពីគោលនយោបាយ ឈ្នះ-ឈ្នះ របស់សម្ដេចតេជោ ហ៊ុន សែន ដែលបានផ្ដល់ឱ្យកម្ពុជាទទួលបានសុខសន្ដិភាព និងរីកចម្រើនលើគ្រប់វិស័យរហូតមកដល់សព្វថ្ងៃនេះ។
កញ្ញា គួច សុគន្ធា ជាសិស្សថ្នាក់ទី១២ “B” នៃវិទ្យាល័យ ហ៊ុន សែន កំពង់លាវ បានបញ្ជាក់ថា កញ្ញាទទួលបានចំណេះដឹងច្រើនអំពីវិមាន ឈ្នះ-ឈ្នះ និងប្រវត្ដិសាស្ដ្រទាក់ទងនឹងរបបឃោរឃៅខ្មែរក្រហម នៅពេលបានចូលរួមនៅក្នុងទស្សនកិច្ចសិក្សានៅថ្ងៃនេះ។ សម្រាប់ សុគន្ធា ការយល់ដឹងច្បាស់អំពីប្រវត្តិសាស្ដ្ររបស់កម្ពុជា នឹងជួយឱ្យយុវជនជំនាន់ក្រោយយល់ពីតម្លៃនៃសន្ដិភាព និងចូលរួមទប់ស្កាត់កុំឱ្យកើតមានអំពើឃោរឃៅដូចរបបខ្មែរក្រហមបាន។
យុវជន ពយ គីមហុង ជាសិស្សរៀនថ្នាក់ទី១២ “B” នៃវិទ្យាល័យ ហ៊ុន សែន កំពង់លាវ ដែរ បានលើកឡើងស្រដៀងគ្នាដែរថា លោកទទួលបានចំណេះដឹងថ្មីៗជាច្រើននៅពេលចូលរួមនៅក្នុងពេលទស្សនកិច្ចសិក្សាថ្ងៃនេះ។ គីមហុង បន្ថែមថា ចំណេះដឹងដែលទទួលបាននេះ គឺមានសារៈសំខាន់ដើម្បីអប់រំយុវជនជំនាន់ក្រោយឱ្យយល់ដឹងអំពីទុក្ខវេទនារបស់ពលរដ្ឋកម្ពុជានៅក្នុងរបបខ្មែរក្រហម។ ក្នុងនាមយុវជនជំនាន់ក្រោយ គីមហុង មិនចង់ឱ្យកើតមានរបបឃោរឃៅដូចនោះកើតឡើងនៅក្នុងប្រទេសកម្ពុជា ជាថ្មីម្ដងទៀតនោះទេ ដោយលោកយល់ថា យុវជនត្រូវសិក្សាស្វែងយល់ប្រវត្តិសាស្ដ្ររបស់ខ្លួនឱ្យបានច្បាស់លាស់ ចេះសាមគ្គីគ្នា ចូលរួមគ្នាក្នុងការរក្សាសន្ដិភាពដែលមាន មិនត្រូវកេងប្រវ័ញ្ច និងមិនត្រូវរើសអើងជាតិសាសន៍ណាមួយឡើយ។
សូមបញ្ជាក់ថា អ.វ.ត.ក. បានរៀបចំកម្មវិធីទស្សនកិច្ចសិក្សា ជូនសិស្សានុសិស្ស និស្សិត យុវជន និងពលរដ្ឋទូទៅ រៀងរាល់សប្ដាហ៍ ដើម្បីចូលរួមក្នុងការជម្រុញដល់ការចងចាំ និងចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំងពីឆ្នាំ២០០៩ រហូតមកដល់ឆ្នាំ ២០២៣ នេះ មានសាធារណៈជនជាតិ និងអន្តរជាតិ ជាង ៦០ ម៉ឺននាក់ហើយ ដែលបានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
រូបថតដោយ៖ គុណ ចិន្ដា
