ការតែងតាំងសហព្រះរាជអាជ្ញាអន្តរជាតិថ្មី

បន្ទាប់ពីមានការចាត់តាំងពីឯកឧត្តម António Guterres អគ្គលេខាធិការអង្គការសហប្រជាជាតិ និងដោយ មានការអនុម័តយល់ព្រមពីឧត្តមក្រុមប្រឹក្សានៃអង្គចៅក្រម ព្រះមហាក្សត្រនៃព្រះរាជាណាចក្រកម្ពុជា ព្រះករណា សម្តេច ព្រះបរមនាថ នរោត្តម សីហមុនី ទ្រង់បានតែងតាំងលោកស្រី Brenda J. HOLLIS (ជនជាតិអាមេរិក) ជា​សហព្រះរាជអាជ្ញាអន្តរជាតិថ្មីនៅអង្គជំនុំជម្រះវិសាមញ្ញក្នុងតុលាការកម្ពុជា (...) ចាប់ ពីថ្ងៃទី០១ ខែកញ្ញា ឆ្នាំ២០១៩​ នេះតទៅ

លោកស្រី Hollis ជំនួស​លោក Nicholas Koumjian (ជនជាតិអាមេរិក) ដែល​បាន​បញ្ចប់​ការតែង​តាំង​នៅ​ខែ​មិថុនា កន្លងទៅ​នេះ។

លោកស្រី Hollis បានទទួល​ការ​តែងតាំងជា​សហព្រះរាជអាជ្ញាអន្តរជាតិបម្រុង នៅឆ្នាំ២០១៥។ លោក​ស្រី បាន​បំពេញ​ការងារ​ជា​រដ្ឋ​អាជ្ញានៅ​តុលាការ​ពិសេសសម្រាប់​ប្រទេសសេរ៉ា​ឡេអូនសម្រាប់​កិច្ចការ​ដែល​នៅ​សេស​សល់ (RSCSL) តុលាការ​ពិសេសសម្រាប់​ប្រទេសសេរ៉ា​ឡេអូន (SCSL) ពី​ខែ​ធ្នូ ឆ្នាំ​២០១០ រហូតដល់​ខែ​សីហា ឆ្នាំ​២០១៩ ដែល​ពីមុន​នោះ លោកស្រី​ក៏ធ្លាប់បំពេញការងារ​​ជា​ប្រធានក្រុម​​មេធាវី​ផ្នែក​ជំនុំជម្រះ ដែល​ទទួល​ខុសត្រូវ​ដឹកនាំ​ការ ចោទប្រកាន់​អតីត​ប្រធានាធិបតីប្រទេសលីបេរីយ៉ា Charles Taylor ដែរ។

ពីឆ្នាំ​១៩៩៤ ដល់​ឆ្នាំ​២០០១ លោកស្រី Hollis ធ្លាប់​កាន់​មុខតំណែង​ជា​ច្រើន​នៅក្នុង​ការិយាល័យ​រដ្ឋ​អាជ្ញា​នៃ​តុលាការ​ព្រហ្មទណ្ឌអន្តរជាតិ​សម្រាប់​អតីត​ប្រទេស​យូហ្គោស្លាវី (ICTY) រួម​មាន ជា​មេធាវី​នាំមុខ​ក្នុង​ការ​រៀបចំ​សំណុំ​រឿង​ប្រឆាំង​អតីត​ប្រធានាធិបតី​ប្រទេស​ស៊ែប Slobodan Milošević និង​ជា​សហមេធាវី​នៅក្នុង​រឿងក្តី Tadić ជា​សំណុំ​រឿង​ដំបូងដែល​មាន​ការតតាំងក្តី​ក្នុង​តុលាការអន្តរជាតិ ចាប់​តាំង​ពី​ការ​ជំនុំជម្រះ​ក្តី​នៅ​តុលាការ Nuremberg មក។

លោក​ស្រី Hollis ធ្លាប់​បានបណ្តុះបណ្តាល​ចៅក្រមព្រះរាជ​អាជ្ញា និង​អ្នកស៊ើបអង្កេត​នៅ​ប្រទេស​កម្ពុជា ប្រទេស​ឥណ្ឌូនេស៊ី និង​ប្រទេស​អ៊ីរ៉ាក់។ លោកស្រី​ក៏​ធ្លាប់​បាន​ជួយ​ជនរងគ្រោះ​នៃ​ឧក្រិដ្ឋកម្ម​អន្តរជាតិ​នៅ​ប្រទេស​កូឡុំប៊ី និង​នៅ​សាធារណរដ្ឋ​ប្រជាធិបតេយ្យ​កុងហ្គោ​ ដើម្បី​រៀបចំ​ដាក់សារណានានា​ដែល​ស្នើសុំ​ឲ្យ​មាន​ការ​​ស៊ើបអង្កេត​ដោយ តុលាការ​ព្រហ្មទណ្ឌ​អន្តរជាតិ​ផងដែរ។

លោក​ស្រី Hollis ជា​អតីតសមាជិក​ក្រុម​ការងារ​ស្ម័គ្រចិត្ត Peace Corps អាមេរិក និង​បាន​ចូល​និវត្តន៍​​ពី​កងទ័ពអាកាសអាមេរិក​ដែល​មានឋានន្តរស័ក្តិថ្នាក់​វរសេនីយឯក។

Most read