មន្ដ្រីផ្នែកកិច្ចការសាធារណៈនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ធ្វើបទបង្ហាញអំពីសមិទ្ធផលរបស់ អ.វ.ត.ក ជូនសិស្សានុសិស្សប្រមាណជិត ១៥០ នាក់ មកពីវិទ្យាល័យ ប៊ុន រ៉ានី ហ៊ុន សែន មានជ័យ និងវិទ្យាល័យ ហ៊ុន សែន ស្គន់ ក្នុងស្រុកជើងព្រៃ ខេត្ដកំពង់ចាម នាព្រឹកថ្ងៃទី២ ខែឧសភា ឆ្នាំ២០២៣។ បទបង្ហាញនេះធើ្វឡើងនៅក្នុងបរិវេណវិមានឈ្នះ ឈ្នះ នៅខណៈពេលសិស្សានុសិស្សបានមកចូលរួមក្នុងកម្មវិធីទស្សនកិច្ចសិក្សារៀបចំដោយសាលាក្ដីខ្មែរក្រហម។
ក្នុងបទបង្ហាញនោះ មន្ដ្រីផ្នែកកិច្ចការសាធារណៈបានជម្រាបជូនសិស្សានុសិស្សថា អ.វ.ត.ក បានជំនុំជម្រះក្ដីលើអតីតមេដឹកនាំជាន់ខ្ពស់ខ្មែរក្រហមចំនួន ៤ រូប និងអ្នកទទួលខុសត្រូវលើឧក្រិដ្ឋកម្មធ្ងន់ធ្ងរបំផុត ចំនួន ១ រូប។ លោកបញ្ជាក់ថា ជនទាំង ៥រូប នោះ រួមមាន លោក នួន ជា អតីតប្រធានរដ្ឋសភានៃរបបកម្ពុជាប្រជាធិបតេយ្យ និងជាអនុលេខាបក្សកុម្មុយនីស្តកម្ពុជា លោក ខៀវ សំផន អតីតប្រមុខរដ្ឋនៃរបបកម្ពុជាប្រជាធិបតេយ្យ លោក អៀង សារី ឧបនាយករដ្ឋមន្ត្រី និងរដ្ឋមន្រ្តីក្រសួងការបរទេស អៀង ធីរិទ្ធ រដ្ឋមន្រ្តីក្រសួងសង្គមកិច្ច និងលោក កាំង ហ្កេកអ៊ាវ ហៅឌុច អតីតប្រធានមន្ទីរស២១។
លោកបន្ដថា បន្ទាប់ពីការជំនុំជម្រះក្ដីត្រូវបានបញ្ចប់ អ.វ.ត.ក ត្រូវអនុវត្ដកិច្ច ព្រមព្រៀងបន្ថែមស្តីពីការរៀបចំក្នុងពេលអន្តរកាល និងការបញ្ចប់ការងាររបស់សាលាក្ដី សម្រាប់រយៈពេល៣ឆ្នាំបន្ថែមពីឆ្នាំ២០២៣ ដល់២០២៥ ដែលរួមមាន ការងារគតិយុត្តមួយចំនួនរួមទាំងការគ្រប់គ្រង និងការផ្សព្វផ្សាយបណ្ណសារស្តីពីសំណុំរឿងរបស់អ.វ.ត.ក ឲ្យបានទូលំទូលាយ ការអប់រំ និងការផ្សព្វផ្សាយស្តីពីសមិទ្ធផលនិងកេរដំណែលរបស់ អ.វ.ត.ក និងការពិនិត្យតាមដានការអនុវត្តសំណងដែលមានលក្ខណៈផ្លូវចិត្ត និងសមូហភាពដល់ដើមបណ្តឹងរដ្ឋប្បវេណី។
តំណាងយុវជនស្រុកជើងព្រៃ ដែលបានដឹកនាំសិស្សានុសិស្សមកទស្សនកិច្ចបានថ្លែងកោតសរសើរ និងអរគុណដល់សាលាក្ដីខ្មែរក្រហមដែលបានរៀបចំកម្មវិធីទស្សនកិច្ចសិក្សានេះឡើង ដោយលោកថា ទស្សនកិច្ចនេះនឹងជួយឱ្យយុវជនបានស្វែងយល់ អំពីប្រវត្តិសាស្ដ្រពិតប្រាកដនៃរបបឃោរឃៅខ្មែរក្រហម និងយល់ដឹងពីតម្លៃនៃសន្ដិភាព។ លោកក៏បានថ្លែងអំណរគុណដល់ប្រមុខរាជរដ្ឋាភិបាលផងដែរ ដែលលោកបានដឹកនាំប្រទេសកម្ពុជាឱ្យទទួលបានសុខសន្ដិភាព និងបានរីកចម្រើនគ្រប់វិស័យរហូតមកដល់សព្វថ្ងៃនេះ។
ក្នុងដំណើរទស្សនកិច្ចសិក្សាដែលរៀបចំដោយ អ.វ.ត.ក នេះ យុវជនទាំងអស់ត្រូវបានដឹកនាំ ឱ្យទៅស្វែងយល់រឿងរ៉ាវប្រវត្តិសាស្ដ្រពាក់ព័ន្ធនឹងរបបកម្ពុជាប្រជាធិបតេយ្យចំនួនបីទីតាំង គឺនៅសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង មជ្ឈមណ្ឌលប្រល័យពូជសាសន៍ជើងឯក វិមានឈ្នះ ឈ្នះ។ ក្រោយពេលបញ្ចប់ទស្សនកិច្ចសិក្សានៅក្នុងមួយថ្ងៃនេះ សិស្សានុសិស្សទាំងអស់បានទទួលព័ត៌មាន និងចំណេះដឹងយ៉ាងច្រើនជុំវិញដំណើការជំនុំជម្រះក្តីលើអតីតមេដឹកនាំខ្មែរក្រហម ការធ្វើទារុណកម្មយ៉ាងព្រៃផ្សៃ និងការកាប់សម្លាប់ប្រជាពលរដ្ឋកម្ពុជាដោយពួកខ្មែរក្រហម និងការពលីរបស់ថ្នាក់ដឹកនាំកម្ពុជាក្នុងការរំដោះប្រទេសជាតិចេញពីរបបប្រល័យពូជសាសន៍។
សូមបញ្ជាក់ថា ដំណើរទស្សនកិច្ចសិក្សានេះ ត្រូវបានរៀបចំរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំងពីតុលាការដំណើរការដំបូង រហូតមកដល់ឆ្នាំ២០២៣ នេះ សាធារណជនជាតិ និងអន្តរជាតិជាងកន្លះលាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕