នៅល្ងាចថ្ងៃទី១៣ ខែឧសភា ឆ្នាំ២០២៤ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) ចាប់ផ្ដើមកម្មវិធីផ្សព្វផ្សាយតាមរយៈការដាក់តាំងបង្ហាញមជ្ឈមណ្ឌលធនធាន អ.វ.ត.ក. ចល័ត (រថយន្តក្រុងចល័ត) លើកទីមួយ ជូននិស្សិត និងសាធារណៈជន នៅក្នុងសួនច្បារខាងមុខវត្តបទុមវតី រាជធានីភ្នំពេញ។ កម្មវិធីផ្សព្វផ្សាយនេះ ត្រូវបានប្រារព្ធឡើងក្រោមកិច្ចសហប្រតិបត្តិការរវាងការិយាល័យរដ្ឋបាលនៃសាលាក្ដីខ្មែរក្រហម និងរដ្ឋបាលរាជធានីភ្នំពេញ ក្នុងគោលបំណងលើកកម្ពស់ចំណេះដឹងទាក់ទងនឹងដំណើរការជំនុំជម្រះក្ដី និងសមិទ្ធផលនៃការជំនុំជម្រះក្ដីនៅក្នុងសាលាក្ដីខ្មែរក្រហម។
ឯកឧត្តម ក្រាញ់ តូនី រដ្ឋលេខាទីស្ដីការគណៈរដ្ឋមន្ដ្រី និងជាប្រធានរដ្ឋបាលស្តីទីនៃ អ.វ.ត.ក. បានលើកឡើងថា កម្មវិធីផ្សព្វផ្សាយតាមរយៈមជ្ឈមណ្ឌលធនធាន អ.វ.ត.ក. ចល័ត នៅថ្ងៃនេះ ជាកម្មវិធីដំបូងបំផុតរបស់សាលាក្ដីខ្មែរក្រហម ដែលចាប់ផ្ដើមប្រើប្រាស់មជ្ឈមណ្ឌលធនធាន អ.វ.ត.ក. ចល័ត ដើម្បីផ្សព្វផ្សាយព័ត៌មានអំពីការងាររបស់ អ.វ.ត.ក. ជូនដល់អ្នកសិក្សាស្រាវជ្រាវ និងសាធារណៈជនដែលស្ថិតនៅក្នុងទីតាំងបរិវេណសួនច្បារមុខវត្តបទុមវតីនេះ អាចយល់ដឹងអំពីដំណើរការជំនុំជម្រះក្ដី និងដឹងពីរបៀបចូលទៅពិនិត្យមើល អាន និងស្រាវជ្រាវឯកសារនៅក្នុងបណ្ណសារនៃសាលាក្ដីខ្មែរក្រហមបាន។ ឯកឧត្តមបន្ថែមថា នៅក្នុងកម្មវិធីផ្សព្វផ្សាយតាមមជ្ឈមណ្ឌលធនធាន អ.វ.ត.ក. ចល័ត នាល្ងាចនេះ មានក្រុមមន្ដ្រីជំនាញមកពីសាលាក្ដីនៅប្រចាំការ ដើម្បីធ្វើបទបង្ហាញ ពន្យល់ណែនាំ និងបកស្រាយចម្ងល់របស់មហាជនទាក់ទងនឹងដំណើរការជំនុំជម្រះក្ដីនៅក្នុង អ.វ.ត.ក.នាពេលកន្លងមកផងដែរ។
ឯកឧត្តម ក្រាញ់ តូនី មានប្រសាសន៍ថា៖ “នៅក្នុងមជ្ឈមណ្ឌលធនធាន អ.វ.ត.ក. ចល័ត ត្រូវបានបំពាក់ដោយបច្ចេកវិទ្យាចុងក្រោយ ដូចជាកុំព្យូទ័រយួរដៃទំនើប បន្ទប់ប្រជុំដែលភ្ជាប់ជាមួយម៉ាស៊ីនបញ្ចាំងរូបភាព ទូរទស្សន៍អេក្រង់អន្តរកម្មសម្រាប់ធ្វើបទបង្ហាញ និងសម្រាប់ចាក់បញ្ចាំងវីដេអូ ឯកសារអប់រំ និងមាតិកាពហុព័ត៌មានជាច្រើនទៀត”។ ឯកឧត្តមបន្ថែមទៀតថា៖ “មជ្ឈមណ្ឌលធនធាន អ.វ.ត.ក. ចល័ត នឹងធ្វើដំណើរទូទាំងប្រទេសកម្ពុជានៃ២៥ខេត្តរាជធានី ហើយនឹងឈប់នៅគ្រប់ទីតាំង ដូចជាសាលារៀន សាកលវិទ្យាល័យ ទីតាំងឧក្រិដ្ឋកម្ម និងទីប្រជំុជនជាដើម។ ជាដំណាក់កាលដំបូង មជ្ឈមណ្ឌលធនធាន អ.វ.ត.ក. ចល័ត បាននឹងកំពុងចាប់ផ្តើមបេសកម្មផ្សព្វផ្សាយនៅក្នុងរាធានីភ្នំពេញ ដោយឈប់នៅតាមសួនច្បារសាធារណៈ នៅស្ថាប័នអប់រំ ជាពិសេស សាលារៀន និងសាកលវិទ្យាល័យ។”
ឯកឧត្តម នួន ផារ័ត្ន អភិបាលរង នៃគណៈអភិបាលរាជធានីភ្នំពេញ បានចូលរួមអបអរសាទរចំពោះ ការចាប់យុទ្ធនាការផ្សព្វផ្សាយព័តមានរបស់សាលាក្តីខ្មែរក្រហម តាមរយៈមជ្ឈមណ្ឌលធនធាន អ.វ.ត.ក. ចល័ត នៅថ្ងៃនេះ ហើយ ឯកឧត្តម បានវាយតម្លៃខ្ពស់ផងដែរ ចំពោះកិច្ចសហប្រតិបត្តិការជាមួយ អ.វ.ត.ក. និងក៏បានកោតសរសើរចំពោះការងារជំនុំជម្រះក្តីនិងការងារផ្សព្វផ្សាយរបស់សាលាក្តីខ្មែរក្រហមកន្លងមក។
សូមបញ្ជាក់ថា ក្នុងកម្មវិធីផ្សព្វផ្សាយតាមរយៈមជ្ឈមណ្ឌលធនធាន អ.វ.ត.ក. ចល័ត នេះ មាននិស្សិតប្រមាណជាង៥០នាក់មកពីសាកលវិទ្យាល័យភូមិន្ទនីតិសាស្ដ្រ និងវិទ្យាសាស្ដ្រសេដ្ឋកិច្ច និងសាធារណៈយ៉ាងច្រើននាក់ បានអញ្ជើញមកចូលរួមស្ដាប់ការធ្វើបទបង្ហាញពីមន្ត្រីផ្នែកពាក់ព័ន្ធនៃអ.វ.ត.ក. ទាក់ទងនឹងដំណើរការជំនុំជម្រះក្ដី ចូលរួមក្នុងកម្មវិធីពិភាក្សាអន្ដរជំនាន់ទាក់ទងនឹងសារៈសំខាន់នៃការជំនុំជម្រះក្ដីលើរបបខ្មែរក្រហម ទស្សនាការតាំងពិពណ៌រូបថត ស្វែងយល់អំពីបណ្ដុំឯកសារជំនុំជម្រះក្ដី និងទស្សនាការបញ្ចាំងភាពយន្តទាក់ទងនឹងភាពឃោឃៅរបស់របបប្រល័យពូជសាសន៍ផងដែរ៕
