ដោយមានការសម្របសម្រួល និងជំនួយពីអង្គភាពគាំពារជនរងគ្រោះ ដើមបណ្តឹងរដ្ឋប្បវេណីចំនួន ១៥០ នាក់បានចូលរួមស្តាប់ការប្រកាសសាលដីកាលើបណ្តឹងសាទុក្ខដោយអង្គជំនុំជម្រះតុលាការកំពូលនៃ អ.វ.ត.ក នៅថ្ងៃទី២២ ខែកញ្ញា ឆ្នាំ២០២២។ ពួកគាត់តំណាងឲ្យផ្នែកដ៏ធំនៃដើមបណ្តឹងរដ្ឋប្បវេណីដែលជ្រើសរើសផ្អែកលើលក្ខណវិនិច្ឆ័យមានដូចជា ភេទ ជាតិពន្ធុ ទីតាំងភូមិសាស្រ្ត និងបទចោទដែលបានលើកមកសួរដេញដោលនៅពេលសវនាការក្នុងសំណុំរឿង ០០២/០២។ បន្ទាប់ពីស្តាប់ការប្រកាសសាលដីកា ដើមបណ្តឹងរដ្ឋប្បវេណីបានធ្វើដំណើរទៅកាន់មជ្ឈមណ្ឌលប្រជុំ DK Meeting Center នៅរាជធានីភ្នំពេញ ដើម្បីជួបជាមួយតំណាងផ្លូវច្បាប់របស់ខ្លួន និងពិភាក្សាអំពីសាលដីកានោះ។ ពួកគាត់បានសម្តែងក្តីសោមនស្សរីករាយចំពោះសាលដីកា និងបានលើកឡើងនូវបញ្ហាមួយចំនួន ដែលមានសារសំខាន់ចំពោះពួកគាត់ និងសហគមន៍របស់ពួកគាត់។
មួយរយៈពេលកន្លងមក ការរីករាលដាលនៃជំងឺកូវីដ-១៩ ពុំអាចអនុញ្ញាតឲ្យមានការជួបជុំជាទ្រង់ទ្រាយធំបានទេ។ ហេតុនេះ អង្គភាពគាំពារជនរងគ្រោះបានសម្របសម្រួលនិងរៀបចំឲ្យមានការជួបជុំតូចៗនៅតាមសហគមន៍ អនុញ្ញាតឲ្យដើមបណ្តឹងរដ្ឋប្បវេណីបានជួបជាមួយតំណាងផ្លូវច្បាប់របស់ខ្លួន ដើម្បីទទួលបានព័ត៌មានស្តីពីការវិវត្តថ្មីៗនៃសំណុំរឿង ០០២/០២។ តាំងពីដើមឆ្នាំ២០២២ មក អង្គភាពគាំពារជនរងគ្រោះបានរៀបចំវេទិកាចំនួនបីលើក ហើយនឹងនៅតែបន្ត រៀបចំវេទិកានានាបន្ថែមទៀត ដើម្បីផ្សព្វផ្សាយពីបច្ចុប្បន្នភាពនៃសាលដីកាលើបណ្តឹងសាទុក្ខរបស់ អ.វ.ត.ក។ អង្គភាពគាំពារជនរងគ្រោះក៏បានសម្របសម្រួលផងដែរ ដើម្បីឲ្យដើមបណ្តឹងរដ្ឋប្បវេណីបានចូលរួមក្នុងអង្គសិក្ខាសាលាស្តីពីជនរងគ្រោះ កាលពីខែឧសភា ឆ្នាំ២០២២ ដែលរៀបចំដោយការិយាល័យរដ្ឋបាលនៃ អ.វ.ត.ក និងបានជួបជាមួយក្រុមម្ចាស់ជំនួយចម្បងសម្រាប់ អ.វ.ត.ក (PDG) ដើម្បីពិភាក្សាអំពីក្តីព្រួយបារម្ភ និងសំណើរបស់ពួកគាត់ជាបន្តទៀត។
ការសម្របសម្រួលឲ្យដើមបណ្តឹងរដ្ឋប្បវេណីបានចូលរួមទៅក្នុងវេទិកា សវនាការ និងការពិភាក្សាជាមួយមេធាវី គឺជាការងាររបស់អង្គភាពគាំពារជនរងគ្រោះ។ ការងារថ្មីៗនេះអាចដំណើរការទៅបាន ដោយសារមានការផ្តល់ថវិកាពីគម្រោងសេវាកម្មសន្តិភាពសម្រាប់ជនស៊ីវិល (Civil Peace Services) នៃអង្គការ GIZ។