នៅថ្ងៃទី២០ ខែមីនា ឆ្នាំ២០២៤ នេះ លោក ឈឹម ថា នាយកវិទ្យាល័យ ហ៊ុន សែន កំចាយមារ បានដឹកនាំសិស្សានុសិស្សប្រមាណ ២៥០នាក់ ដែលកំពុងសិក្សាថ្នាក់ទី១១ និងទី១២ នៃវិទ្យាល័យ ហ៊ុន សែន កំចាយមារ ស្រុកកំចាយមារ ខេត្តព្រៃវែង មកចូលរួមក្នុងកម្មវិធីទស្សនកិច្ចសិក្សារៀបចំឡើងដោយ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.)។ នៅក្នុងខែមីនានេះ មានសិស្សានុសិស្សសរុបប្រមាណ៥០០នាក់ ហើយ មកពីវិទ្យាល័យ ហ៊ុន សែន កំចាយមារ ដែលបានមកចូលរួមក្នុងកម្មវិធីទស្សនៈកិច្ចសិក្សារបស់សាលាក្ដីខ្មែរក្រហម ដើម្បីទៅទស្សនកិច្ចសិក្សានៅវិមានឈ្នះឈ្នះ សារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលប្រល័យពូជសាសន៍ជើងឯក។
ក្នុងអំឡុងពេលចូលរួមដំណើរទស្សនកិច្ចនោះ លោក ឈឹម ថា បានលើកឡើងថា សិស្សានុសិស្សពិតជាចាប់អារម្មណ៍ក្នុងការមកចូលរួមកម្មវិធីទស្សនកិច្ចសិក្សារៀបចំដោយសាលាក្ដីខ្មែរក្រហម។ លោកបន្ថែមថា ការចូលរួមនេះ សិស្សានុសិស្សមានឱកាសបានស្ដាប់បទបង្ហាញពីមន្ដ្រី និងមគ្គុទ្ទេសក៏ នៅតាមទីតាំងប្រវត្តិសាស្ដ្រនីមួយៗ។ លោកនាយកបញ្ជាក់ថា “ក្មេងៗនៅសាលាខ្ញុំ ចាប់អារម្មណ៍ចង់មកច្រើនណាស់ ប៉ុន្ដែដោយសារតែចំនួនមានកំណត់ចឹង យើងអនុញ្ញាតឱ្យពួកគាត់មកបានតែប៉ុននឹង។..... ពួកគេ(សិស្ស)ចង់ដឹងរឿងរ៉ាវពាក់ព័ន្ធនឹងរបបខ្មែរក្រហម ការកាត់ទោសមេដឹកនាំខ្មែរក្រហម ស្វែងយល់អំពីវិមានឈ្នះឈ្នះ និងទស្សនាសារៈមន្ទីរទួលស្លែង និងបឹងជើងឯក។ ពេលមកចឹង សិស្សរៀនសូត្របានច្រើន បន្ថែមលើសពីអីដែលពួកគេបានរៀនក្នុងថ្នាក់។”
សូមបញ្ជាក់ថា ក្នុងដំណើរទស្សនៈកិច្ចសិក្សានេះ សិស្សានុសិស្សទាំងអស់ត្រូវបាននាំយកទៅទស្សនកិច្ចសិក្សា និងស្ដាប់ការបកស្រាយពីមគ្គុទេសក៍ជំនាញអំពីសំណង់ ខ្លឹមសារ គោលគំនិតនៃការសាងសង់នៃវិមានឈ្នះ-ឈ្នះ ជាពិសេសអំពីប្រវត្តិសាស្ត្រយោធានៅវិមានឈ្នះ-ឈ្នះ។ សិស្សានុសិស្សទាំងអស់ក៏ទទួលបានការធ្វើបទបង្ហាញរបស់មន្ដ្រីមកពីសាលាក្ដីខ្មែរក្រហមផងដែរ អំពីដំណើរការជំនុំជម្រះក្ដី និងសមិទ្ធផលដែលទទួលបានពីការជំនុំជម្រះក្ដីលើអតីតមេដឹកនាំជាន់ខ្ពស់នៃរបបខ្មែរក្រហម។ ជាមួយគ្នានេះផងដែរ សិស្សានុសិស្សក៏ត្រូវបាននាំយកទៅសិក្សាស្វែងយល់អំពីស្លាកស្នាម និងសោកនាដកម្មរបស់ប្រជាជនកម្ពុជានៅក្នុងសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលប្រល័យពូជសាសន៍ជើងឯក។
សូមបញ្ជាក់ថា កម្មវិធីទស្សនកិច្ចសិក្សានេះ ត្រូវបានរៀបចំរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំងពីឆ្នាំ២០០៩ រហូតមកដល់ឆ្នាំ ២០២៤ នេះ មានសាធារណៈជនជាតិ និងអន្តរជាតិ ជាង ៦៥ ម៉ឺននាក់ហើយដែលបានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
