និស្សិតមកពីសាកលវិទ្យាល័យភូមិន្ទនីតិសាស្ត្រនិងវិទ្យាសាស្ត្រសេដ្ឋកិច្ច ទទួលបានជ័យលាភីលេខ១ សម្រាប់ការប្រកួតសវនាការប្រឌិតថ្នាក់ជាតិ ស្តីពីនីតិមនុស្សធម៌អន្តរជាតិ ឆ្នាំ២០២៣ រៀបចំដោយ អ.វ.ត.ក.

ភ្នំពេញ ប្រទេសកម្ពុជា -  កាលពីថ្ងៃទី៣ ខែធ្នូ ឆ្នាំ២០២៣ ក្រុមនិស្សិតច្បាប់មួយក្រុមចំនួួន៣នាក់ មកពីសាកលវិទ្យាល័យភូមិន្ទនីតិសាស្ត្រនិងវិទ្យាសាស្ត្រសេដ្ឋកិច្ច (RULE) ទទួលបានជ័យលាភីលេខ១ សម្រាប់ការប្រកួតសវនាការប្រឌិតថ្នាក់ជាតិ ស្តីពីនីតិមនុស្សធម៌អន្តរជាតិ ឆ្នាំ២០២៣ ដែលរៀបចំដោយអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) និងសហការរៀបចំជាមួយ គណៈកម្មាធិការអន្តរជាតិនៃកាកបាទក្រហម (ICRC) និងសាកលវិទ្យាល័យអាមេរិកាំងភ្នំពេញ (AUPP)។

ក្រុមនិស្សិតច្បាប់ចំនួនបួនក្រុម មកពីសាកលវិទ្យាល័យភូមិន្ទនីតិសាស្ត្រនិងវិទ្យាសាស្ត្រសេដ្ឋកិច្ច សាកលវិទ្យាល័យអាមេ រិកាំងភ្នំពេញ និងសាកលវិទ្យាល័យជាតិគ្រប់គ្រង បានចូលរួមការប្រកួតសវនាការប្រឌិតថ្នាក់ជាតិ ស្តីពីនីតិមនុស្សធម៌អន្តរ ជាតិ ឆ្នាំ២០២៣ ក្នុងវគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រ ដែលបានធ្វើឡើងនៅក្នុងបន្ទប់សវនាការរបស់ អ.វ.ត.ក.។ អ្នក​ប្រកបវិជ្ជាជីវៈច្បាប់​ចំនួនប្រាំពីររូប រួម​ទាំងចៅក្រម​នៃអង្គជំនុំជម្រះ​សាលាដំបូង​ បាន​​បំពេញ​មុខងាជាចៅក្រមវិនិច្ឆ័យ​ក្នុង​ការប្រកួតប្រជែង​នេះ។

ក្រុម​​ទទួល​បាន​ចំណាត់​ថ្នាក់​លេខ​១ ​មកពីសាកលវិទ្យាល័យភូមិន្ទនីតិសាស្ត្រនិងវិទ្យាសាស្ត្រសេដ្ឋកិច្ច គឺ​កញ្ញា ជា ដាលីនណា កញ្ញា តាំង គឹមសួ និង​កញ្ញា ហ៊ន សុខងីម ដែលពួកគេនឹង​បន្តទៅចូលរួមប្រកួត​ប្រជែងថ្នាក់​តំបន់ នៃ​ការប្រកួតសវនាការប្រឌិត ស្តីពីនីតិមនុស្សធម៌អន្តរជាតិ ក្នុងឆ្នាំ២០២៤ ដែល​រៀបចំនៅទីក្រុងហុង​កុង។

កញ្ញា ជា ដាលីនណា សមាជិកម្នាក់ក្នុងក្រុមដែល​ទទួល​បាន​ចំណាត់​ថ្នាក់​លេខ​១  បាននិយាយថា៖ «ខ្ញុំពិតជាសប្បាយចិត្ត និងមានមោទនភាពចំពោះពួកយើង។ សូម​អរគុណ​ដល់​សហ​ប្រឹក្សា​ និង​អ្នក​ស្រាវ​ជ្រាវ​របស់​ខ្ញុំ ​ដែល​បាន​រួម​ចំណែក​ដល់​ជោគជ័យ​ទាំង​អស់»។

កញ្ញា ជា ដាលីនណា បាននិយាយបន្ថែមថា៖ «ចំពោះនិស្សិតច្បាប់ផ្សេងទៀត ពួកគេគួរតែព្យាយាមចូលរួមការប្រកួតសវនាការប្រឌិតថ្នាក់ជាតិស្តីពីនីតិមនុស្សធម៌អន្តរជាតិ ដូចពួកយើង ព្រោះនេះជាឱកាស ដើម្បីទទួលបានចំណេះដឹងបន្ថែមនិងយល់ដឹងពីរបៀបធ្វើការស្រាវជ្រាវជាច្រើនទៀត។ បន្ទាប់ពីពួកយើងចូលរួមការប្រកួតនេះ យើងបានទទួលចំណេះដឹងនិងបទពិសោធន៍ជាក់ស្តែង ព្រោះវាមិនងាយស្រួលទេក្នុងការទទួលបានចំណេះដឹង [ដោយ] គ្រាន់តែសិក្សានោះទេ។ ជាឧទាហរណ៍ ការរៀនពីសម្មតិកម្ម [ករណីសិក្សា] តាមរយៈការប្រកួតប្រជែងគឺពិតជាល្អខ្លាំងណាស់»។

អ.វ.ត.ក.​ សូម​អបអរសាទរ​ដល់​ប្អូនៗនិស្សិតទាំងអស់​ដែល​បាន​ចូលរួម​ និង​បាន​ខិតខំប្រឹង​ប្រែង​លើក​កម្ពស់​គោល​ការណ៍សំខាន់​ៗស្តីពីនីតិមនុស្សធម៌អន្តរជាតិ និងរង់ចាំបន្តគាំទ្រយ៉ាងសកម្មដល់គំនិតផ្តួចផ្តើម​ទាំង​នេះ ក្នុង​អំឡុង​ពេល​បំពេញ​មុខងារ​សេសសល់។​

###

កំណត់ចំណាំចំពោះបណ្ណាធិការព៌ត៌មាន៖

• សម្រាប់ព័ត៌មានបន្ថែម៖
  • អ.វ.ត.ក. ICRC និង AUPP បើកកិច្ចប្រជុំ សម្រាប់ការរៀបចំការប្រកួតសវនាការប្រឌិតថ្នាក់ជាតិ ស្តីពីនីតិមនុស្សធម៌អន្តរជាតិ ឆ្នាំ២០២៣៖ https://t.ly/CyXDN
  • អ.វ.ត.ក. និង ICRC ចុះអនុស្សរណៈយោគយល់គ្នា សម្រាប់ការរៀបចំ ការប្រកួតប្រជែងតុលាការនិម្មិតផ្នែកច្បាប់មនុស្សធម៌អន្តរជាតិ៖​ https://t.ly/mWxOw