ពិធី​សម្ពោធ​បូជនីយ៍​ដ្ឋាន​នៃ​ការ​ចង​ចាំ ​និង​រំឭក​វិញ្ញាណ​ក្ខន្ធ​ជន​រង​គ្រោះ ​ក្នុង​របប​កម្ពុជា​ប្រជា​ធិប​តេយ្យ​នៅ​សារៈ​មន្ទីរ​ឧក្រិដ្ឋ​កម្ម​ប្រល័យ​ពូជ​សាសន៍​ទួល​ស្លែង​

អង្គភាពគាំពារជនរងគ្រោះនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) និងក្រសួងវប្បធម៌ និងវិចិត្រសិល្បៈ នឹងធ្វើពិធីសម្ពោធបូជនីយដ្ឋាននៃការចងចាំ និងរំឭកវិញ្ញាណក្ខន្ធជនរងគ្រោះដែលបានបាត់បង់ជីវិតនៅក្នុងរបបកម្ពុជាប្រជាធិបតេយ្យ នៅថ្ងៃទី២៦ ខែមីនា ឆ្នាំ២០១៥ វេលាម៉ោង ៨: ៣០ នាទីព្រឹកនៅសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង។

ពិធីសម្ពោធនេះនឹងប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី និងជារដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានក្រុមការងាររាជរដ្ឋាភិបាលកម្ពុជាសម្រាប់់់ដំណើរការសាលាក្តីខ្មែរក្រហម និង ឯកឧត្តម Joachim Baron von Marschall ឯកអគ្គរដ្ឋទូតសហព័ន្ធអាល្លីម៉ង់ ប្រចាំប្រទេសកម្ពុជា ព្រមទាំងមានការចូលរួមដោយអ្នករស់រានមានជីវិតពីគុកទួលស្លែង ដើមបណ្តឹងរដ្ឋប្បវេណី នៃ អ.វ.ត.ក  សមាគមជនរងគ្រោះ និងអ្នកពាក់ព័ន្ធដទៃទៀត។ បូជនីយដ្ឋាននេះ សាងសង់ឡើង ដើម្បីជាការចងចាំនិងឧទ្ទិសដល់វិញ្ញាណក្ខន្ធជនរងគ្រោះដែលបានបាត់បង់ជីវិតក្នុងរបបកម្ពុជាប្រជាធិបតេយ្យ ជាពិសេសជនរងគ្រោះចំនួន ១២២៧២ នាក់ ដែលបានជាប់ឃុំឃាំងខុសច្បាប់នៅ គុកទួលស្លែង (មន្ទីរ ស-២១) ក្នុងរបបកម្ពុជាប្រជាធិបតេយ្យនៅចន្លោះឆ្នាំ ១៩៧៥ ដល់ ១៩៧៩។  នៅទីនោះពួកគេបានស្ថិតនៅក្នុងស្ថានភាពអមនុស្សធម៌ និងត្រូវបានគេបង្ខំឲ្យធ្វើការងារ ត្រូវទទួលរងទារុណកម្ម ត្រូវបានសម្លាប់ និងត្រូវបាត់បង់ជីវិតនៅវាលពិឃាតជើងឯក និងព្រៃស (មន្ទីរ ស-២៤) ដែលជាការដ្ឋានបង្ខំឲ្យធ្វើការងារ ។

បូជនីយដ្ឋាន ដែលសាងសង់លើផ្ទៃក្រឡាចំនួន ៤០០ ម៉ែត្រការ៉េ និងមានកំពស់ ៦ ម៉ែត្រ ត្រូវបានរៀបចំប្លង់ និងសាងសង់ឡើងដោយ ក្រសួងវប្បធម៌ និងវិចិត្រសិល្បៈ (អគ្គនាយកដ្ឋានបេតិកភណ្ឌ) ដោយមានកិច្ចសហការយ៉ាងជិតស្និទ្ធជាមួយនឹងអង្គភាពគាំពារជនរងគ្រោះនៃអ.វ.ត.ក និងស្ថាប័នពាក់ព័ន្ធ និងមានជំនួយហិរញ្ញវត្ថុពីក្រសួង
សហប្រតិបត្តិការសេដ្ឋកិច្ច និងការអភិវឌ្ឍន៍អាល្លីម៉ង់ (BMZ)/GIZ.។

ការសាងសង់បូជនីយដ្ឋាននៅសារមន្ទីឧក្រិដ្ឋកម្មប្រល័យពូជសាសន៍ទួលស្លែងគឺជាគម្រោងមួយស្ថិតនៅក្រោមភារកិច្ចនិងការទទួលខុសត្រូវរបស់អង្គភាពគាំពារជនរងគ្រោះក្រោមក្របខ័ណ្ឌនៃកម្មវិធី និងវិធានការក្រៅបច្ចេកទេសតុលាការដើម្បីផ្តល់ផលប្រយោជន៍ដ៏ទូលំទូលាយដល់ជនរងគ្រោះ។