ការណែនាំអំពី អ.វ.ត.ក

អង្គ​ជំនុំ​ជម្រះ​វិសាមញ្ញ​ក្នុង​តុលាការ​កម្ពុជា​ (អ.វ.ត​.ក) គឺ​ជា​តុលាការ​ពិសេស​មួយ​របស់​កម្ពុជាដែល​ទទួល​បាន​ការ​គាំ​ទ្រ​ពី​មជ្ឈ​ដ្ឋា​ន​​អន្ដរ​ជាតិ​តាម​រយៈ​អង្គ​ការ​សហ​ប្រ​ជា​ជាតិ (UNAKRT) តុលាការ​នេះ​ត្រូវ​បាន​គេ​ស្គាល់​ថា​ជាតុលាការខ្មែរ​ក្រហម​ ឬ​អង្គ​ជំនុំ​ជម្រះ​កម្ពុជា។ 

របបខ្មែរក្រហម​​បាន​ឡើង​​កាន់អំណាច​​នៅថ្ងៃទី១៧ ខែមេសា ឆ្នាំ១៩៧៥ ហើយត្រូវ​​ទម្លាក់​ពី​អំណាច​​នៅថ្ងៃទី៧ ខែមករា ឆ្នាំ១៩៧៩ ។ ប្រជាជន​កម្ពុជា​ប្រមាណ ១,៧ លាននាក់ បានបាត់បង់​ជីវិតដោយ​សារ​ការ​បង្អត់​អាហារ​ ទារុណកម្ម ការ​សម្លាប់ និង​ការ​បង្ខំ​ឲ្យ​ធ្វើ​ការ​ហួស​កម្លាំង​ ក្នុង​រយៈ​ពេល​ ៣ឆ្នាំ ៨ខែ ២០ថ្ងៃនៃ​របប​នោះ។ សង្គ្រាមស៊ីវិល​បានបន្ដ​ក្រោយពី​ការដួលរលំ​នៃរបប​ខ្មែរក្រហម ។ នៅទីបំផុត សង្គ្រាមស៊ីវិល​បានត្រូវ​បញ្ចប់ នៅឆ្នាំ ១៩៩៨ នៅពេលដែល​រចនាសម្ព័ន្ធ​នយោបាយ​និងយោធា​របស់​ខ្មែរក្រហម​ត្រូវ​កម្ទេចចោល។

នៅឆ្នាំ១៩៩៧ រាជរដ្ឋាភិបាល​កម្ពុជា​​បានសំណូមពរ​​ឲ្យ​អង្គការ​​សហប្រជាជាតិ​​ជួយឧបត្ថម្ភ​​បង្កើត​​សាលាជម្រះក្ដី ដើម្បី​កាត់ទោស​​មេដឹកនាំ​​ជាន់ខ្ពស់​ខ្មែរក្រហម។ នៅឆ្នាំ ២០០១ រដ្ឋសភាជាតិ​​កម្ពុជា​​បានអនុម័ត​​ច្បាប់មួយ​​ដើម្បី​​បង្កើត​​តុលាការ​​កាត់សេចក្ដី​​ឧក្រិដ្ឋកម្ម​​ដែលបាន​​ប្រព្រឹត្ដ​ឡើង​នៅ​​ប្រទេស​​កម្ពុជា​ក្នុងអំឡុង​​​របប​ខ្មែរក្រហម​​ពីឆ្នាំ ១៩៧៥-១៩៧៩។ តុលាការនេះ​​មានឈ្មោះ​ថា អង្គជំនុំជម្រះ​​វិសាមញ្ញ​​ក្នុង​តុលាការ​​កម្ពុជា ដើម្បី​​កាត់សេចក្ដី​​ឧក្រិដ្ឋកម្ម​​ដែលបាន​ប្រព្រឹត្ដឡើង​​ក្នុង​របប​​កម្ពុជា​​ប្រជាធិបតេយ្យ (អង្គជំនុំជម្រះវិសាមញ្ញ ឬ អ.វ.ត.ក) ។ រាជរដ្ឋាភិបាល​​កម្ពុជា​​បាន​ទទូច​​សុំថា ដើម្បីជា​​ផលប្រយោជន៍​​ដល់​ប្រជាជន​​កម្ពុជា​​ទាំងអស់ តុលាការ​​ជម្រះក្ដី​​ត្រូវប្រព្រឹត្ដទៅ​​​នៅ​ក្នុង​​​ប្រទេស​​​កម្ពុជា ដោយ​ប្រើប្រាស់​​មន្ដ្រី​និង​​ចៅក្រម​​កម្ពុជា គួបផ្សំ​​ជាមួយ​​មន្ដ្រី​និង​​ចៅក្រម​​អន្ដរជាតិ។ កម្ពុជាបាន​​អញ្ជើញ​​សហគមន៍​​អន្ដរជាតិ​ឲ្យ​ចូលរួម​​សហការ​​ក្នុងការ​កាត់សេចក្ដី​នេះ ដើម្បី​​ធានា​ឲ្យ​មាន​​យុត្ដិធម៌​​ជាលក្ខណៈ​​​អន្ដរជាតិ ព្រោះកម្ពុជា​​យល់​ឃើញថា​ខ្លួននៅ​​ទន់ខ្សោយ​​ផ្នែក​​តុលាការ និង​​ចរិត​​លក្ខណៈ​​អន្ដរជាតិ​​នៃ​ឧក្រិដ្ឋកម្ម ។

ចុងបញ្ចប់ កិច្ចព្រមព្រៀង​មួយ​​ជាមួយ​​អង្គការ​​សហ​​ប្រជាជាតិ​​​ត្រូវបាន​​​ចុះ​ហត្ថលេខា​​​នៅខែ​មិថុនា ឆ្នាំ២០០៣ ដែលចែង​អំពី​​ថា​តើ​​សហគមន៍​​​អន្ដរជាតិ​នឹង​​ជួយ​​ឧបត្ថម្ភ​​​និង​​​សហការ​​​របៀប​​​ដូចម្ដេច​​​នៅក្នុង​​​អង្គជំនុំជម្រះ​​​វិសាមញ្ញ​​នេះ។ តុលាការថ្មី​​ហើយ​ពិសេសនេះ​​ត្រូវបាន​​បង្កើតឡើង​​ដោយ​​រាជរដ្ឋាភិបាល​​កម្ពុជា​​និង​​អង្គការ​​សហប្រជាជាតិ ប៉ុន្ដែតុលាការ​​នេះ​គឺជា​តុលាការ​​ឯករាជ្យ​ម្ចាស់ការ មិនចំណុះ​​​រាជរដ្ឋាភិបាល​​ឬ​អង្គការ​​សហ​ប្រជាជាតិ​ទេ ។ តុលាការនេះ​​គឺជា​​តុលាការ​​កម្ពុជា ដែលមានការ​​ចូលរួម​ពី​​សហគមន៍​​អន្ដរជាតិ ដែលនឹង​អនុវត្ដ​​ទៅតាម​​ស្ដង់ដារ​​អន្ដរជាតិ ។ តុលាការនេះ​​នឹងផ្ដល់ជា​​គំរូ​ថ្មីមួយ​​សម្រាប់​​ដំណើរការ​​កាត់ក្ដី​​នៅកម្ពុជា។

មើល៖ ព្រឹត្ដិការណ៍សំខាន់ៗ

អ.វ.ត.ក ជំនុំជម្រះក្តី​​តែបុគ្គល​​ពីរជំពូក​​ដែលត្រូវបាន​​ចោទប្រកាន់​ថា​មាន​ការ​ទទួល​​ខុសត្រូវ​​ចំពោះ​​ឧក្រិដ្ឋកម្ម​​ដែល​ត្រូវបាន​​ប្រព្រឹត្ត​នៅ​ចន្លោះ​ថ្ងៃ ១៧ មេសា ១៩៧៦ និងថ្ងៃទី៦ មករា ១៩៧៩ ៖

១) មេដឹកនាំ​ជាន់ខ្ពស់​​នៃ​​កម្ពុជា​​ប្រជាធិបតេយ្យ និង
២) អ្នកដែល​​ត្រូវបាន​​ជឿជាក់ថា​​មានការ​​ទទួល​​ខុសត្រូវ​​ខ្ពស់បំផុត​​ចំពោះការ​​រំលោភ​បំពាន​​ធ្ងន់ធ្ងរ​​លើច្បាប់ជាតិ​​និង​​ច្បាប់​អន្តរជាតិ

សំណុំរឿង​នៅ អ.វ.ត.ក. មាន៖

សំណុំរឿង ០០១
ទណ្ឌិតៈ កាំង ហ្កេកអ៊ាវ ហៅ ឌុច

សំណុំរឿង ០០២ (បំបែកទៅជា ០០២/០១ និង ០០២/០២)
ជនជាប់ចោទៈ ខៀវ សំផន, អៀង សារី (ស្លាប់), នួន ជា, អៀងធីរិទ្ធ (ស្លាប់)

សំណុំរឿង ០០៣
ជនជាប់ចោទ៖ មាស មុត 

សំណុំរឿង ០០៤ (បំបែកទៅជា ០០៤/០១ សំណុំរឿង ០០៤/០២ និង សំណុំ​រឿង ០០៤)
ជនជាប់ចោទៈ យឹម ទិត្យ (០០៤) អ៊ឹម ចែម (០០៤/០១) និង អោ អាន (០០៤/០២)


គេហទំព័រនេះ​​ផ្តល់ព័ត៌មាន​​អំពី​​អង្គជំនុំជម្រះ​​វិសាមញ្ញ និង​​ឆ្លើយតប​​ទៅនឹងសំណួរមួយ​ចំនួន​​ដែលត្រូវ​បាន​សួរ​ញឹកញាប់​​អំពី​ការ​ជំនុំជម្រះ​​ក្ដីនេះ។ សូមទាក់ទង​មកផ្នែកកិច្ចការ​​សាធារណៈនៃ អ.វ.ត.ក ប្រសិនបើ​​លោកអ្នក​​ចង់ដឹង​​ព័ត៌មាន​​លម្អិត​​បន្ថែមទៀត ឬចង់ធ្វើទស្សនកិច្ច​នៅ  អ.វ.ត.ក

 
រចនាសម្ព័ន

ការិយាល័យ​​រដ្ឋបាល​នៃ​អង្គជំនុំជម្រះ​​វិសាមញ្ញ​មានតួនាទី​​ផ្ដល់​សេវាកម្ម​ដល់​អង្គជំនុំជម្រះ សហចៅក្រម​ស៊ើបអង្កេត ការិយាល័យ​សហ​ព្រះរាជអាជ្ញា និង​​ការិយាល័យ​​ផ្សេងទៀត ។

ECCC Organ

 

បដិរូប

 

បដិរូប

បដិរូប​​តំណាង​ឲ្យ​អង្គជំនុំជម្រះ​​វិសាមញ្ញ​មានការ​ពណ៌នា​​រួមមួយ​​អំពី​​ការគ្រប់គ្រង​នៃ​តុលាការ​​កម្ពុជា​​ក្នុងសម័យ​អង្គរ និង​អមដោយ​​កួរផ្លែ​អូលីវ ជាសញ្ញា​របស់​​អង្គការ​​សហ​ប្រជាជាតិ​ដែលតំណាង​ឲ្យ​សន្ដិភាព។ ពណ៌​ជាផ្លូវការ​គឺខៀវចាស់។

រូបនេះ​អង្គុយ​លើ​ក្រណាត់​​តេអ៊ី ហើយកាន់​​ដាវមួយ​តំណាងឲ្យ​​អំណាច​​តុលាការ។ វាគឺជា​រូបតាំង​លើ​ជញ្ជាំង​​កណ្ដាលគេ​អតីត​​តុលា ការ​​ឧទ្ធរណ៍​​ក្នុងក្រសួង​​យុត្ដិធម៌​​នៅទីក្រុង​​ភ្នំពេញ។ រូបនោះ​​អមដោយ​​អ្នកជំនួយការ​​ពីរនាក់ ដែល​កំពុង​​អានច្បាប់ ដែល​ចារ​ដោយ​ដៃ​លើ​ស្លឹករឹត។

ត្រាជា​ផ្លូវការ​​បង្ហាញ​ពី​បដិរូប​ព័ទ្ធ​ដោយ​រង្វង់ពីរ​​ដែល​​សរសេរ​ឈ្មោះ​ពេញ​ជា​​អក្សរខ្មែរអង្គជំនុំជម្រះ​​វិសាមញ្ញ​​ក្នុង​​តុលាការ​កម្ពុជា និង​អក្សរកាត់​​ជាភាសា​​អង់គ្លេស ECCC, (Extraordinary Chambers in the Courts of Cambodia) ជាភាសា​បារាំង CETC (Chambres extraordinaries au sein des Tribunaux Cambodgiens)