នាថ្ងៃទី២២ ខែកក្កដា ឆ្នាំ២០២៤ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) បានរៀបចំកម្មវិធីផ្សព្វផ្សាយតាមរយៈ មជ្ឈមណ្ឌលធនធាន អ.វ.ត.ក. ចល័ត នៅក្នុងបរិវេណវិទ្យាល័យ ហ៊ុន សែន ឈូក ក្នុងស្រុកឈូក ខេត្តកំពត។ មានសិស្សានុសិស្សចំនួន ៨៨៥នាក់ បានចូលរួមសិក្សាស្វែងយល់អំពីសមិទ្ធផលរបស់ អ.វ.ត.ក. តាមរយៈសកម្មភាពផ្សេងគ្នារួមមាន ការធ្វើបទបង្ហាញនៅក្នុងមជ្ឈមណ្ឌលធនធានចល័ត កិច្ចពិភាក្សាអន្ដរជំនាន់ជាមួយអ្នករស់រានមានជីវិតពីរបបខ្មែរក្រហម និងជាដើមបណ្តឹងរដ្ឋប្បវេណីដែលបានផ្ដល់សក្ខីកម្មនៅចំពោះមុខ អ.វ.ត.ក. ស្វែងយល់តាមរយៈការតាំងពិពណ៌រូបថតស្ដីអំពីដំណើរការជំនុំជម្រះក្ដីរបស់ អ.វ.ត.ក. និងការចែកចាយឯកសារស្ដីអំពី អ.វ.ត.ក.។
សូមបញ្ជាក់ថា ចាប់ពីថ្ងៃទី២២ ដល់ថ្ងៃទី២៧ ខែកក្កដា ឆ្នាំ២០២៤ មជ្ឈមណ្ឌលធនធាន អ.វ.ត.ក. ចល័ត បាននឹងកំពុងចុះផ្សព្វផ្សាយអំពីសមិទ្ធផលរបស់ អ.វ.ត.ក. នៅក្នុងវិទ្យាល័យចំនួន៧ ក្នុងខេត្តកំពត និងខេត្ដកែប។ វិទ្យាល័យទាំងនោះរួមមាន វិទ្យាល័យ ហ៊ុន សែន ឈូក វិទ្យាល័យមិត្តភាព កម្ពុជា-ជប៉ុន វិទ្យាល័ ព្រះបិតាជាតិ វិទ្យាល័យ ជា ស៊ីម អង្គរជ័យ វិទ្យាល័យ ប៊ុន រ៉ានី ហ៊ុន សែន ចរិយាវង្ស និងវិទ្យាល័យ ហ៊ុន សែន ចំការដូង។
