ការស្ទង់មតិរបស់សិស្សានុសិស្ស និស្សិត យុវជន និងប្រជាពលរដ្ឋ បានបង្ហាញថា ទស្សនកិច្ចសិក្សា ដែលរៀបចំឡើងដោយអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) មានសារៈសំខាន់សម្រាប់យុវជនជំនាន់ក្រោយ។ បើតាមអ្នកចូលរួមក្នុងការស្ទង់មតិនេះ ទស្សនកិច្ចសិក្សានេះបានផ្ដល់ចំណេះដឹងបន្ថែមអំពីការកាត់ទោសមេដឹកនាំខ្មែរក្រហម និងប្រវត្តិសាស្ដ្រដ៏ជូរចត់ដែលកើតមានឡើងនៅក្នុងរបបខ្មែរក្រហម តាមរយៈការធ្វើបទបង្ហាញពីមន្ដ្រីពាក់ព័ន្ធ និងទស្សនាមជ្ឈមណ្ឌលប្រល័យពូជសាសន៍ជើងឯក សារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង និងវិមានឈ្នះ ឈ្នះ។
ការស្ទង់មតិនេះបានចាប់ផ្ដើមពីថ្ងៃទី ១៥ ខែ កុម្ភៈ ឆ្នាំ២០២៣ ដល់ថ្ងៃទី ៦ ខែមេសា ឆ្នាំ ២០២៣ សម្រាប់យុវជន សិស្ស និស្សិត និងលោកគ្រូអ្នកគ្រូ ចំនួន ៣៤៣០ នាក់ ដែលបានមកចូលរួមក្នុងកម្មវិធីទស្សនកិច្ចសិក្សារៀបចំឡើងដោយសាលាក្ដីខ្មែរក្រហម។ ក្នុងចំណោមអ្នកចូលរួមទាំងអស់ មាន ១៥២៧ នាក់ បានចូលរួមបញ្ចេញមតិរបស់ អ.វ.ត.ក ដែលត្រូវបានរៀបចំឡើងតាមប្រព័ន្ធអេឡិចត្រូនិច។
