លទ្ធផលនៃការស្ទង់មតិរបស់អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បង្ហាញថា ចំណេះដឹងដែលទទូលបានតាមរយៈការមកចូលរួមក្នុងកម្មវិធីទស្សនកិច្ចសិក្សារបស់ អ.វ.ត.ក ពិតជាមានសារៈ សំខាន់សម្រាប់អ្នកចូលរួមទាំងអស់។
នៅក្នុងសំណួរទី៣ នៃការស្ទង់មតិរបស់ អ.វ.ត.ក ដែលសួរថា តើអ្នកយល់ថា ចំណេះដឹងដែលអ្នកទទួលបាននៅក្នុងពេលចូលរួមកម្មវិធីទស្សនកិច្ចនេះ មានសារៈសំខាន់ដែរ ឬទេ? ជាលទ្ធផលមានសាធារណៈជនចំនួន ១ ២៧៤ នាក់ បានចូលរួមឆ្លើយនឹងសំណួរនេះ។ ក្នុងចំណោមនោះ ចំនួន ៩៤៥ នាក់ ស្មើនឹង ៧៤ ភាគរយ បានឆ្លើយថា ចំណេះដឹងនេះមានសារៈសំខាន់ណាស់សម្រាប់ពួកគាត់ និងចំនួន ៣២១ នាក់ ស្មើនឹង ២៥ ភាគរយ បានឆ្លើយថា ចំណេះដឹងនេះមានសារៈសំខាន់។
ជាងនេះទៅទៀត អ្នកចូលរួមមួយចំនួនបានលើកឡើជាមតិ និងយោបល់ថា៖
«ទស្សនៈកិច្ចសិក្សានេះ គឺជាការទស្សនានូវរបកគំហើយនៃការគ្រប់គ្រងក្នុងរបបកម្ពុជាប្រជាធិបតេយ្យ ដែលបានបន្សល់ទុកនូវភស្តុតាងយ៉ាងជាក់លាក់ ក្នុងការធ្វើទារុណកម្ម,ការសម្លាប់យ៉ាងរង្គៀល និងឃោរឃៅជាទីបំផុត ធ្វើឱ្យខ្ញុំបាទមានការតក់ស្លុតសង្រេង និងសោកស្តាយជាខ្លាំង ចំពោះទង្វើដ៏ព្រៃផ្សៃមួយនេះ។»
«នាងខ្ញុំចង់សំណូមពរ អោយមាន កម្មវិធីទស្សនកិច្ចសិក្សា បែបនេះដើម្បីឲ្យយុវជន ជំនាន់ក្រោយ នៅតែចងចំានៅប្រវិត្តសាស្ត្រដ៏ ឃោរឃៅ ព្រៃផ្សៃ នេះ ដក់ជាប់ក្នុងដួងចិត្តរបស់យុវជន កម្ពុជា។»
«ក្នុងនាមខ្ញុំបាទជានិស្សិតមួយរូបខ្ញុំសូមឲ្យមានទស្សនកិច្ចបែបនេះបន្តទៀតដើម្បីឲ្យកូនខ្មែរគ្រប់រូបទទួលបាននូវចំណេះដឹង យល់ដឹងពីប្រវត្តិសាស្រ្តរបស់ប្រទេសខ្លួនឯង និងភូមិសាស្រ្តប្រទេសកម្ពុជា និងជាចុងក្រោយខ្ញុំបាទសូមអំណរអរគុណដល់លោកគ្រូ អ្នកគ្រូដែលចំណាយដ៏មានតម្លៃរៀបចំទស្សនកិច្ចនេះឡើង។សូមអរគុណ!»។
ការស្ទង់មតិនេះបានចាប់ផ្ដើមពីថ្ងៃទី ១៥ ខែ កុម្ភៈ ឆ្នាំ២០២៣ ដល់ថ្ងៃទី ៦ ខែមេសា ឆ្នាំ ២០២៣ សម្រាប់យុវជន សិស្ស និស្សិត និងលោកគ្រូអ្នកគ្រូ ចំនួន ៣៤៣០ នាក់ ដែលបានមកចូលរួមក្នុងកម្មវិធីទស្សនកិច្ចសិក្សារៀបចំឡើងដោយសាលាក្ដីខ្មែរក្រហម។ ក្នុងចំណោមអ្នកចូលរួមទាំងអស់ មាន ១៥២៧ នាក់ បានចូលរួមក្នុងកម្មវិធីស្ទង់មតិរបស់ អ.វ.ត.ក ដែលត្រូវបានរៀបចំឡើងតាមប្រព័ន្ធអេឡិចត្រូនិច។
