អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នៅថ្ងៃទី៣០ ខែសីហា ឆ្នាំ២០២៣ នេះ បានរៀបចំកម្មវិធីទស្សនកិច្ចសិក្សាជូនសិស្សានុសិស្សប្រមាណ ២០០ នាក់ មកស្រុកពាមរកិ៍ ខេត្តព្រៃវែង ទៅទស្សនកិច្ចសិក្សានៅសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង មជ្ឈមណ្ឌលប្រល័យពូជសាសន៍ជើងឯក និងវិមានឈ្នះ ឈ្នះ។ ទស្សនកិច្ចសិក្សានេះមានគោលបំណងឱ្យយុវជនទាំងអស់បានស្វែងយល់ឱ្យច្បាស់អំពីសោកនាដកម្មដែលកើតមានឡើងនៅក្នុងរបបឃោរឃៅខ្មែរក្រហមដើម្បីចូលរួមទប់ស្កាត់អំពើឃោរឃៅ និងយល់ដឹងអំពីគោលនយោបាយឈ្នះ ឈ្នះ ដែលបាននាំមកនូវការបញ្ចប់សង្គ្រាមស៊ីវិលទាំងស្រុងក្នុងប្រទេសកម្ពុជា។
ក្នុងដំណើរទស្សនកិច្ចសិក្សានេះ សិស្សានុសិស្សទាំងអស់ទទួលបានការស្វាគមន៍ និងពន្យល់យ៉ាងក្បោះក្បាយពីមគ្គុទ្ទេសន៍អំពីអត្ថន័យ និងសារៈសំខាន់នៃវិមានឈ្នះ ឈ្នះ អំពីសោកនាដកម្ម ដែលបានកើតឡើងនៅក្នុងសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលប្រល័យពូជសាសន៍ជើងឯក។ សិស្សានុសិស្សទាំងអស់ក៏ទទួលបានការធ្វើបទបង្ហាញរបស់មន្ដ្រីមកពីសាលាក្ដីខ្មែរក្រហមផងដែរ ពីដំណើរការជំនុំជម្រះក្ដី និងសមិទ្ធផលដែលទទួលបានពីការជំនុំជម្រះក្ដីលើអតីតមេដឹកនាំជាន់ខ្ពស់នៃរបបខ្មែរក្រហម។
ក្រោយពេលបញ្ចប់ទស្សនកិច្ចសិក្សានៅក្នុងមួយថ្ងៃនេះ សិស្សានុសិស្សទាំងអស់ត្រូវបានរំពឹងទុកថា នឹងទទួលបានព័ត៌មាន និងចំណេះដឹងយ៉ាងច្រើនជុំវិញការងារជំនុំជម្រះក្ដីនៅក្នុងសាលាក្ដីខ្មែរក្រហម រឿងរ៉ាវទាក់ទងនឹងការធ្វើទារុណកម្មយ៉ាងព្រៃផ្សៃ និងការកាប់សម្លាប់ប្រជាពលរដ្ឋកម្ពុជានៅក្នុងរបបខ្មែរក្រហម និងការពលីរបស់រាជរដ្ឋាភិបាលកម្ពុជាក្នុងការរំដោះប្រទេសជាតិចេញពីរបបប្រល័យពូជសាសន៍នោះ។
លោកគ្រូអ្នកគ្រូដែលបានដឹកនាំសិស្សានុសិស្សមកចូលរួមក្នុងទស្សនកិច្ចសិក្សានេះ បានថ្លែងនូវការកោតសរសើរ និងដឹងគុណដល់គោលនយោបាយ ឈ្នះ ឈ្នះ របស់រាជរដ្ឋាភិបាលកម្ពុជា ដែលបានដឹកនាំប្រទេសនាំមកនូវសុខសន្ដិភាព ស្ថេរភាពសង្គម និងរីកចម្រើនគ្រប់វិស័យ។ លោកគ្រូអ្នកគ្រូក៏សូមអរគុណដល់ អ.វ.ត.ក. ផងដែរ ដែលបានរៀបចំកម្មវិធីនេះឡើង ដើម្បីឲ្យយុវជនបានយល់ដឹង បានទស្សនាទីតាំងឧក្រិដ្ឋកម្មដែលបន្សល់ទុកពីរបបខ្មែរក្រហម និងបានមកឃើញការអភិវឌ្ឍន៍នៅក្នុងរាជធានីភ្នំពេញនាពេលបច្ចុប្បន្ននេះ។
សូមបញ្ជាក់ថា កម្មវិធីទស្សនកិច្ចសិក្សានេះ ត្រូវបានរៀបចំរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដោយចាប់តាំងពីឆ្នាំ២០០៩ រហូតមកដល់ឆ្នាំ ២០២៣ នេះ មានសាធារណៈជនជាតិ និងអន្តរជាតិ ជាង ៦០ ម៉ឺននាក់ហើយ ដែលបានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
