នៅថ្ងៃទី០២ ខែវិច្ឆិកា ឆ្នាំ២០២៣ គរុសិស្សប្រមាណ ៨០នាក់ មកពីសាលាគរុកោសល្ប និង វិក្រឹតការខេត្ដស្វាយរៀង ក្នុងខេត្តស្វាយរៀងបានអញ្ជើញមកចូលរួមក្នុងកម្មវិធីទស្សនកិច្ចសិក្សារៀបចំឡើងដោយ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) ដើម្បីសិក្សាស្វែងយល់ប្រវត្តិសាស្ដ្ររបស់ប្រទេសកម្ពុជាទាក់ទងនឹងរបបកម្ពុជាប្រជាធិបតេយ្យនៅក្នុងវិមានឈ្នះ-ឈ្នះ និងសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង។
ក្នុងដំណើរទស្សនកិច្ចសិក្សានៅវិមានឈ្នះ-ឈ្នះ គរុសិស្សទាំងអស់ទទួលបានការពន្យល់យ៉ាងក្បោះក្បាយពីមគ្គុទេសរបស់វិមាន អំពីការតស៊ូរបស់ថ្នាក់ដឹកនាំក្នុងការរំដោះប្រទេសជាតិចេញពីរបបប្រល័យពូជសាសន៍ និងការដាក់ចេញគោលនយោបាយឈ្នះ-ឈ្នះ ដើម្បីឆ្ពោះទៅការបញ្ចប់សង្គ្រាមទាំងស្រុងក្នុងប្រទេសកម្ពុជា និងទទួលបានសន្ដិភាពពេញលេញជូនជាតិកម្ពុជា។ នៅក្នុងបរិវេណវិមានឈ្នះ-ឈ្នះផងដែរ មន្ដ្រីផ្នែកកិច្ចការសាធារណៈនៃ សាលាក្ដីខ្មែរក្រហម ក៏បានធ្វើបទបង្ហាញដល់គរុសិស្ស អំពីសមិទ្ធផលដែលទទួលបានពីការជំនុំជម្រះក្ដីលើអតីតមេដឹកនាំជាន់ខ្ពស់នៃរបបខ្មែរក្រហម និងការអនុវត្តការងារសេសសល់របស់សាលាក្ដីក្រោយពេលជំនុំជម្រះក្ដីចប់។ បន្ទាប់មក គរុសិស្សបានបន្ដទៅទស្សនកិច្ចនៅសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង ដើម្បីស្វែងយល់អំពីសោកនាដកម្មដែលបានបន្សល់ទុកដោយរបបឃោរឃៅខ្មែរក្រហមផងដែរ។
លោកគ្រូ អ្នកគ្រូ ដែលបានមកចូលរួមក្នុងទស្សនកិច្ចសិក្សានេះ បានលើកឡើងថាដំណើរទស្សនកិច្ចនេះជាផ្នែកមួយដ៏សំខាន់សម្រាប់សិស្សានុសិស្សស្វែងយល់ពីប្រវត្តិសាស្រ្ត ជាពិសេស របបកម្ពុជាប្រជាធិបតេយ្យ ការកាត់ទោសមេដឹកនាំខ្មែរក្រហម។ លោកបន្ដថា ចំណែកការទស្សនាវិមានឈ្នះ ឈ្នះក៏ជាចំណែកមួយដែលឲ្យសិស្សានុសិស្សយល់ត្រួសពីប្រភពនៃការកើតឡើងនៃរបបខ្មែរក្រហម ការតស៊ូរបស់ថ្នាក់ដឹកនាំក្នុងការរំដោះប្រទេសពីគុកឥតជញ្ជាំងមួយនេះ។ ហើយសិស្សក៏អាចបង្ហាញពីអ្វីដែលគាត់បានឃើញ និងដឹងនៅថ្ងៃនេះទៅមិត្តភក្តិផ្សេងទៀត ជាពិសេសឪពុកម្តាយ យាយតា ដែលមិនដែលបានមកទស្សនាវិមានឈ្នះ ឈ្នះ។
លោកគ្រូអ្នកគ្រូ បានកោតសរសើរ និងដឹងគុណដល់គោលនយោបាយ ឈ្នះ ឈ្នះ របស់រាជរដ្ឋាភិបាលកម្ពុជា ដែលបានដឹកនាំប្រទេសនាំមកនូវសុខសន្ដិភាព ស្ថេរភាពសង្គម និងរីកចម្រើនគ្រប់វិស័យ។ លោកគ្រូអ្នកគ្រូ ក៏សូមថ្លែងអំណរគុណដល់ អ.វ.ត.ក. ផងដែរ ដែលបានរៀបចំកម្មវិធីនេះឡើង ដើម្បីឲ្យយុវជនបានយល់ដឹង បានទស្សនាទីតាំងឧក្រិដ្ឋកម្មដែលបន្សល់ទុកពីរបបខ្មែរក្រហម និងបានមកឃើញការអភិវឌ្ឍន៍នៅក្នុងរាជធានីភ្នំពេញនាពេលបច្ចុប្បន្ននេះ។
សូមបញ្ជាក់ថា កម្មវិធីទស្សនកិច្ចសិក្សានេះ ត្រូវបានរៀបចំរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដោយចាប់តាំងពីឆ្នាំ២០០៩ រហូតមកដល់ឆ្នាំ ២០២៣ នេះ មានសាធារណៈជនជាតិ និងអន្តរជាតិ ជាង ៦០ ម៉ឺននាក់ហើយដែលបានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
