មជ្ឈណ្ឌលធនធាន អ.វ.ត.ក. ចល័ត នៅថ្ងៃទី១២ ខែមិថុនា ឆ្នាំ២០២៤ នេះ ត្រូវបានរៀបចំដាក់តាំង នៅក្នុងបរិវេណវិមានឈ្នះ ឈ្នះ ដើម្បីផ្សព្វផ្សាយអំពីសមិទ្ធផលរបស់សាលាក្ដីខ្មែរក្រហមដល់សិស្សានុសិស្សប្រមាណ១៧០នាក់ មកពីវិទ្យាល័យព្រែកស្លែង ស្រុកកណ្ដាលស្ទឹង ខេត្តកណ្ដាល ដែលបានអញ្ជើញមកចូលរួមក្នុងកម្មវិធីទស្សនកិច្ចសិក្សារៀបចំឡើងដោយអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.)។
បន្ទាប់ពី ទស្សនកិច្ចសិក្សា និងស្ដាប់ការបទបង្ហាញពីមគ្គុទេសក៍ជំនាញរបស់វិមានឈ្នះ ឈ្នះ អំពីសំណង់ ខ្លឹមសារ គោលគំនិតនៃការសាងសង់នៃវិមានឈ្នះ-ឈ្នះ ជាពិសេសអំពីប្រវត្តិសាស្ត្រយោធានៅវិមានឈ្នះ-ឈ្នះ សិស្សានុសិស្សទាំងអស់បានចូលទស្សនាមជ្ឈមណ្ឌលធនធាន អ.វ.ត.ក.ចល័ត ដែលនៅទីនោះមានការណែនាំអំពីរបៀបចូលទៅអាន ស្រាវជ្រាវ និងប្រើប្រាស់ឯកសាររបស់ អ.វ.ត.ក. និងស្ដាប់ការធ្វើបទបង្ហាញអំពីដំណើរការជំនុំជម្រះក្ដីលើអតីតមេដឹកនាំជាន់ខ្ពស់នៃរបបខ្មែរក្រហម។
បន្ទាប់ពីបញ្ចប់កម្មវិធីស្វែងយល់ពីវិមានឈ្នះ ឈ្នះ និងកេរដំណែលរបស់សាលាក្ដីខ្មែរក្រហម សិស្សានុសិស្ស ត្រូវបាននាំយកទៅទស្សនកិច្ចសិក្សាបន្ដទៀត នៅក្នុងសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលប្រល័យពូជសាសន៍ជើងឯក ដើម្បីស្វែងយល់អំពីស្លាកស្នាម និងសោកនាដកម្មរបស់ប្រជាជនកម្ពុជាដែលទទួលរងគ្រោះនៅក្នុងរបបខ្មែរក្រហម។
សូមបញ្ជាក់ថា កម្មវិធីទស្សនកិច្ចសិក្សានេះ ត្រូវបានរៀបចំរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំងពីឆ្នាំ២០០៩ រហូតមកដល់ឆ្នាំ ២០២៤ នេះ មានសាធារណៈជនជាតិ និងអន្តរជាតិជាង ៦៥ ម៉ឺននាក់ហើយដែលបានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
