ឯកឧត្តម សុខ ពុទ្ធិវុធ រដ្ឋលេខាធិការក្រសួងប្រៃសណីយ៍និងទូរគមនាគមន៍ និងជាប្រធានគណៈកម្មការគ្រប់គ្រងគម្រោងផ្សព្វផ្សាយអប់រំកម្ពុជា បានមកធ្វើការសិក្សាស្វែងយល់អំពីសមិទ្ធផលការងារ និងអំពី កិច្ចសហប្រតិបត្តិការដែលអាចធ្វើបានរួមគ្នាជាមួយអង្គជំនុំជម្រះវិសាមញ្ញក្នុងតុលាក

Nhet Sokheng

រាជធានីភ្នំពេញ៖ ឯកឧត្តម សុខ ពុទ្ធិវុធ រដ្ឋលេខាធិការក្រសួងប្រៃសណីយ៍និងទូរគមនាគមន៍ អញ្ជើញដឹកនាំមន្ត្រីជំនាញ ធ្វើទស្សនកិច្ចនៅទីស្នាក់ការថ្មីនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នារសៀលថ្ងៃទី១៥ ខែកុម្ភៈ ឆ្នាំ២០២៣។ ក្នុងដំណើទស្សនកិច្ចនេះ គណប្រតិភូទទួលបានការស្វាគមន៍យ៉ាងរាក់ទាក់ពី ឯកឧត្តម ក្រាញ់ តូនី ប្រធានរដ្ឋបាលស្តីទី និងមន្ដ្រីជាន់ខ្ពស់របស់ អ.វ.ត.ក។

ឯកឧត្តម ក្រាញ់ តូនី បានជម្រាបជូនអំពីសមិទ្ធផលដែលសម្រេចបានដោយជោគជ័យរបស់ អ.វ.ត.ក ក្នុងការជំនុំជម្រះក្ដីលើអតីតមេដឹកនាំខ្មែរក្រហមអស់រយៈពេល ១៦ ឆ្នាំមកនេះ ដោយបានរួមចំណែកដល់ការរក្សាបានសន្ដិភាព ការផ្សះផ្សារផ្លូវចិត្តរបស់ជនរងគ្រោះ ការមិនមានការសងសឹកនិងចងគំនុំគ្នាក្នុងសង្គមជាតិ និងការបំបាត់បានវប្បធម៌និទណ្ឌភាពនៅកម្ពុជា។ សមិទ្ធផលនេះ ក៏ជាកេរដំណែលដ៏ធំធេងរបស់សម្តេចវិបុលបញ្ញា សុខ អាន ដែលបានខិតខំនិងលះបង់កំលាំងកាយ ចិត្ត និងប្រាជ្ញា លើការងារ អ.វ.ត.ក នាពេលកន្លងមក។

បន្ទាប់មក ឯកឧត្តម ថោង សុជាតិ មន្រ្តីគ្រប់គ្រងជាន់ខ្ពស់នៃ អ.វ.ត.ក បានធ្វើបទបង្ហាញអំពីផែនការសកម្មភាពលម្អិតរយៈពេល៣ឆ្នាំរបស់អ.វ.ត.ក ពីឆ្នាំ២០២៣ ដល់ឆ្នាំ២០២៥ រួមមាន៖ ការងារគតិយុត្តមួយចំនួនជាពិសេសពាក់ព័ន្ធនឹងការឃ្លាំមើលការអនុវត្តទោស ការធ្វើចំណាត់ថ្នាក់ឯកសារសំណុំរឿងឡើងវិញពីសម្ងាត់ទៅជាសាធារណៈ ការគ្រប់គ្រងនិងការផ្សព្វផ្សាយឱ្យបានទូលំទូលាយបណ្ណសារនៃសំណុំរឿងអស់ដែលមានជាង៣លានទំព័រ ការផ្សព្វផ្សាយនិងអប់រំក្នុងស្មារតីលើកកម្ពស់ការយល់ដឹងនៃដំណើរការកាត់សេចក្តី សមិទ្ធផលនិងកេរតំណែលរបស់ អ.វ.ត.ក ដល់យុវជនជំនាន់ក្រោយ។ 

ក្រោយបទបង្ហាញ ឯកឧត្តម សុខ ពុទ្ធិវុធ ថ្លែងកោតសរសើរលើសមទ្ធិផលរបស់ អ.វ.ត.ក ក៏ដូចជា ការរៀបចំផែនការសកម្មភាពបន្ត ដើម្បីថែរក្សាសមទ្ធិផលដ៏មានសារៈសំខាន់នេះ និងជំរុញការផ្សព្វផ្សាយនិងអប់រំដល់យុវជនជំនាន់ក្រោយអំពីកេរដំណែល អ.វ.ត.ក និងតម្លៃសន្ដិភាពនៅកម្ពុជា។ ឯកឧត្តមគាំទ្រទាំងស្រុងនូវសកម្មភាពបន្តរបស់ អ.វ.ត.ក និងបានឯកភាពឱ្យមានកិច្ចសហប្រតិបត្តិការរវាង អ.វ.ត.ក និងស្ថាប័នផ្សព្វផ្សាយអប់រំកម្ពុជា (Educational Broadcasting Cambodia) លើការផលិតមាតិកាផ្សព្វផ្សាយរបស់អ.វ.ត.ក។ ភាគីទាំងពីរ ក៏បានពិភាក្សាគ្នាលើលទ្ធភាពនៃការរៀបចំគម្រោងសាកល្បងរួមគ្នាលើការប្រើប្រាស់បច្ចេកវិទ្យាក្នុងតុលាការ ដូចជាៈ ការធានាបានប្រសិទ្ធភាពខ្ពស់និងភាពស្អាតស្អំនៃប្រពន័្ធយុត្តិធម៌ ការផ្តល់សេវាយុត្តិធម៌អោយបានខិតជិតដល់អ្នកត្រូវការសេវា និងតុលាការអេឡិចត្រូនិក ដែលធ្លាប់អនុវត្តនៅ អ.វ.ត.ក ជាមួយក្រសួងយុត្តិធម៌ ក្រសួងស្ថាប័នពាក់ព័ន្ធ និងដៃគូអភិវឌ្ឍន៍នានា៕
 

Nhet Sokheng

Nhet Sokheng

Nhet Sokheng

Most read