លោក សន សាគួន តំណាងក្រុមការងារយុវជនស្រុកបាធាយ បានថ្លែងអំណរគុណដល់សាលាក្ដីខ្មែរក្រហម ដែលបានរៀបចំកម្មវិធីដឹកនាំយុវជន និងសិស្សានុសិស្សមកសិក្សាដោយផ្ទាល់នៅទីតាំង វិមានឈ្នះ ឈ្នះ មជ្ឈមណ្ឌលប្រល័យពូជសាសន៍ជើងឯក និងសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង។ សម្រាប់លោក សាគួន ទស្សនកិច្ចនេះផ្ដល់ឱ្យយុវជនបានយល់ដឹងកាន់តែច្បាស់អំពីភាពឃោរឃៅរបស់ខ្មែរក្រហម និងការពលីរបស់សម្ដេចតេជោ ហ៊ុន សែន ក្នុងរំដោះប្រទេសជាតិចេញពីរបបប្រល័យពូជសាសន៍។
នៅថ្ងៃទី ២៧ ខែ មេសា ឆ្នាំ ២០២៣ នេះ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានរៀបចំកម្មវិធីទស្សនកិច្ចសិក្សាជូនសិស្សានុសិស្សមកពីវិទ្យាល័យសម្ដេចតេជោ ហ៊ុន សែន សង្កើប និងយុវជនសរុបប្រមាណ ១៥០ នាក់ មកពីស្រុកបាធាយ ខេត្តកំពង់ចាម ទៅទស្សនកិច្ចសិក្សា វិមានឈ្នះ ឈ្នះ មជ្ឈមណ្ឌលប្រល័យពូជសាសន៍ជើងឯក និងសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង។ រហូតមកដល់ពេលនេះមានយុវជន និងសិស្សានុសិស្សប្រមាណ ៤៥០ នាក់ហើយ មកពីស្រុកបាធាយ ដែលបានមកចូលរួមក្នុងកម្មវិធីទស្សនកិច្ចសិក្សារបស់ អ.វ.ត.ក។
លោក សន សាគួន ដែលបានចូលរួមដឹកនាំក្រុមយុវជននេះ បានសម្ដែងក្ដីសោមនសរីករាយយ៉ាងខ្លាំងចំពោះសាលាក្ដីខ្មែរក្រហមដែលបានរៀបចំកម្មវិធីនេះឡើងសម្រាប់យុវជនក្នុងស្រុករបស់លោក ដោយ លោកបានបញ្ជាក់ថា « ខ្ញុំសូមគោរពថ្លែងអំណរគុណក្រុមការងារគ្រប់លំដាប់ថ្នាក់របស់សាលាក្ដីខ្មែរក្រហមដែលបានបង្កើតជាកម្មវិធីឱ្យយុជន ឱ្យសិស្សបានមកឃើញផ្ទាល់ភ្នែកនូវទីតាំងប្រវត្តិសាស្ដ្រទាំងខាងលើ ព្រោះដំណើរទស្សនកិច្ចទាំងអស់នេះ យុវជន សិស្សរបស់យើងបានចងចាំ បានដឹង បានឃើញផ្ទាល់ភ្នែកនៅទីតាំងទាំងនោះ។»
លោកបន្ថែមថា តាមរយៈការធ្វើបទបង្ហាញពីមន្ដ្រីពាក់ព័ន្ធរួមមាន មន្ដ្រីផ្នែកកិច្ចការសាធារណៈនៃសាលាក្ដីខ្មែរក្រហម មគ្គុទ្ទេសក៏នៅវិមានឈ្នះ ឈ្នះ និងសារៈមន្ទីរទួលស្លែង នោះ ក្រោយពេលបញ្ចប់ទស្សនកិច្ចសិក្សានៅក្នុងមួយថ្ងៃនេះ សិស្សានុសិស្សទាំងអស់បានទទួលព័ត៌មាន និងចំណេះដឹងយ៉ាងច្រើនជុំវិញដំណើការជំនុំជម្រះក្តីលើអតីតមេដឹកនាំខ្មែរក្រហម ការធ្វើទារុណកម្មយ៉ាងព្រៃផ្សៃ និងការកាប់សម្លាប់ប្រជាពលរដ្ឋកម្ពុជាដោយពួកខ្មែរក្រហម និងការពលីរបស់ថ្នាក់ដឹកនាំកម្ពុជាក្នុងការរំដោះប្រទេសជាតិចេញពីរបបប្រល័យពូជសាសន៍។
សូមបញ្ជាក់ថា ដំណើរទស្សនកិច្ចសិក្សានេះ ត្រូវបានរៀបចំរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំងពីតុលាការដំណើរការមក រហូតមកដល់ឆ្នាំ២០២៣ នេះ សាធារណជនជាតិ និងអន្តរជាតិជាងកន្លះលាននាក់ហើយ បានចូលរួមក្នុងដំណើរទស្សនកិច្ចសិក្សាក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
'