និស្សិតចំនួនជាង ២០០ នាក់ មកពីសាកលវិទ្យាល័យ ហេង សំរិន ត្បូងឃ្មុំ ក្នុងខេត្តត្បូងឃ្មុំ មកបំពេញទស្សនកិច្ចសិក្សាដែលរៀបចំឡើងដោយអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នៅថ្ងៃទី២៣ ខែមីនា ឆ្នាំ២០២៣។ គោលបំណងនៃទស្សនកិច្ចសិក្សានេះ គឺចង់ឱ្យនិស្សិតទាំងអស់បានយល់ដឹង អំពីសមិទ្ធិផលសម្រេចបានដោយ អ.វ.ត.ក និងបុព្វហេតុនៃការជំនុំជម្រះក្តីលើឧក្រិដ្ឋកម្មដែលកើតមានឡើងនៅក្នុងរបបកម្ពុជាប្រជាធិបតេយ្យ និងដំណើការកសាងសន្ដិភាពនៅក្នុងប្រទេសកម្ពុជា។
លោក សាន គង់ហេង សាស្ដ្រាចារ្យ និងជាប្រធានក្រុមដឹកនាំនិស្សិតមកទស្សនកិច្ចនៅថ្ងៃនេះ បានលើកឡើងថា ទស្សនកិច្ចសិក្សានេះពិតជាមានសារៈសំខាន់ណាស់សម្រាប់និស្សិតទាំងអស់។ លោកបន្ដថា និស្សិតទាំងអស់បានយល់ដឹងបន្ថែម អំពីដំណើការជំនុំជម្រះក្ដីលើអតីតមេដឹកនាំខ្មែរក្រហម និងលទ្ធផលដែលសម្រេចបានពីការកាត់ក្ដីនេះ។ សាស្ដ្រាចារ្យរូបនេះបន្ថែមថា និស្សិតរបស់លោកក៏ទទួលបានចំណេះដឹងយ៉ាងច្រើនជុំវិញការធ្វើទារុណកម្មយ៉ាងព្រៃផ្សៃ ការកាប់សម្លាប់ប្រជាពលរដ្ឋកម្ពុជានៅក្នុងរបបប្រល័យពូជសាសន៍ខ្មែរក្រហម និងដំណើរនៃការកសាងសុខសន្តិភាព ប្រវត្តិនៃការតស៊ូរបស់សម្តេចតេជោ ហ៊ុន សែន ដែលបានបូជាសាច់ស្រស់ឈាមស្រស់រំដោះប្រទេសជាតិឱ្យរួចផុតពីរបបខ្មៅងងឹតយង់ឃ្នង និងបានរក្សាសុខសន្តិភាពជូនប្រជាពលរដ្ឋទូទាំងប្រទេស។
លោក គង់ហេង ក៏បានថ្លែងអំណរគុណដល់សាលាក្ដីខ្មែរក្រហមដែលបានរៀបចំទស្សនកិច្ចសិក្សានេះជូននិស្សិតរបស់លោក ហើយលោកសង្ឃឹមថា អ.វ.ត.ក និងរៀបចំកម្មវិធីនេះជូននិស្សិតក្នុងសាកលវិទ្យាល័យនេះបន្ថែមទៀត។ លោកបញ្ជាក់ថា «ស្នើសុំឱ្យមានដំណើរទស្សនកិច្ចជាបន្តបន្ទាប់ទៀតនៅតំបន់ប្រវត្តិសាស្ត្រដើម្បីជាប្រយោជន៍ទទួលនូវចំណេះដឹងដែលពួកយើងខ្ញុំមិនបានឆ្លងកាត់និងជាការសិក្សាស្រាវជ្រាវដស្វែងយល់ពីប្រវត្តិសាស្ត្រទាំងនោះ»។
ក្នុងដំណើរទស្សនកិច្ចសិក្សានៅថ្ងៃនេះ និស្សិតទាំងអស់បានទៅទស្សនកិច្ចសិក្សានៅសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង មជ្ឈមណ្ឌលប្រល័យពូជសាសន៍ជើងឯក វិមានឈ្នះឈ្នះនិងបទបង្ហាញពីមន្ដ្រីផ្នែកិច្ចការសាធារណៈនៃសាលាក្ដីខ្មែរក្រហមអំពីសំខាន់នៃការជំនុំជម្រះក្ដីលើឧក្រិដ្ឋកម្មកើតឡើងនៅក្នុងរបបខ្មែរក្រហម។
សូមបញ្ជាក់ថា អ.វ.ត.ក បានរៀបចំរៀងទស្សនកិច្ចសិក្សារៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំងពីតុលាការដំណើការដំបូង រហូតមកដល់ឆ្នាំ២០២៣ នេះ សាធារណជនជាតិ និងអន្តរជាតិជាងកន្លះលាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕