ព័ត៌មាន​​សម្រាប់​​អ្នក​​តំណាង​​សារព័ត៌មាន

ផ្នែក​​កិច្ចការ​​សាធារណៈ​​នៃ​​អង្គ​​ជំនុំជម្រះ​​វិសាមញ្ញ​​ក្នុង​​តុលាការ​​កម្ពុជា​​​ផ្តល់​​​មធ្យោបាយ​​​នានា​​​ដើម្បី​​​ជួយ​សម្រួល​​​ដល់​​​អ្នក​​​តំណាង​​​សារព័ត៌មាន ​ក្នុង​​អំឡុង​​ពេល​​សវនាការ។ នៅ​​​​ក្នុង​​​បន្ទប់​​សារព័ត៌មាន​​នៅ​​ជាន់​​​ផ្ទាល់​​ដី​​​នៃ​​​សាលសវនាការ​ ​មាន​​ទូ​​សុវត្ថិភាព​​សម្រាប់​​រក្សា​​ទុក​​សម្ភារៈ​​ផ្ទាល់ខ្លួន​​ដូចជា ទូរស័ព្ទ​ដៃ ឧបករណ៍​​ថត​សំឡេង និង កាបូប​​ដាក់​​ឥវ៉ាន់​​ធំៗ ជាដើម។

 

នៅ​ក្នុង​បន្ទប់​ការងារ​ព័ត៌មាន (លេខ ១០៨) នៅ​​ជាន់​​ផ្ទាល់​ដី​​នៃ​​អគារ​​សវនាការ ​មាន​​ទី​​កន្លែង​​ស្ងប់ស្ងាត់​សម្រាប់​​ធ្វើការ និង​​មាន​​កុំព្យូទ័រ​​មួយ​​ចំនួន​​ដែល​​ភ្ចាប់​​ប្រព័ន្ធ​​អ៊ីនធឺណិត​​រួច​​ជាស្រេច សម្រាប់​​អ្នក​​សារព័ត៌មាន​ ប្រើប្រាស់​​តាម​​គោលការណ៍​​មក​​មុន​​បាន​​មុន។ អ្នក​សារព័ត៌មានអាច​យក​កុំព្យូទ័រ​យួរ​ដៃ​ផ្ទាល់​ខ្លួន​មក​ប្រើប្រាស់​នៅ​ទីនេះ​បាន ក៏​ប៉ុន្តែ​ពុំ​អនុញ្ញាត​ឲ្យ​ភ្ជាប់​ទៅ​នឹង​បណ្តាញ​អ៊ីនធឺណិត​ឬ​បណ្តាញ​កុំព្យូទ័រ​របស់ អ.វ.ត.ក ឡើយ។ ខ្សែកាប​សម្រាប់​ថត​ចម្លង​ការ​បន្ត​ផ្ទាល់​វីដេអូ​និង​សំលេង​អំពី​ដំណើរការ​សវនាការ នឹង​មាន​ផ្តល់​ជូន​នៅ​ក្នុង​បន្ទប់​តាមដាន​ព័ត៌មាន (លេខ ១០៥)។

 

ប័ណ្ណសារព័ត៌មាន

អ្នក​តំណាង​សារព័ត៌មាន​ដែល​មាន​បំណង​ចូល​យក​ព័ត៌មាន​ក្នុង​បរិវេណ អ.វ.ត.ក ត្រូវតែ​សុំ​ប័ណ្ណ​ព័ត៌មាន​ជា​មុន។ ដើម្បី​សុំ​ប័ណ្ណព័ត៌មាន សូម​បំពេញ​ទម្រង់​ពាក្យ​សុំ ដែល​មាន​ចុះ​ហត្ថលេខា ដោយ​ភ្ជាប់​មក​ជាមួយ​នូវ​រូបថត​បិទ​កាត​ក្នុង​ទម្រង់ jpg និង ស្គែន​លិខិត​ឆ្លង​ដែន រួច​ផ្ញើរ​មក pas@eccc.gov.kh

 

សម្រាប់ការបន្តប័ណ្ណដែល​មាន​ស្រាប់ ហើយផុតកំណត់ សូមផ្ញើពាក្យស្នើសុំ​របស់​អ.វ.ត.ក ដែល​មាន​ចុះ​ហត្ថលេខាទៅកាន់​pas@eccc.gov.kh

 

ការភ្ជាប់អ៊ីនធើណេតសែ
ការភ្ជាប់អ៊ីនធឺណិតអាចសម្រាប់អ្នកកាសែតអាច​ភ្ជាប់​បាន​ក្នុងបន្ទប់សារព័ត៌មាន (លេខ១០៥) ។ យើង​ខ្ញុំស្នើសុំ​ថា អ្នកគួរនាំយកឧបករណ៍​ភ្ជាប់អ៊ីនធឺណិតផ្ទាល់ខ្លួនរបស់អ្នកមកជាមួយ ប្រសិនបើអ្នកត្រូវការផ្ញើឯកសារដែលមានទំហំធំ។

 

ការថតសំលេង

ឧបករណ៍​សម្រាប់​ថត​សំលេង​នៃ​ដំណើរការ​សវនាការ​នឹង​ត្រូវ​បាន​ផ្តល់​ជូន​អ្នក​សារព័ត៌មាន​តាម​ប្រព័ន្ធ ហ្វូណូ (PHONO)។ ឧបករណ៍​ថត​សំលេង​នេះ​អាច​ប្រើប្រាស់​បាន​នៅ​ក្នុង​បន្ទប់​តាមដាន​ព័ត៌មាន (លេខ ១០៥) ដោយ​ប្រើ​ឧបករណ៍​ភ្ជាប់​មួយ​ក្នុង​ចំណោម​ឧបករណ៍​ភ្ជាប់​ចំនួន ៤៨ (មាន​ឧបករណ៍​ភ្ជាប់​ចំនួន​១៦​សម្រាប់​ភាសា​នីមួយៗ ខ្មែរ អង់គ្លេស និងបារាំង)។​ ឧបករណ៍​ភ្ជាប់​បន្ថែម​លើស​ពីនេះ​សម្រាប់​ភ្ជាប់​ពី​ម៉ាស៊ីន​ថត​សំលេង​មួយ​ទៅ​ម៉ាស៊ីន​ថត​សំលេង​មួយ​ទៀត អាច​ផ្តល់​ជូន​បាន​ប្រសិនបើ​អ្នក​សារព័ត៌មានមាន​ខ្សែ​កាប​សម្រាប់​ភ្ជាប់។ ការ​ថត​សំលេង​នៅ​ក្នុង​បន្ទប់​សវនាការ​ពុំ​ត្រូវបាន​អនុញ្ញាត​ឡើយ។​

 

ការថតវីដេអូ

ឧបករណ៍​សម្រាប់​ចម្លង​វីដេអូ​អំពី​ដំណើរការ​សវនាការ​នឹង​ត្រូវ​បាន​ផ្តល់​ជូន​តាម​ប្រព័ន្ធ ហ្វូណូ (PHONO)។​ ការ​ថត​ចម្លង​វីដេអូ​អាច​ធ្វើ​បាន​នៅ​ក្នុង​បន្ទប់​តាមដាន​ព័ត៌មាន (លេខ ១០៥) ដោយ​ប្រើប្រាស់​ឧបករណ៍​ភ្ជាប់​មួយ​ក្នុង​ចំណោម​ឧបករណ៍​ភ្ជាប់​ចំនួន​ ១០ ដែល​មាន​នៅ​ទីនោះ។ ឧបករណ៍​ភ្ជាប់​បន្ថែម​អាច​ផ្តល់​ជូន​បាន​ប្រសិនបើ​អ្នក​សារព័ត៌មាន​មាន​ខ្សែកាប​សម្រាប់​ភ្ជាប់។ ការ​ថត​វីដេអូ​នៅ​ក្នុង​បន្ទប់​សវនាការ​ពុំ​ត្រូវបាន​អនុញ្ញាត​ឡើយ។​

 

ការថតរូបភាព

ការ​ថត​រូបភាព​នៅ​ក្នុង​បន្ទប់​សវនាការ​ឬ​ក្នុង​សាល​សវនាការ​ពុំ​ត្រូវ​បាន​អនុញ្ញាត​ឡើយ។​ ផ្នែក​កិច្ចការ​សាធារណៈ​នៃ អ.វ.ត.ក នឹង​ផ្តល់​រូបភាព​ជូន​អ្នក​សារព័ត៌មាន ទៅ​តាម​ពេល​វេលា​សវនាការ​ដែល​បាន​ជ្រើសរើស។

 

រូបថតមួយចំនួនរបស់សាលសវនាការត្រូវបានបង្ហោះនៅ​ក្នុង​គេហទំព័រ www.flickr.com/krtribunal ។ រូបថតទាំងនេះអាចយក​ប្រើប្រាស់​ដោយសេរីដោយប្រព័ន្ធផ្សព្វផ្សាយ ហើយ​រូប​ថត​ទាំង​នោះត្រូវ​បញ្ជាក់​ថា ជា​រូប​ថត​របស់​តុលាការ និង​ឈ្មោះអ្នកថតរូប។

 

ព័ត៌មានអំពី អ.វ.ត.ក

 

អ.វ.ត.ក ត្រូវបានគេស្គាល់​ដោយឈ្មោះផ្សេងៗគ្នាមាន​ដូចជា (អង្គជំនុំ​ជម្រះ​កម្ពុជា តុលាការឧក្រិដ្ឋកម្មសង្គ្រាមកម្ពុជា សា​លា​ក្តី​ឧក្រិដ្ឋកម្មកម្ពុជា សាលា​ក្ដី​ខ្មែរក្រហម​ សាលាក្ដី​ឧក្រិដ្ឋកម្មសង្គ្រាមដែលគាំទ្រដោយអ.ស.ប) ប៉ុន្តែឈ្មោះផ្លូវការរបស់អ.វ.ត.ក.​គឺ​អង្គជំនុំជម្រះវិសាមញ្ញក្នុង​តុលាការកម្ពុជា។