អង្គ​ភាព​គាំ​ពារ​ជន​រង​គ្រោះ​រៀប​ចំ​​កិច្ច​​ប្រជុំ​រវាង​ដើម​បណ្តឹង​រដ្ឋប្ប​វេណី ​និង​មេធាវី​ដើម​បណ្តឹង​រដ្ឋ​ប្ប​វេណី​ក្នុង​សំណុំ​រឿង ​០០២​

អង្គភាពគាំពារជនរងគ្រោះ នៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) រៀប ចំ កិច្ច ប្រជុំ រវាងដើមបណ្តឹងរដ្ឋប្បវេណីនិងមេធាវីដើមបណ្តឹងរដ្ឋប្បវេណីក្នុងសំណុំរឿង០០២ ក្រោមអធិបតីភាព ឯកឧត្តម ក្រាញ់ តូនី ប្រធានការិយាល័យរដ្ឋបាលស្តីទី នៃ អ.វ.ត.ក និង ឯកឧត្តម Joachim Baron von Marschall ឯកអគ្គរដ្ឋទូតសាធារណរដ្ឋអាល្លឺម៉ង់ប្រចាំកម្ពុជា។ កិច្ចប្រជុំនេះ នឹងប្រព្រឹត្តទៅនៅថ្ងៃចន្ទ ទី៦ ខែតុលា ឆ្នាំ២០១៤ នៅអគារ លេខ១៩-២១ ផ្លូវ៣៣០ សង្កាត់បឹងកេងកងបី ខណ្ឌចំការមន រាជធានីភ្នំពេញ។ (អត្តសញ្ញាណរបស់ដើមបណ្តឹងរដ្ឋ ប្បវេណីនឹងត្រូវរក្សាជាសម្ងាត់)។

គោលបំណងនៃកិច្ចប្រជុំ រួមមាន (១) ផ្តល់ព័ត៌មានស្តីពីការប្រកាសសាលក្រមសំណុំរឿង ០០២/០១ ដល់ដើមបណ្តឹងរដ្ឋប្បវេណី និងផ្តល់ព័ត៌មានស្តីពីដំណើរការក្តីនៅ អ.វ.ត.ក (២) ផ្តល់ឱកាសឲ្យដើមបណ្តឹងរដ្ឋប្បវេណីបានជួប ពិភាក្សាផ្ទាល់ជាមួយមេធាវីរបស់ខ្លួនស្តីពីបញ្ហាផ្សេងៗ ទាក់ទងនឹងសំណុំរឿង ០០២/០២ និង (៣) ផ្តល់ព័ត៌មានដល់ដើម
បណ្តឹងរដ្ឋប្បវេណីស្តីពីការវិវឌ្ឍទៅនៃគម្រោងសំណងដើមបណ្តឹងរដ្ឋប្បវេណីសំណុំរឿង ០០២ និងវិធានការនានា មិនពាក់ព័ន្ធនឹងបច្ចេកទេសតុលាការ។        

ដើមបណ្តឹងរដ្ឋប្បវេណីប្រមាណ២២០នាក់រួមទាំងជនរងគ្រោះដោយអំពើហិង្សាផ្លូវភេទនៅសម័យខ្មែរក្រហមផងនឹងត្រូវអញ្ចើញឲ្យមកចូលរួមក្នុងកិច្ចប្រជុំនេះ។ ពួកគាត់មកពីរាជធានីភ្នំពេញ និងខេត្តផ្សេងៗ ជារួមមានខេត្ត កណ្តាល កំពង់ស្ពឺ កំពត ក្រចេះ បន្ទាយមានជ័យ ពោធិ៍សាត់ បាត់ដំបង កំពង់ឆ្នាំង កំពង់ចាម ស្ទឹងត្រែង ស្វាយរៀង ព្រៃវែង និងតាកែវ។