លោកគ្រូ អ្នកគ្រូ ចំនួន ២៨២ នាក់ កំពុងបង្រៀននៅតាមសាលារៀននានាក្នុងស្រុកកំពង់ត្របែក ខេត្តព្រៃវែង រួមនឹងនិស្សិតឆ្នាំទី២ផ្នែកសារព័ត៌មាននៃសាកលវទ្យាល័យភូមិន្ទភ្នំពេញ មកបំពេញទស្សនកិច្ចសិក្សា នៅអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នៅថ្ងៃទី១៥ ខែមីនា ឆ្នាំ ២០១៨។ ទស្សនកិច្ចដែលរៀបចំឡើងដោយផ្នែកកិច្ចការសាធារណៈនេះ ធ្វើឡើងក្នុងគោលបំណងដើម្បីសិក្សាស្វែងយល់អំពីដំណើការរបស់សាលាក្ដីខ្មែរក្រហមក្នុងការជំនុំជម្រះក្តីលើអតីតមេដឹកនាំជាន់ខ្ពស់និងអ្នកទទួលខុសត្រូវខ្ពស់ក្នុងឧក្រិដ្ឋកម្មធ្ងន់ធ្ងរបំផុតប្រព្រឹត្តនៅក្នុងអំឡុងពេលនៃរបបខ្មែរក្រហម ក៏ដូចជាការសិក្សាស្វែងយល់បន្ថែមអំពីប្រវត្តិសាស្ដ្រនៃរបបកម្ពុជាប្រជាធិបតេយ្យ។ ក្រៅពីបំពេញទស្សនកិច្ចនៅតុលាការខ្មែរក្រហម ក្នុងថ្ងៃដដែលនេះ លោកគ្រូអ្នកគ្រូទាំងអស់ ក៏បានទៅទស្សនកិច្ចនៅរមន្ទីរឧក្រិដ្ឋកម្មប្រល័យពូជសាសន៍ទួលស្លែង និងវាលពិឃាតដបឹងជើងឯកផងដែរ៕
