អង្គជំនុំជម្រះតុលាការកំពូល នៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានកំណត់ពេលប្រកាសសាលដីកាស្ថាពរលើសំណុំរឿង ០០២/០២ ពាក់ព័ន្ធនឹង ខៀវ សំផន នៅថ្ងៃព្រហស្បត្តិ៍ ទី២២ ខែកញ្ញា ឆ្នាំ២០២២ នៅក្នុងសាលសវនាការនៃ អ.វ.ត.ក វេលាម៉ោង ៩:៣០ ព្រឹក។
ព័ត៌មានសម្រាប់ភ្ញៀវដែលអញ្ជើញមកទស្សនា និងសារព័ត៌មាន៖:
ដើម្បីបញ្ចៀសការរីករាលដាលនៃជំងឺកូវីដ-១៩ មានការកំណត់កៅអីត្រឹមចំនួន ១០០ ប៉ុណ្ណោះនៅក្នុងបន្ទប់សម្រាប់សាធារណជន ដែលនឹងបែងចែកដូចខាងក្រោម៖
១. ដើមបណ្តឹងរដ្ឋប្បវេណីក្នុងសំណុំរឿង ០០២ និងតំណាងផ្លូវច្បាប់៖
កៅអីចំនួន ២០ នឹងត្រូវបែងចែកជូនដើមបណ្តឹងរដ្ឋប្បវេណី ដែលសម្របសម្រួលដោយផ្នែកគាំពារជនរងគ្រោះ អង្គការអន្តរការី និងតំណាងផ្លូវច្បាប់របស់ពួកគេ។
២. មន្រ្តីការទូត និងតំណាងរដ្ឋាភិបាល៖
កៅអីចំនួន ២៥ នឹងត្រូវបែងចែកជូនក្រុមមន្រ្តីទាំងនេះ។ តម្រូវឲ្យចុះឈ្មោះជាមុន។ សំណើសុំកក់កៅអីអង្គុយត្រូវផ្ញើជូន pas@eccc.gov.kh។ កាលបរិច្ឆេទចុងក្រោយនៃការចុះឈ្មោះគឺត្រឹម៖ ថ្ងៃព្រហស្បត្តិ៍ ទី១៥ ខែកញ្ញា ឆ្នាំ២០២២ វេលាម៉ោង ៤:០០ រសៀល។
៣. តំណាងសារព័ត៌មាន៖
កៅអីចំនួន ១៥ នៅបន្ទប់សម្រាប់សាធារណជននឹងត្រូវបែងចែកជូនតំណាងសារព័ត៌មាន ហើយសមាជិកសារព័ត៌មានផ្សេងទៀតត្រូវទៅអង្គុយនៅបន្ទប់សារព័ត៌មាន (C108) នៅជាន់ផ្ទាល់ដីនៃអគារតុលាការ។ សំណើសុំកក់កន្លែងអង្គុយសម្រាប់សារព័ត៌មាននៅបន្ទប់សម្រាប់សាធារណជនត្រូវផ្ញើជូន pas@eccc.gov.kh។ កាលបរិច្ឆេទចុងក្រោយនៃការចុះឈ្មោះគឺត្រឹម៖ ថ្ងៃព្រហស្បត្តិ៍ ទី១៥ ខែកញ្ញា ឆ្នាំ២០២២ វេលាម៉ោង ៤:០០ រសៀល។
៤. តំណាងអង្គការក្រៅរដ្ឋាភិបាល និងអ្នកស្រាវជ្រាវ៖
កៅអីចំនួន ១០ នឹងត្រូវបែងចែកជូនតំណាងអង្គការក្រៅរដ្ឋាភិបាល និងអ្នកស្រាវជ្រាវ។ តម្រូវឲ្យចុះឈ្មោះជាមុន។សំណើសុំកក់កៅអីអង្គុយត្រូវផ្ញើជូន pas@eccc.gov.kh។ កាលបរិច្ឆេទចុងក្រោយនៃការចុះឈ្មោះគឺត្រឹម៖ ថ្ងៃព្រហស្បត្តិ៍ ទី១៥ ខែកញ្ញា ឆ្នាំ២០២២ វេលាម៉ោង ៤:០០ រសៀល។
៥. សាធារណជន៖
កៅអីចំនួន ៣០ នឹងត្រូវបែងចែកជូនសាធារណជន ហើយនឹងផ្តល់ជូនអ្នកដែលបានចុះឈ្មោះមុនគេ។ ទ្វារនៅផ្លូវចូលសម្រាប់ភ្ញៀវនឹងបើកនៅម៉ោង ៧:០០ ព្រឹក។ អ.វ.ត.ក សំណូមពរដល់ភ្ញៀវមេត្តាអញ្ជើញមកដល់ទ្វារសន្តិសុខឲ្យបានពីព្រលឹម ដើម្បីមានពេលវេលាគ្រប់គ្រាន់ក្នុងការត្រួតពិនិត្យផ្នែកសន្តិសុខ និងទទួលសំបុត្រចូល។ ទ្វារនៅក្នុងបន្ទប់
សវនាការនឹងបិទនៅម៉ោង ៨:៤៥ ព្រឹក ឬនៅពេលភ្ញៀវចូលអង្គុយពេញបន្ទប់សម្រាប់សាធារណជន។
សូមមេត្តាជ្រាបថា ភ្ញៀវទាំងអស់ត្រូវបង្ហាញអត្តសញ្ញាណរបស់ខ្លួន នៅទ្វារចូល ទើបទទួលបានការអនុញ្ញាតឲ្យចូលស្តាប់ការប្រកាសសាលដីកាស្ថាពរ។
ភ្ញៀវត្រូវអនុវត្តតាមបទដ្ឋានដែលកាត់បន្ថយហានិភ័យនៃការឆ្លងជំងឺកូវីដ-១៩ តាមការណែនាំដោយមន្រ្តីសន្តិសុខនៅ
អ.វ.ត.ក ដែលរួមមាន ការលាងដៃនឹងអាល់កុល ឬទឹកសម្លាប់មេរោគ និងពាក់ម៉ាស់ និងរក្សាគម្លាតសុវត្ថិភាព នៅពេលអង្គុយក្នុងបន្ទប់សម្រាប់សាធារណជននៅ អ.វ.ត.ក និងនៅពេលធ្វើដំណើរក្នុងបរិវេណ អ.វ.ត.ក។