អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានរៀបចំកម្មវិធីទស្សនកិច្ចសិក្សាជូនសិស្សានុស្សប្រមាណ ១៥០ នាក់ មកពីវិទ្យាល័យ ហ៊ុន សែន ពាមជីកង ស្ថិតក្នុងស្រុកកងមាស ខេត្តកំពង់ចាម នៅថ្ងៃទី ១៨ ខែ ឧសភា ឆ្នាំ២០២៣។
សិស្សានុសិស្សដែលបានចូលរួមក្នុងកម្មវិធីទស្សនកិច្ចសិក្សានៅក្នុងថ្ងៃទី ១៨ ឧសភា នេះ បានលើកឡើងស្រដៀងៗគ្នាថា ទស្សនកិច្ចសិក្សានេះពិតជាមានសារៈសំខាន់សម្រាប់ផ្ដល់ចំណេះដឹងប្រវត្តិសាស្ដ្រច្បាស់លាស់អំពីរឿងរ៉ាវឃោរឃៅកើតមានឡើងនៅក្នុងរបបខ្មែរក្រហម ដំណើរតស៊ូរំដោះជាតិ និងការជំនុំជម្រះក្ដីលើរបបប្រល័យពូជសាសន៍។
យុវសិស្ស ថៃ វិទ្យា ជាសិស្សថ្នាក់ទី១២ នៃវិទ្យាល័យ ហ៊ុន សែន ពាមជីកង បានលើកឡើងថា “សម្រាប់ខ្ញុំផ្ទាល់ការមកទស្សនកិច្ចលើកនេះគឺវាសំខាន់ ព្រោះអីក្នុងការមកទស្សនកិច្ចទាំងបីកន្លែងនេះពិតជាធ្វើឱ្យក្នុងនាមខ្ញុំជាកូនខ្មែរម្នាក់ត្រូវតែដឹងអំពីប្រវត្ដិសាស្ដ្ររបស់យើង ទុកប្រាប់កូនចៅរបស់យើងឱ្យបានដឹងជំនាន់ក្រោយៗរហូត។” វិទ្យា បន្ថែមថា លោកពិតជាទទួលបានចំណេះដឹងច្រើនពីការចូលរូមក្នុងកម្មវិធីទស្សនកិច្ចនេះ ព្រោះលោកបានយកចិត្តទុកដាក់ស្ដាប់ការណែនាំ និងការពន្យល់បកស្រាយ របស់មន្ដ្រីពាក់ព័ន្ធនៅតាមទីតាំងនីមួយៗ។
យុវតី ផន កញ្ញា ក៏បានលើកឡើងស្រដៀងគ្នានេះដែរថា “ទស្សនកិច្ចហ្នឹងមានសារៈសំខាន់ ព្រោះអីជួយផ្ដល់ឱ្យយើងនូវចំណេះដឹងច្រើន ហើយទៅយើងក៏ដឹងថាពីមុនមកនឹងប្រទេសកម្ពុជាយើងជួបរឿងអ្វីខ្លះ។” យុវតីរូបនេះបន្ថែមថា ខ្លួនទទួលបានចំណេះដឹងអំពីប្រវត្តិសាស្ដ្រពាក់ព័ន្ធនឹងរបបកម្ពុជាប្រជាធិបតេយ្យច្រើន និងច្បាស់ជាងមុន នៅពេលបានមកចូលរួមក្នុងកម្មវិធីទស្សនកិច្ចសិក្សានៅថ្ងៃនេះ ព្រោះបានឃើញទិដ្ឋភាពជាក់ស្ដែង និងបានស្ដាប់ការបកស្រាយនៅតាមទីតាំងនីមួយៗ។
យុវសិស្ស ទ្រី ចន្ធោ ក៏បានបញ្ជាក់ដែរថា “(ទស្សនកិច្ចនេះ)មានសារៈសំខាន់ ព្រោះអីធ្វើឱ្យយើងបានដឹងប្រវត្តិសាស្ដ្រច្បាស់ជាងមុន ហើយយើងជាកូនខ្មែរបើយើងមិនដឹងប្រវត្តិសាស្ដ្រនៅជុំវិញយើងហ្នឹង គឺដូចជាអត់មែនជាកូនខ្មែរ....ព្រោះអីយើងជាកូនខ្មែរយើងត្រូវដឹងមូលហេតុ នៃរឿងរ៉ាវប្រវត្តិសាស្ដ្ររបស់យើង ដើម្បីឱ្យប្រទេសជិតខាងដឹងថាកូនខ្មែរស្គាល់ប្រវត្តិសាស្ដ្ររបស់យើង។
យុវសិស្សខាងលើក៏បានសំណូមពរដល់សាលាក្ដីខ្មែរក្រហម ឱ្យបន្ដរក្សារៀបចំកម្មវិធីទស្សនកិច្ចសិក្សានេះទៅយុវជនផ្សេងៗទៅផងដែរ ដើម្បីឱ្យពួកគេបានមកឃើញ និងស្វែងយល់រឿងរ៉ាវប្រវត្តិសាស្ដ្ររបស់ប្រទេសកម្ពុជា។
សូមបញ្ជាក់ថា ក្នុងកម្មវិធីទស្សនកិច្ចនេះ សិស្សានុសិស្សទាំងអស់ត្រូវបាននាំយកទៅទស្សនកិច្ច វិមាន ឈ្នះ ឈ្នះ សារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង មជ្ឈមណ្ឌលប្រល័យពូជសាសន៍ជើងឯក និងមានបទបង្ហាញអំពីការជំនុំជម្រះក្ដី និងកេរដំណែលនៃការជំនុំជម្រះក្ដីលើអតីមេដឹកនាំជាន់ខ្ពស់នៃរបបឃោរឃៅខ្មែរក្រហមផងដែរ។ គោលបំណងនៃកម្មវិធីនេះ គឺដើម្បីជួយជម្រុញយុវជនឱ្យបានយល់ដឹងបន្ថែម និងចងចាំអំពីសោកនាដកម្មរបស់ប្រជាជនកម្ពុជានៅក្នុងរបបខ្មែរក្រហម និងការជំនុំជម្រះក្ដីលើឧក្រិដ្ឋកម្មក្នុងរបបឃោរឃៅនោ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំងពីឆ្នាំ ២០០៩ រហូតមកដល់ឆ្នាំ២០២៣ នេះ សាធារណជនជាតិ និងអន្តរជាតិជាងកន្លះលាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
